پەیوەندیێن دپلۆماسی و ئابووری یێن ھەرێما کوردستانێ ل گەل ھەڤسوویان و وەلاتێن جیھانێ پتر یێ دھێنە پێشخستن و رولێ نێچیرڤان بارزانی راسپارتیێ پوستێ سەروکاتیا ھەرێما کوردستانێ ژ ئاستێ جاران ب ھێزتر و بەرفرەھتر بوویە ، ئەڤ ئێک ژی لسەر بنەمایێ رێزگرتنا سەروەریا ئێکدو و ل بەرچاڤگرتنا بەرژەوەندیێن ھەڤپشک ب رێیا نوونەراتیێن فەرمی یێن حکومەتا ھەرێما کوردستانێ.
کو دیارە رۆژا نە دبینین سەروک وەلات و سەروک وەزیر و وەزیرێن دەرڤە و دبلوماتکار و سیاسەتمەدارێن جیھانێ قەستا ھەرێمێ دکەن و دیدار و کومبوون و چاڤپێکەڤتنان دگەل نێچیرڤان بارزانی ئەنجام ددەن ھەروەھا پەوەندیێن ھەرێمێ دگەل وان وەلاتان رۆژ بۆ رۆژێ خورتر دبن ئەو ژی ژبۆ ڤێ حوکمرانی و سیاسەتا زانا و حەکیمانە دزڤریت، ل وارێ ھەماھەنگی و کارێن ھەڤبەش گرنگە کار لسەر وارێن پێشەسازی و بازرگانی و گەشت و گوزارێ بەرچاڤتر بیت و پویتەدانەکا زێدەتر ب ڤان کەرتان بھێتەدان پێخەمەت وێ چەندێ ژی کو کوردستانێ رزگار بیت ژ پشت بەستن ب داھاتێ نەفتێ ب تنێ .
ئاشکرایە ژی گاڤێن باش ھاتینە ھەلاندن ژ لایێ حکومەتا ھەرێما کوردستانێ ڤە د ھەموو وار و سیکتەران دا بۆ ڤەژاندنا کەرتێن ئابۆری و ل ئاییندە دا ژی ب شیان و وزەیەکا زێدەتر بەردەوامی پێ بھێتە دان و ببنە ئەولەویەت ژبال دەسھەلاتاریا ھەرێما کوردستانێ ڤە.
ژ بیرنەکەین ژی کو لسەر دەمێ دەسھەلاتداریا نێچیرڤان بارزانی ئەڤ پەیوەندیێن ڤان وەلاتێن دەرڤە دگەل ھەرێما کوردستانێ ب رەنگەکێ ھەری بەرچاڤ خورت بووینە نەخاسم ژ دامەزراندنا فەرمانگەھا پەیوەندیێن دەرڤەی حکومەتا ھەرێما کوردستانێ کو پێگەھێ ھەرێمێ رۆژ بۆ رۆژێ بھێزکرییە، و ب تایبەت لڤان سالێن داویێ و دنھادا ژی ئەو رێژا بەرچاڤا کونسلخانە و نڤیسنگەھێن بالیۆزخانە و نوونەراتیان ل ھەرێما کوردستانێ ھاتینە ڤەکرن کو ھەردەم خاستا ڤان وەلاتان ئەو بوویە کو پەیوەندیێن بھێز دگەل ھەرێما کوردستانێ دا ھەبن و وەبەرھێنانێ ل ھەرێما کوردستانێ بکەن دگەلدا ژی ئەڤ گاڤە ژ گەلەک روویان ڤە بووینە ئەگەرێ پاراستنا کیانێ ھەرێما کوردستانێ و ژ گەف و مەترسی و ھەرەشەیان ھاتییە پاراستن.
یا فەر و گرنگ ژی ب دیتنا من دڤێت پشت بەستن بتنێ لسەر وەلاتێن ھەڤسو و جیھانێ نەبیت ئەو بتنێ لدیڤ بەرژەوەندێن خۆ دگەرێن دڤێت ئەم بەرژەوەندێن خۆ پێش بەرژەوەندیێن وانا دا بنێین و نەبینە ئالاڤەک و کونترول ددەستێ وان دا بەلکو دڤێت پتر ھەو ل و بزاڤ ژبۆ وێ چەندێ بن کو ژێرخانا ئابووریا ھەرێمێ ژ ھەمی ئالییەکێ ڤە بھێتە بگەرخستن و ئاڤاکرن و دھەمی وار و بیاڤاندا بھێتە زەنگین و بھێز و موکمکرن، ھەر چەند گاڤێن باش ھاتینە ھەلاندن لێ دڤێت ئەو پێشکەڤتن و وەرا و پێشڤەچوونا ھەرێما کوردستانێ بخوڤەدیتی ب ھەر ئاوایەکی بیت بھێتە پاراستن کو ژبۆ ڤێ مەرەمێ قوربانیێن مەزن ژی ھاتینە دان و دڤێت پتر بەر ب سەمت و ئاراستەیا پێشڤەچوونێن مەزنتر گاڤ بھێنە ھەلاندن و پلان و بەرنامەسازی بھێنە دارێشتن.