د هەلبژارتنێن ڤێ جارێ یێن پەرلەمانێ هەرێما کوردستانێ دا " کوردستانەکا ب هێز" ببو دروشمێ پارتی ژ بۆ هەلبژارتنان و ب دەست ڤەئینانا باوەریا وەلاتیان وکۆمکرنا دەنگان، ئەڤ دروشمە پشتی چار سالێن گران هات و پشتی چارسالێن بەردەوام قەیران و ئالوزی و شەر ب سەر هەرێمێ دا هاتین و پتریا پارتێن بەژدار د حکومەتێ دا د رۆژێن دوماهیێ یێن ژیێ حکومەتێ خوە ڤەکێشا و بارێ گران هێلا ل سەر ملێن سەرۆکوەزیران نێچیرڤان بارزانی د دەمەکی دا پشتی دەست ژ کارکێشانا سەرۆکێ هەرێمێ ژ پتریا دەستەلاتێن سەرۆکێ هەرێمێ ژی کەتبوونە سەر ملێن سەرۆکوەزیران ئانکو کارێ وی نەب تنێ رزگارکرنا حکومەتا وی بوو و خزمەتکرنا وەلاتیان بەلکو پاراستنا کوردستانێ ژی ژ هەمی روویەکی ڤە کەتبوو سەر ملێن وی.
ل دەمێ بانگەشەیا هەلبژارتنان دەستپێکری " کوردستانەکا ب هێز " بو دروشمێ پارتی، ئەڤ دروشمە گەلەک هاتە رەخنەکرن ژ لایێ پارتان ڤە و دیسان لایەنگرێن پارتێن دژاتیا پارتی دکەن و هەولێن شکاندنا وێ دکر، لێ گەر سەحکەینێ ب ڤی دروشمی پارتی شیا پتریا کورسیێن پەرلەمانی ب دەست خوڤەبینیت ئەڤەژی ئەگەرەکێ ئاشکرایە کو وەلاتیان باوەری ب هندێ هەبوو پشتی وێ سەختیا د سەر هەرێمێ دا هاتی، تاکە پارتا بشێت کوردستانێ ب پارێزێن ب وان دەستکەفتێن بەری نها بدەستڤە ئیناین و بشێت خزمەتا وەلاتیان بکەت ژ لایێ دابینکرنا گرنگترین مافێن وان یێن دەستپێکی و خزمەتگوزاریان ب تنێ پارتیە. ئەڤ باوەریا خەلکی ژ کیڤە هات بو پارتی و چەوا شیان ڤی دروشمی بکەنە مینبەرا خوە یا باوەریێ؟ بێ گومان دەمێ د روژێن گران دا و کوردستان ل سەر لیڤێن کەتنێ داگیرکرن و دورپێچێن ژلایێ بەغدا ڤە پشتی شازدەی ئۆکتوبەرێ ژ لایێ بەغدا ڤە کەتینە سەر هەرێمێ دباوەرا چ خودان رحەکی دا نەبوو کوردستان وەک جاران ڤەگەریت هەم ژ لایێ ئابوری هەم ژ لایێ دوپلۆماسی و هەم ژ لایێ قەوارەیێ وێ یێ سیاسی. لێ بەروڤاژی بوچوونێن ناڤخویی و جیهانی سەرۆکوەزیران دەست نەداهێلا و شیا ب سیاسەتا خوە یا نەرم سەرەدەریێ دگەل کاودانان دا بکەت و کوردستانێ ب پارێزیت ژ دوژمێن ناڤخو و دەرەکی، ئەڤەژی بو ئەگەر کو پتریا وەلاتێن زلهێز پشتەڤانیا سەرۆکوەزیران بکەن و دوپاتیێ ل هەلوەستێ وی یێ سەرکەفتی بکەن، پتریا رۆژنامەیێن جیهانی سەرکەفتنا نێچێرڤان بارزانی د سەخترین کاودانێن وەلات تێدا دەرباز بووی ب موعجیزە ب ناڤدکر، ئەڤە هەمی ئەگەر بوون وەلاتیێن هەرێمێ پشتەڤانیێ ل دروشمێ کوردستانەا بهێز بکەن و دوبارە پارتا خوە بکەنە پارتا هەری سەرکەفتی ل هەرێمێ.
کاندیدکرنا نێچێرڤان بارزانی بۆ سەرۆکاتیا هەرێمێ هیڤیەکا دی بو وەلاتیێن هەرێمێ چێکریە کو وەرگرتنا پۆستێ سەرۆکاتیێ دێ ئاڤەدانیەکا زێدەتر پەیداکەت و پێگەهێ هەرێمێ ژ لایێ نێڤدەولەتی ڤە بهێزتر لێکەت و زێدەتر چاڤێ کۆمپانیێ بیانی یێن مەزن بۆ هەرێمێ کێشیت، ب ڤی رەنگی دروشمێ کوردستانەکا ب هێز یێ د چیتە د وارێ بجهئینانێ دا.