هژماره‌كا سه‌یر ل دۆر كریستیانان
کارزان فەقێ
ئه‌و داتا یا كو نها هنده گرنگی پێ نه‌هاتیه و نه‌هاتیه گۆتن، هژمارا كریستیانێن ئیراقێ و هه‌رێما كوردستانێ یه، كو پێشتر هه‌ژماره‌كا زۆر یا كریستیانا ل ئیراقێ بوون، هه‌روه‌سا ل گه‌ل هندێ هه‌ژماره‌كا زێده ل هه‌رێما كوردستانێ بوون، ره‌وشا نه‌لبار یا ئیراقێ بوو ئه‌گه‌رێ وێ یه‌كێ هه‌رێما كوردستانێ ژى ل گه‌ل خوه بسۆژیت، چونكى ب مه ناهێته ڤه‌شارتن كو ئه‌گه‌ر كوردستان چه‌ند ئارام بیت، لێ هه‌رده‌م په‌یڤا (ئیراق) ل گه‌ل ناڤێ وێ دهێت، كه‌واته ئه‌و ئیراقێ ل سه‌ر ئاستێ هه‌موو رێكۆردێن خراب و نه‌ئارام و وه‌لاتیێن دلته‌نگ ل سه‌ر ئاستێ جیهانێ ب ئێكه‌م بهێت و ل ده‌ڤ جیهان هه‌موویان ژى ب خرابیا خوه به‌رنیاس بیت، زۆر ب زه‌حمه‌ته جیهان بگه‌هیته وێ باوه‌رێ كو دناڤا جه‌هنه‌ما ئیراقێ دا هه‌رێمه‌كا ئارام هه‌یه و بوویه په‌ناگه‌هێ وان پێكهاته‌یان كو ل باژارێن دى یێن ئیراقێ ژ به‌ر گه‌ف و كوشتن و تیرۆرێ كۆچبه‌ر دبن، لێ ئه‌و نه راستیه ژى نابیت وه‌ها بمینیت كو هه‌رێما كوردستانێ و ئیراقێ ل ده‌ڤ وه‌لاتێن جیهانێ ب ئێك چاڤ بهێته دیتن، له‌ورا گرنگه ئه‌م ڤان راستیان ببێژین و باس بكه‌ین، بۆ نموونه به‌ریا نها پتر ژ دوو ملیۆن كریستیان ل ئیراقێ و هه‌رێما كوردستانێ ژیان دكر، ئه‌ڤ ژمارا كریسیتانان خوه‌دى په‌رستگه‌هێن خوه‌یێن ئۆلى بوون، گه‌له‌ك ژ دێر و په‌رستگه‌هێن وان هاتنه په‌قاندن، ژ ترسا تیرۆركرنێ وان كار و بازرگانیێن خوه بجهـ هێلا، ئه‌و شوونوارێن دیرۆك و شارستانیه‌كا وان نیشان دده‌ت هاتنه په‌قاندن، كه‌واته ده‌ما ژیان و كار و هزركرنا وان یا ئۆلى كه‌ڤته ژێر مه‌ترسی و گه‌فان، ئیدى قۆناغا ئێكێ یا وه‌رزێ كۆچبه‌ربوونا كریستیانان به‌ر ب هه‌رێما كوردستانێ ده‌ستپێكر و ب مخابنى ڤه پاشان د قوناغا دووێ دا كۆچبه‌ربوونا كریستیانان به‌ره‌ف وه‌لاتێن ئه‌وروپا بوو، واته ئه‌وا ل باژارێن ئیراقێ ب سه‌رێ وان هاتى جۆره بێ متمانه‌ییه‌ك ل ده‌ف كریستیانان درستكر كو هه‌رچه‌ند ئارامیا هه‌رێما كوردستانێ بوویه ئه‌گه‌رێ هندێ ئه‌و ژ گه‌فا كوشتنێ و كاره‌ساتێن مه‌زن بهێنه پاراستن، لێ كو ده‌ما هه‌رێما كوردستانێ ژى هه‌ر ل گه‌ل ناڤێ ئیراقێ بهێت، بۆ گه‌له‌ك ژ وان جوداهى نه‌بوو و به‌ره‌ف وه‌لاتێن رۆژئاڤا كۆچبه‌ربوون، لێ ئه‌ڤ كۆچبه‌ربوونه نه ب ره‌نگێ كوچبه‌ربوونا كریستیانێن ئیراقێ یه، چونكى ژ دوو ملیۆن كریستیانێن ئیراقێ نها ب تنێ 350 هه‌تا 400 هزار كریستیان ل سه‌رانسه‌رى ئیراقێ و هه‌رێما كوردستانێ دژین، هه‌ر ل گۆرى ژێده‌رێن كریستیانان ژ ڤێ هه‌ژمارێ 90% یا كریسیتانان ل هه‌رێما كوردستانێ وب ته‌نێ 10% ل هه‌موو پارێزگه‌هێن دى یێن ئیراقێ به‌لاڤن و ل به‌ندا گه‌فا توندره‌وه‌كێنه كو ئه‌و ژى مال و ملكێ خوه بجهـ بهێلن و به‌ره‌ف ژیانه‌كا ئارام بگه‌رن كو دچاڤێن گه‌له‌ك ژ وان ئه‌و ژیانا ئارام بۆ وانا هه‌رێما كوردستانێ یه، دناڤا وێ داتایا سه‌یر و ئه‌نتیكه دا، رێژه‌یا كریستیانایه ل به‌غدایا پایته‌ختێ ئیراقێ، كو پێشتر نوونه‌ره‌كێ كریستیانان ل وه‌زاره‌تا ئه‌وقافا هه‌رێما كوردستانێ راگه‌هاندبوو هیچ كریستیانه‌ك ل به‌غدایێ نه‌مایه، باژاره‌ك كو ناسناڤێ وێ نه ئارامترین پایته‌ختێ ژیانێ بیت ل سه‌ر ئاستێ جیهانێ سه‌یر نینه كریستیان ژێ بره‌ڤن، به‌لكو سه‌یر ئه‌وه هێشتا ل ده‌ف گه‌له‌ك ژ خه‌لكێ مه به‌غدا ژێده‌رێ دانا مافێ پێكهاته‌یان و خه‌لكێ كوردستانێ بیت، ژ به‌ر هندێ كێمبوونا كریستیانان ل ئیراقێ شه‌رمه‌زار‌ی و نه‌مانا وان ل به‌غدایێ سه‌یر و حێبه‌تیه، په‌نابرنا وان بۆ هه‌رێما كوردستانێ ژى و هه‌ست نه‌كرنا ب ئاواره‌بوونێ، جهێ شانازى و سه‌ربلندیێ یه
