نیزیک بونا کاراکرنەڤا سازیا سەروکاتیا ھەرێما کوردستانێ و پێک ئینانا حکومەتا ھەرێما کوردستانێ ل سێ پارتێن سەرەکی ( پارتی و ئێکەتی و گوران ) و ئەو پێشھاتێن نوی یێن ئیراقی ژ پارڤەبونا شیعەیان و سوننەیان بو سەر دوو و سێ تەوەرێن زور ژێک جودا و تەمام نەبونا کابینا سەروک وەزیران عادل عبدالمھدی و زێدەبونا کریارێن تیرورستی یێن داعشێ و بریارا ژ نشکەکێ ڤە یا دونالد ترامپێ سەروکێ ئەمریکا سەبارەت ب ڤەکێشانا ھێزێن ئەمریکی ل کوردستانا روژئاڤا و گەفێن تورکیا و ئالوزبونا دەڤەرێ ل سەر ھەمی ئاستەکێ . وێ چەندێ دئینیتە بەرچاڤێن مە ئەرێ کورد ل ھەرێما کوردستانێ ل کیڤەیا گوشەیا سیاسی نە ل ئیراق و دڤەرێ دا ؟ ئەرێ رەوشا نافخوی ل کوردستانێ د چ رەوش دایە ؟ چاڤەرێ چ دئێتە کرن ل کابینەیا داھاتی و سەروکێ ھەرێمێ یێ داھاتی نێچیرڤان بارزانی ؟
کوردستان وەک ئێک ژ ئارامترین دەڤەرێن روژھەلاتا ناڤین بو دەمێ چەندین سالانە بویە جھێ گەشتیار و پەنابەر و خەلکێ پارچێن دیترێن ئیراقێ و دەڤەرێ, و کلتورێ پێکڤەژیانێ ل کوردستانێ نموونەکا زورجوانە ل دەڤەرێ ھەمیێ و ژبلی ھەبونا سازیێن دیموکراسی و راگەھاندنەکا ھەتا رادەکێ باش یا ئازاد..تد. ڤێ چەندێ وەکریە کو پێگەھێ کوردستانێ ل ئیراق و دەڤەرێ دا سەنگەک بھێز ھەبیت و رێز ل سازیێن وێ بێتەگرتن وەک وەلات سەرەدەریێ دگەل بکەن.ریدانێن پشتی گرتنا کەرکوکێ و دەڤەرێن کوردستانێ ب ھێزا چەکی ژ ئالیێ حکومەتا ئیراقێ و ئەنجامێن ھەلبژاردنێن (١٢/٥ و ٣٠/٩) ئەڤ سالە . و ھاتنە گوھرینا کارەکتەرێن سەرەکی یێن گورەپانا سیاسی ئیراقێ وەکر دیتنا کوردستانێ بو ھەمی کاودانان بێتەگوھرین . نھا ھەرێما کوردستانێ پێگەھێ خوە ھەتا رادەکێ زور زڤراندیە و چاڤەرێ دئێتەکرن کو سەروکێ ھەرێمێ یێ داھاتی ئەوان ھەمی ئاستەنگێن ھاتیە رێدا پشتی ریدانێن پار سال بگوھریت. ھەروەسا کاریگەریا ھەرێمێ ل سەر کاودانێن بەغدا ھەیە و دەڤەرێن کوردستانی بێ ئیدارا خەلکێ وێ و ھەرێمێ واتا بەردەوامی دان ب نەئارامیێ. ھەروەسا ھەرێما کوردستانێ نھا دشێت رولەک باش ببینیت ل ژێک نیزیک کرنا (ئەنەکەسە و تەڤدەمێ) تایبەت پشتی بریارا ترامپی کو روژئاڤا ل رەوشەک نەئارام دایە و چ بریارا بێ تەوافقا کوردی بێتەدان دێ خزمەتا دوژمنان کەت.
