ئەگەرھەلسەنگاندنەکێلسەر حکومەتێن عێراقێ یێن ئێک لدوف ئێک و کابینێن حکومەتا ھەرێما کوردستانێ بکەین ھەر ل دەستپێکا ژناڤچونا رژێما بەعسا دکتاتور و ھەتا نھا ژی، دیار دبیت کو بدرێژاھیا ڤان سالێن دەربازبووی جوداھیەک ھەری مەزن دناڤبەرا ھەرێمێ و عێراقێ دا ھەبوویەژ روویێ سیاسی و ئابوری وئێمناھیێ ژی. ب دەربازبوونا عێراقێ بەرەف قوناغەکا نو و پشتی ھەماھەنگی و ھاریکاریا سەرکردێن کورد دگەل بەغدا بو ئاڤاکرنا عێراقەک نوو ئیدی دەلیڤەک ل بەردەم دەستھەلاتدار و سیاسەتمەدارێن ھەولێر و بەغدایێ ھاتە پێش کو دەست ب دامەزراندنا حکومەتەک بھێز و پری خزمەتگوزاری بکەن ب رێیا بەرقەرارکرنا دیموکراسیەت و ئێمناھیێ و ئەو دکتاتوریەت و نەدادپەروەریا رژێمێن بەرێ ل بیرا خەلکی ببەن و ببنە نموونەک سەرکەفتی ل روژھەلاتا ناڤین. ھەر ل سالا ٢٠٠٦ێ و پشتی ئێکگرتنا ھەردوو ئیدارێن ھەرێما کوردستانێ کابینا پێنجێ یا حکومەتا ھەرێما کوردستانێ ب سەروکاتیا نێچیرڤان بارزانی ھاتە دامەزراندن و قوناغا ئاڤەدانی و مکومکرنا ژێرخانێ ئابوری و پەیوەندیێن دبلوماسی دگەل وەلاتێن جیھانی دەستپێکر و ھەرێما کوردستانێببیتەپەناگەھەک ئارام بیت بو ھەمی تەخ و چین و نەتەوە و ئول ئایینان و نموونا پێکڤەژیانێ نیشا جیھانا دەرڤە بدەت. ئەڤەژی ئێک ل جوداھیێن مەزن بوون دگەل حکومەتا عێراقێ کو ھەر ژ دەستپێکا دامەزراندنێ نەئارامی و ئالوزی و شەرێ تائیفی لێ بەرھەم ھات و روژ بو روژێ بەرەڤـ وێرانیێ دچوو، ھەرچەندە کارتێکرن لسەر ھەرێما کوردستانێ ژی ھەبوو ژ ھەمی روویان ڤە لێ حکومەتا ھەرێمێ یا بەردەوام بوو لسەر کاروانێ پێشکەفتنێ. خالا گرنگ و بھێز لدەڤـ حکومەتا ھەرێمێ ژ مکومکرنا ژێرخانێ ئابوری و گرێدانا ھەڤبەندێن بازرگانی دگەل کومپانیێن ب ناڤـ ودەنگێن جیھانی دەستپێکر و بوو ئەگەرەک کو ھەژمارەکا بەرچاڤـ ژ وەلاتێن بیانی نونەراتیێن خوە ل ھەولێرا پایتەخت ڤەکەن و ببنە پرەک سەرەکی بو بەرەف پێش برنا پەیوەندیێن دبلوماسی و ئابوری دگەل ھەرێمێ. بەروڤاژی ڤێ چەندێ حکومەتێن عێراقێ ئابورێ وەلاتی تووشی شکەستنەکا مەزن کر و ھیچ پلانەک ستراتیژی و سەرکەفتی نەبوو بو بەرەف پێش برنا وەلاتی، و سەرباری وێ سەرکەفتنا ھەرێما کوردستانێ بدەستڤە ئینای ل جھێ کو دەستھەلاتدارێن عێراقێ دەستخوشیێ ل حکومەتا ھەرێمێ بکەن وەک بەشەکێ گرنگ ل عێراقا فدرال ل ھەمبەر وان پێشکەفتنێن بخوڤە دیتی ژ روویێ سیاسی و ئابوری وھەروەسا دبلوماسی ژی، لێ بمخابنیڤە ھەردەم دژبەریا ھەرێمێ دھاتەکرن و ھەرچەند گەلەک گھورین ل سەروکاتیا کابینێن حکومەتا عێراقێ روودان د سالێن بوری دا لێ ژبلی گھورینا سەروچاڤان چ نویاتیەک تێدا نەبوو ھەمان سیاسەت و ئایدولوژیەت ھەبوو. ھەروەسا ئارامیا ھەرێما کوردستانێ و پێکڤەژیانا ھەمی ئول و نەتەوان ببوو جھێ دلگرانیا بەشەک ژ سەرکردێن عێراقێ کو گەلەک جاران پێکول دکرن ھێرش بکەنە سەر ھەرێما کوردستانێ ب ھەر بھانەیەکێ بیت تنێ بو تێکدانا سەقامگیریا سیاسی و ئابوری. ل دەمێ سەرھلدانا بھارا عەرەبی ل ھند وەلاتێن دەردوور، دەلیڤەک بو نەحەزێن کوردان ھاتە پێش کو ھەرێمێ بەرەف کەنارێ نەئارامیێ ببەن ئەوژی ل بویەرێن ١٧ێ شواتا ٢٠١١ێ ھندەک لایەنێن سیاسی یێن ھەرێما کوردستانێ ب پەیرەوکرنا ئایدولوژیەت و پلانێن دوژمنێن کوردا پێکولا تێکدانا ئارامیا ھەرێمێ دا و خەون ب بھارا کوردی دبینی کو د راستیدا دا بیتە دوزەخ نەک بھار، ئەوژی ب ھێرشکرن و شەوتاندنادام و دەزگەھێن حزبی،لێ حکومەتا ھەرێمێ رێ ل ڤێ چەندێ ژی گرت و نەھێلا کاروانێ دیموکراسیێ براوەستیت.
