کەرکووک ئێک ژ وان باژێرێن کوردایە یێن پتریا پێکهاتەیێن ئیراقێ تێدا دژین و ب درێژیا مێژویێ هەولا عەرەب کرنا وێ هاتیە دان، هاتنا داعشێ و رەڤینا سوپایێ ئیراقێ ل دەڤەرێن کوردستانی و گەلەک دەڤەرێن ئیراقی ژی بوو ئەگەر کو کورد پاراستنا ئێمناهیا وان دەڤەرێن کوردستانی ب تایبەت کەرکووکێ بگرنە دەست، کورد شیان وێ پارچەیا ئیراقێ یاکو چاڤێ هەموو وەلاتێن جیران و داگیرکەر لسەر ب پارێزیت.
نوچەیێ پەقینان ل کەرکووکێ و شەهید بوون و برینداربوونا وەلاتیێن وێ ب هەموو پێکهاتەیان ڤە ل دەمێ دەستەلاتا ئیراقێ ل وی باژاری ببو نوچەیەکێ رۆژانە و رەڤاندن و کۆشتن و تالانکرن ژی ب بەردەوامی دهاتنە کرن. پشتی کوردان پاراستنا ئێمناهیا وی باژاری گرتیە دەست و تا رودانێن شازدەی ئۆکتوبەرێ ، کەرکووک ژ پەقینێن رۆژانە و تالان و کۆشتن و رەڤاندنێ یا پاراستی بوو، زمانێ کوردی ب سەربەستی ل قوتابخانەیان دهاتە خاندن، بزاڤا رەوشەنبیری ب تێکەلکرنێ دگەل باژارێن دی یێن هەرێمێ خورت ببو، سەرەرای هندێ کو ل دەوروبەرێن وێ مەزنترین پلانا هێرشکرنێ ژ لایێ داعشێ ڤە بۆ دهاتە دانان لێ کورد شیان وی باژاری ب هەموو پێکهاهەتە ڤە ب پارێزن و بزاڤێن ژیانێ ل وی باژێری بۆ ئێک رۆژ ژی نەهاتە راوەستاندن.
چ هاتە گهورین پشتی شازدەی ئۆکتوبەرێ؟
- ژ دەست دانا وی باژارێ ب دلێ کوردستانێ دهێتە نیاسین
- رێخوشکرن بۆ تەعریبکرنێ و ئاستەنگ درستکرن ل هەمبەر خاندنا زمانێ کوردی
- دوبارە سەرهلدانا شەرێ تایفی و زێدەبوونا پەقینان و دیاردا کوشتن و رەڤاندن و تالانکرنێ
- لاوازبوونا پیگەهێ کوردان ل وی باژاری و ژ دەستدانا پۆستێ پاریزگاری کو نها عەرەب و تورکمان پلانێ بۆ وەرگرتنا وی پۆستی ژ کوردان دکەن.
- لاوازبوونا جڤاتا پاریزگەها کەرکووکێ و ب ڤی رەنگی هەموو کارێن ئیداری پارێزگارێ سەپاندی یێ کەرکووکێ ل گورەی بەرژەوەندیێن خوە ب رێڤە دبەت
- ژ کارلادانا بەرپرسێن ئیداری یێن کورد ژ هەموو پۆستێن گرنگ یێن کو ئیستحقاقا کوردانە و برێڤەبرنا وان پۆستان ژ لایێ عەرەب و تورکمانان ڤە
- پشتگوهخستنا گەنجێن کورد ژ لایێ دامەزراندن و دیتنا دەلیڤەیێن کاری و گرنگی نەدان ب باوەرنامە و هێز و شیانێن وان
- رێخوشکرن بۆ نەتەوەیا عەرەب و تورکمان، بو جێبەجێکرنا ئەجندایێن خوە یێن داگیرکرنێ ب هەمی لایەکی ڤە
- بێبەهربوونا وەلاتیێن وی باژاری ژ خێر و بەرەکەتا پارەیێ پترودولاری
ل ڤێرێ جێوازیا دەستەلاتا کورد و عەرەبان دیار دبیت ل سەر کەرکووکێ، ئەوا هاتیە کرن ل سەر دەمێ حکومەرانیا هەولێرێ ل کەرکووکێ ڤەدگەریت بۆ وێ پلانا حکومەتا هەرێمێ بۆ پاراستنا وی باژاری دانای و وێ گرنگیا ب وی باژاری هاتیە دان، ئێکەتیێ ترس ژ وێ سەرەدەریا حکومەتا هەرێمێ هەبوو یا ل کەرکووکێ دکری بویە رێکا خیانەتێ ب باشترین درب بۆ حکومەتێ هەلبژارت لی د بەرامبەر دا فروتنا ناسنامەیا وی باژاری و وەلاتیێن کورد بو دەستکەفت بۆ خیانەتکارێن شادەی ئۆکتوبەرێ.