سەبارەت ب رەوشا ھەرێما کوردستانێ ل ئالیێ سیاسی ڤە , ھەمی پارتێن سیاسی پێتڤی ڤەگەراندنا باوەریێ نە دناڤبەرا خو دا و ب ھیچ ئاوایەکێ نابیت حزب ببیتە ئارمانج , بەلکی فەرە حزب رێکەک بیت بو گەھشتن ب ئارمانجا گەلەکێ خوەدی خەبات و قوربانی و د ڤێ رەوشێ دا فەرە کارەک جدی بێتەکرن بو ئاسایی کرنەڤا رەوشا کەرکوکێ و دەڤەرێن رەسەنێن کوردستانێ و رەوشا نافخوی ژی بێتە باشکرن ژ ئالیێ ئابوری ڤە و بەردەوامی ب کاروانێ چاکسازیێ بێتە دان و ئیدی چ کەس و حزب نەبنە رێگر ھەمبەر بریارێن چاکسازیێ بو ھندێ باوەری دناڤبەرا خەلک و حکومەتێ دا بھێزتر بیت و ئیدی ئەو روژە بچن کو ب کورەتی بەرەڤانی ل کریارێن گەندەلەکێ بێنەکرن ژبەرکو ژ ڤێ پارتێ یە و فلان کەسە!! حکومەتا بھێز واتا بھێزکرنا سازیێن حکومەتێ و ڤەگەراندنا مافی بو خوەدی مافی و بنیاتنا ژێرخانا وەلاتی ژ ھەمی ئالیەکێ ڤە و نھا خەلک ژ چار تشتان زور بێزار بویە , ژ وانا پێش ئێخستنا حزبێ ل سەر پرسێن نەتەوەی و نیشتیمانی و تەنازول بو ئێک دی نەکرن و چون بەرەف بەغدا ل جھێ ھندێ بەرەف ئێک دیتر بچن , ھەروەسا بێزار بون ل داوی نەھاتنا رەوشا ئابوری یا بێزارکەر کو بویە ئەگەرێ راوەستاندنا کاروانێ ئاڤەدانیێ ب رێژەیەکا زور زور . ل جھەکێ دیتر ژی زێدەبونا کریارێن توندوتیژیێ و ریدانێن دلتەزین کو زوریا وان ڤەدگەرن بو کریزا دارایی و نەرونیا پاشەروژێ و بێ سەروبەری ل ھویێن ڤەگوھاستنێ د ھەرێمی دا , ژ خالێن ھەری گرنگ ئەوە کو کوردستانی چاڤەرێ دکەن ئەرێ پەیوەندیێن بەغدا و ھەولێرێ دێ ب چ ئاست گەھن ؟ ب دیتنا من گوھرینا رەوشێ و پارڤەبونا شیعە و سوننەیان کو خودێ بەرەکێ پاڤێتێ دبەرژەوەندیا کوردان دایە لێ یا جھێ داخێ ئەوە کورد ژی رکەبەریا وان دکەت ل ناکوکیان و زێدەتر ژی !.
خەلکی چ دڤێت ل حکومەتا ھەرێمێ و سەروکێ ھەرێمێ یێ داھاتی نێچیرڤان بارزانی ؟ کوردستانیان چار سالێن نەخوشی ل کریزا دارایی و شەرێ داعشێ و ناکوکیێن نافخوی و شەرێ دگەل بەغدا و ..تد. نھا چاڤەرێ دکەن کو پارتی و ئێکەتی وەک دوو ھێزێن مەزن کاربکەن بو دەربازکرنا ڤێ رەوشێ و پێک ئینانا حکومەتەکا بھێز کو بشێت بریارێن چارەنڤیس ساز بدەت, ل سەر ئاستێ سەروکاتیا ھەرێمێ ژی کەسێ بەربژێر بو ڤێ پوستێ چاڤەرێ دئێتەکرن ب شێت جارەک دن رەوشێ ئارام بکەت و پەیوەندیێن نافخوی و ئیراقی و ئیقلیمی و نێڤدەولەتی رێک پێخیتە ڤە ل چارچوڤەکێ نیشتیمانی دا و دیر ژ بەرژەوەندیێن کەسی و حزبی , کو ئەڤ چەندێ دێ بیتە فاکتەرەک بھێز بو مانەڤا کیانێ سیاسی یێ ھەرێما کورستانێ .