کەرکوک ئێک ژ پارێزگەھێن ھەستیار و کارتێکەر ل سەر ئاستێ ھەرێما کوردستان و عێراقێ ژبەر بەرکەفتەیا جوگرافی و فرە نەتەوەیی و ئولی و مەزھەبی. ھەر ژ سالێن ١٩٢٧ێ و تا نھاژی ب پارێزگەھەک بێ خودان دھێتە نیاسین، ھەرچەند ئاخ و ژێرزەمینێ وێ جھێ خێر و بەرەکەتێ بوویە بو دەستھەلاتدارێن بەغدایێ و حکومەتێن ئێک لدوف ئێکێن عێراقێ، لێ بدرێژاھیا دیروکێ خەلکێ وێ خێر و خوەشی بخوڤە نەدیتیە و ھەردەم بوینە قوربانیێن سەرکردە و رژێمێن عێراقێ. ھەر ژ دەستپێکا دامەزراندنا عێراقێ و تا نھا حکومەتێن عێراقێ چ پشکەک ژ داھاتێ پەترولێ بو پارێزگەھا کەرکوکێ دابین نەکریە و ھەردەم خەلکێ وێ زەرەرمەند بوویە و ھێلا ھەژاریێ ل پارێزگەھەک مینا کەرکوکێ ب لێبورینڤە ل ھەمی دەمان یا بلند بوویە و خەلکێ وێ ب دەردەسەری ژیایە. ھیچ گومان د کوردستانیبوونا کەرکوکێ دا نینە و بەھرا پتر ژ خەلکێ وێ ل نەتەوا کوردن و ھەر کورد ژی بوینە خوە لێ کریە خودان د ھەمی بارودوخێن ژیانێ دا لێ د ھەمان دەمدا رژێمێن عێراقێ دژبەریا ڤێ چەندێ کریە و کەرکوک کریە جھێ ململانێ یا سیاسی، و ژبەر کوردستانی بوونا وێ ھەردەم ژلایێ خزمەتگوزاری ڤە پشتکوھـ ئێخستیە.
ئەگەر پرسیار بکەین ئەرێ ب راستی ژی کەرکوک دلێ کوردستانێ یە یان قودسا کوردستانێ؟ ئانکو خودانێن ڤان پەیڤان ب کردار کینە؟ بەرسڤا ڤان دوو پرسان یا روھن و ئاشکەرایە کو بارزانیێ نەمر ھەردەم و ل ھەر جھان دگوت کەرکوک دلێ کوردستانێ یە، لێ د ڤان سالێن داویێ دا ھند کەسایەتی و حزبێن کوردستانێ دگوت کەرکوک قودسا کوردستانێ یە. ئەگەر جوداھیەکێ دناڤبەرا ڤان دوو پەیڤان دا بکەین ژ لایێ کرداری و رشدبونێ ڤە خویا دبیت کو خودانێن پەیڤا دلێ کوردستانێ ھەردەم ل ھەمبەر ئاخفتن و سوزا خوە بوینە و بەرپرسیارەتی ھەلگرتیە و د ھەمی کاودانان دا کوردستانیبوونا کەرکوکێ پاراستیە ھەر ژ سەردەمێ شورەشێن کوردان ب سەرکردایەتیا بارزانیێ نەمر و تا نھو ژی کو نڤشێن وی رێبەراتیا دوزا گەلێ کورد دکەن. چ ل دەمێ سەرکەفتنان بیت یان شکەستنان چ جاران دەست ژ کەرکوکا دل بەرنەدایە کو ئەڤە ژی راستیەکە و جھێ گومانێ تێدا نینە. لێ بەروڤاژی ڤێ چەندێ ھند ژ خودانێن پەیڤا قودسا کوردستانێ ڤیانا وان بو کەرکوکێ تنێ بو بەرژەوەندیێن کەسی و حزبی بوویە و باشترین بەرسڤ بو گومانلێکەرێن ڤان راستیا بویەر و پێشھاتێن چار سالێن بوری یێن رەوشا کەرکوکێ یە. یا خویایە کو ھەر ژ سالا ٢٠١٤ و پشتی ئەڤـ باژێرە کەفتیە بن دەستھەلاتا حکومەتا ھەرێما کوردستانێ ب سەروکاتیا ھێژا نێچیرڤان بارزانی ، باژێرێ کەرکوکێ گھورینەکا مەزن بخوڤە دیت و نەما باژێرەکێ بێ خودان و ئیدی پتر سیمایێ کوردستانی بوونی ل سەر زال بوو و زڤری باژێرەکێ کوردی یێ پاراستی و ل سەر دەستێ ھێزێن کوردی ژ مەزنترین گروپێ تیرورستی یێ سەردەم ھاتە پاراستن و تەناھی و پێکڤەژیانا ئول و نەتەوان بو روژەکێ ژی تێک نەچوو. دەستکەفتیێن کوردان ل کەرکوکا دل و لبن سێبەرا حکومەتا ھەرێمێ روژ بو روژێ زێدەتر بوون ژ وانا