وه‌كو ئه‌ڤرۆ پێش ساله‌كێ په‌له‌كا سۆر گه‌شبوو و به‌ره به‌ره ب بایه‌كێ سار ڤه‌مری ئه‌م گه‌هاندینه كنارێ ئێمن و ئه‌و مه‌ترسیا هندا مه‌زن ب سه‌ر مه‌دا رابری، ل ده‌مه‌كی كو چو لایه‌نێن نیڤده‌ولی ژی ل مه نه‌بوو خوه‌دان ژبلی پێشمه‌رگه‌ی و سیاسه‌تا كه‌سێ نێچیرڤان بارزانی سه‌رۆك وه‌زیرێن حوكمه‌تا هه‌رێما كوردستانێ به‌رسنگێ ڤان زلهێزان گرت و ب راسپارده‌كرنا پارتی و سه‌رۆكێ بارزانی، پاپۆرا مه ژ نقۆمبوونه‌كا مسۆگه‌ر قورتال كر، ژ به‌ر كو ئه‌و ژه‌هرا براخیانه‌تیێ هندا تیژبوو، باندۆره‌كا ب هێز ل سه‌ر مله‌ت و حوكمه‌ت و پێشمه‌رگه‌ی كر، هه‌لبه‌ت ب وان شیانێن ماندی و هه‌ستا شكه‌ستی و سه‌نگه‌رێن نوو و نه‌به‌رهه‌ڤ ئه‌م شیاین ل پردێ و سحێلا هه‌ڤسه‌نگیه‌كا ب ئیراده راببینه‌ڤه سه‌ر پێن خوه، و ژ لایێ دی ڤه نێچیرڤان بارزانی ملێ خوه دا به‌ر وان بزاڤێن دبلۆماسی كو حه‌تا ئه‌ڤ ده‌وله‌ته رازی دكر یێ دیتر سل دبوو، حه‌تا ئه‌ڤ قانع دكر حزبا دی تۆره دبوو، كه‌س نه‌بوو هه‌ڤال د وێ به‌رته‌نگیێ دا، به‌لێ بیرا م باش هات پارسال وه‌كو ئیرۆ ئێكه‌م مێڤانداری بۆ كۆچكا ئیلیزێ و سه‌ره‌دانا فره‌نسا كربوو، كو ب گه‌رمی ڤه پێشوازی لێ هاته كرن، ئها ئه‌و بوو ئێكه‌مین چریسكا شۆره‌شا ئاشتیانه یا په‌یوه‌ندیێن دیبلۆماسی یێن نێچیرڤان بارزانی كو بچیته نێچیرا دیبلۆماسیه‌تێ و ده‌سكه‌فتێن باش بده‌ستڤه بینیت، ده‌سپێكه‌ك بوو ژ بۆ بدووماهیئینانا هه‌موو قه‌یران و فشار و بێنته‌نگیێن ل سه‌ر حوكمه‌ت و ملله‌تێ مه‌یێ هه‌ژار وبه‌لنگاز، ئێدی ئه‌و هه‌روه‌كو سه‌رێ وه‌ریسه‌كی لێهات و كاك نێچیرڤان ڤیرا چوو رۆژ بۆرۆژ گه‌شتر لێهاتن ئه‌و په‌یوه‌ندی و حه‌تا كو مه دیتی ئه‌و په‌یوه‌ندی ژ كه‌سێ وی كره كارێزمایه‌كێ خودان بنیات ناڤ چراكێ هیڤی و ئۆمێدێن گه‌لێ كورد دا. ئه‌و قه‌یرانا ئابووری و سه‌ربازی یا مه‌زن شیا بشكێنیت و ئه‌ڤرۆ گه‌هانده وی راده‌یی كو به‌غدا ب خوه یا دانپێدانێ ب مافێ پێشمه‌رگه‌ی دكه‌ت .. ئه‌رێ ما ساله‌ك كێم نینه بۆ ڤان بۆیه‌رین دژوار و دراماتیكی یێن ئێك ل دووڤ ئێكێ ب سه‌ر مه‌دا دهاتن؟!. باشه بۆچی ئه‌م ڤێ حنێرا هندا مه‌زن ژبیرا خوه ببه‌ین و بیر لێ نه‌كه‌ینه‌ڤه، ئه‌رێ ئه‌و چو حوكمه‌ته دێ كاریت خوه ل به‌ر ڤان مه‌زنه هه‌رشه‌یێن ژ ڤی جۆری قورتال كه‌ت؟! مینا ئه‌وا ب سه‌رێ سه‌دام هاتی چو لێهات ل داویا چاره‌نڤیسێ خوه، یان به‌شار ئه‌سه‌د چه‌ندین سالان نه دشیا پێی خوه ژ دیمه‌شق بهاڤێژیت، ببوور پارێزگارێ دیمه‌شقێ بۆ نموونه.. هه‌كه حوكمه‌تا هه‌رێمێ باوه‌ریی ب راستیا دۆزا خوه نه‌با، هه‌كه یا سته‌مكار با ما دێ كاریت هۆسا ب گیانێ ریسك و بێمنه‌ت سه‌ربه‌رز قه‌ستا جیهانی و مه‌حافلێن ده‌ولی كه‌ت؟! هه‌كه نێچیرڤان بارزانی ب وی گیانێ پێشمه‌رگاتی نه‌با دا چاوا هۆسا سه‌رێ خوه‌به‌رزكه‌ت و ب مافێ چاره‌نڤیس خۆریت! هه‌كه خوه‌دیێ تنێ ژ مالباتا خوه یێ سێ هزار شه‌هیدان نه‌با، دا ئه‌وێ مۆرالا گه‌رم و گۆر ژ كیڤه ئینیت؟!.. ئها ئه‌ڤه‌یه ستراتیژیه‌تا خوه‌قورتالكرن ژ هه‌می هه‌ره‌شه و ململانێن سیاسی.
شێرزاد نایف