ئەگەر زێدەتر ل سەر بویەرێن چار سالێن داویێ ب راوەستین، خویایە کو ئەزموونا دیموکراسی و دبلوماسی ل ھەرێمێ و عێراقێ ژی کەفتە بەر چەند ھەڤراز و نشێڤیان و ھەرجار ھەڤسەنگیا ھێزێ د گھورینێ دا بوو ھەر ژ دەرکەفتنا گروپێ تیرورستیێ داعش کو ئەوژی ژ ئەنجامێ سیاسەتێن شاشێن سەرکردە و دەستھەلاتدارێن بەغدایێ بوو کو چەندین جارا سەرکردێن کوردستانێ بەغدا لێ ھایدارکربوو، و نزمبوونا بھایێ پەترولێ و کارتێکرنا وێ ل سەر عێراقێ و ھەرێمێ ھەروەسا برینا بەشە بودجا ھەرێما کوردستانێ ژ لایێ بەغدائەڤە ھەمی ئەگەر بوون حکومرانیا ھەرێمێ بکەفتە بەر ئەزموونەکا مەزن.لێ پشتی کێمبوونا گەفێن گروپێ تیرورستیێ داعش و سەرکەفتنا مەزنا پێشمەرگێ کوردستانێ ب سەرپەرشتیا راستەراستا سەروک بارزانی حکومەتا عێراقێ ب سەروکاتیا عەبادی ل بەھانەیک دی دگەریا ھێرشی سەر دەڤەرێن ھەرێمێ بکەت و ھەردەم ل کونگرێن روژنامەڤانی و سوشیال میدیایێ دا گەفێن بکارئینانا ھێزێ ل ھەرێما کوردستانێ دکرن.دئەنجامدا و پشتی بویەرێن ١٦ێ ئوکتوبەرێ و گرتنا فروکخانەیێن نێڤدەولەتی یێن ھەرێمێ و سزادانا ھەرێمێ ژ لایێ ئابوری ڤە ھێرشی سەر ھەرێما کوردستانێ کرن، لێ جارەکا دی پێشمەرگێ کوردستانێ داستانەک دیروکی تومارکر و ھەمی ھێزێن عێراق وھەڤپەیمانێن وان ژناڤـ برن و جارەکا دی ھەڤسەنگیا ھێزێ بو ھەرێما کوردستانێ زڤری. وئارامی و لێزانین ودبلوماسیەتا سەروک وەزیر نێچیرڤان بارزانی رێ نەدا دیموکراسی و ئاشتی وپێکڤەژیانا کوردستانێ ژناف بچیت وبەرووڤاژی سەرکردێن بەغدا ھەردەم زمانێ دانوستاندن و ئاشتی و ئارامیێ بکارئینا و بوو ئەگەرەک سەرەکی کو وەلاتێن زلھێزێن جیھانی بەغدا نەچاربکەن دەست ل گەفێن سەربازی بەردەن و بکەڤنە دان وستاندنێ دگەل حکومەتا ھەرێما کوردستانێ.
ئەڤە و چەندین بویەرێن دی خویا دکەن کو جوداھیەک مەزن دناڤبەرا پروسا دیموکراسی ل ھەرێما کوردستانێ و عێراقێ ھەیە وکەسایەتی ودبلوماسیەتا سەرکردێن ھەرێما کوردستانێ مینا سەروک بارزانی و سەروک وەزیر نێچیرڤان بارزانی باندوورەک ھەری مەزن ل سەرمانەڤا قەوارێ ھەرێما کوردستانێ بھێزی ھەبوویە وبەرھەمێ دبلوماسیەتا سەرکەفتی دیاربوو، لەورا ئەڤرو دبینین بەرپرسیارەتیەکا مەزنتر ب نێچیرڤان بارزانی ھاتیە راسپاردن ئەوژی سەروکاتیا ھەرێمێ، جودا ژ سەرکردێن بەغدا یێن کو ھەردەم دژبەریا ھەرێما کوردستانێ دکر و نھا بێ دەستھەلات و بێ بریار ماینە و سزایی گەفێن خوە یێن بێ بنەما وەردگرن.