گرنگیەکا زوور ب کەرتێ خاندنێ ھاتە دان ب تایبەت زمانێ کوردی ئانکو حکومەتا ھەرێمێ ھەمی پێتڤیێن خاندنا کوردی بەردەست کرن. ژ لایێ دارایی ژی مەھانە ١٠ ملیون دولارێن پترودولاری ژلایێ حکومەتا ھەرێمێ بو کەرکوکێ دھاتە رەوانەکرن و ب وی کوژمێ پارەی ب سەدان کەس ھاتنە دامەزراندن و خەلکێ ھەژارێ پارێزگەھێ پێ سودمەند بوون. ئەڤە و چەندین خزمەگوزاریێن دی کو ب درێژاھیا حکومرانیا عێراقێ کەرکوکێ ئەو ئێمناھی و خزمەتگوزاری و سیمایێ جوان و پێکڤە ژیانێ بخوڤە نەدیتبوو. لێ پشتی دەربازبوونا سێ سالێن زێرین و تەناھی و خوشگوزەرانیێ لبن سێبەرا حکومەتا ھەرێمێ، ھندەک کەسێن ھەرزەکار و خودان بەرژەوەندیێن بەرتەسک گورزەکا مەزن ل کەرکوکێ دا و ب دیارکری ل ١٦ێ ئوکتوبەرێ کەرکوک کرە دیاری بو دوژمناو ب ھاریکاریا وان دگەل دوژمنا کەرکوکا دل ھاتە داگیرکرن و ب ھزارەھا خێزانێن کورد ئاوارە و دەربەدەر بوون ژبلی کوشتن و تالانکرن و شەوتاندنا مال و مولکێن کوردان ل کەرکوک و دەڤەرێن دەردوور و ئیدی سیمایێ کوردستانیبوونێ ل سەر وی باژێری نەما و ژیان تێدا یا سەختە و روژانە ئەم دبینین خەلکێ وێ تووشی زووریێ دبن ژلایێ داگیرکەران و خاندنا کوردی لاواز بوویە و ھەژاری و دەردەسەری روژ بو روژێ ل زێدەبوونێ دایە و روژانە دبینین رێڤەبەرێن کورد ل وێ پارێزگەھێ دھێنە دوورخستن ژ ئەرکێن وان وھەر جار ب بەھانەیەکێ فەرمانێن دەستگیرکرنێ بو کوردپەروەر و خەمخورێن وێ پارێزگەھێ ژلایێ داگیرکەرێن کەرکوکێ دەردکەڤن. یا سەیر ئەوە ئەو ھەرزەکارێن سیاسی یێن ھەردەم دگوت کەرکوک قودسا کوردستانێ یە ھەر ئەوبوون ئەڤـ رەوشە بسەرێ وێ پارێزگەھێ ئینای تنێ ژبوی چەند بەرژەوەندیێن بەرتەسکێن تاکەکەسی لێ نھا نە بتنێ لناڤـ کوردان ئانکو لناف دوست و دوژمنان ژی ب خیانەتکار و شەرمەزار دھێنە نیاسین.
ژ روویەکێ ڤە د مافدارن ناڤێ کەرکوکێب قودسا کوردستانێبینن ژبەرکو چەوا قودسا فەلەستینێ ل پێش چاڤێن ھەموو عەرەبان ھاتە داگیرکرن و کەسێ شیان نەبوون وێ داگیرکەریێ ب راوەستینیت و ھەموو وەک بینەر بوون و روژ بو روژێ رێککەفتنێن نھێنی یێن وەلاتێن عەرەبی دگەل داگیرکەرێن قودسێ ئاشکەرا دبن و کەس خوە ل ئێش و ئازارێن وی وەلاتی ناکەتە خودان ئاھا وەسا قودسیەتا کەرکوکێ بو وان خیانەتکاران دھێتە دیتن و خودانێن ڤێ پەیڤێ نە بتنێ بینەر بوون لێ ھاریکار و ئەگەر ژی بوون کو ئەڤـ رەوشە بسەر کەرکوک و خەلکێ وێ دا بھێت و ل پێش چاڤێن وان ئەڤـ وێرانیە بسەرێ قودسا وان بھێت. ل دوماھیێ دێ بێژین ب خیانەت و فروتن و عەرەبکرنێ ناسناڤـ و رەسەنایەتیا کەرکوکێ ناھێتە گھورین و دێ ھەر مینیت دلێ کوردستانێ و ئەڤـ رەوشە ناھێتە قەبولکرن و ئەو ئێش و ئازارێن ب ئەگەرێ خیانەتێ بسەر کەرکوکێ دا ھاتی نامینن و بەرەف سیمایێ خوە یێ جوان زڤریتەڤە و ب درێژاھیا دیروکا خوە خەلکێ کوردستانێ دیدەڤانە کو ھەر سەرکردێن کوردپەروەر و ئازادیخوازێن گەلێ کورد بوینە خوە لێ کریە خودان و نەھێلایە کوردستانیبوونا خوە ژ دەست بدەت.