پشتی سالا ١٩٩١ هەرێما کوردستانێ دگەلەک کاودانێن خوش و نەخوش دا دەربازبوویە، لێ ژ هەمیان دژوارتر کاودانێن پشتی رێفراندوما هەرێما کوردستانێ بوون و زەحمەترین دەم بو ژ بۆ حکومەتا هەرێمێ ب سەرکێشیا نێچیرڤان بارزانی.
پەیدابوونا گەلەک پارتان بناڤێ ئۆپوزسیون گەلەک کارتێکرن ل رەوشا ناڤخویا هەرێما کوردستانێ کریە، ژبەرکو وان ب چ رەنگان نەشیایە ب وێ باوەرێ کاربکەن یا وان سوز بوو دای بەلکو ب تنێ بو دژاتیا پارتی هاتینە دامەزراندن و نەشیاینە باوەریێ ب دەنە خەلکی کو ژ بۆ مافێن وان کاردکەت و ئەڤ چەندە وان ب کریار سەلماند. د حکومەتا بووری دا ب سەرکێشیا نێچیرڤان بارزانی هەموو پارت بەژدار بوون و ژ ئستیحقاقا خوە پتر وەرگرت و هەر ل دەستپێکێ وان پارتان دژاتیا خوە بۆ حکومەتا نێچیرڤان بارزانی دیاردکر و هەولێن ژناڤبرنا وێ دکرن، جهێ داخێ بوو هەرێما کوردستانێ ژ هەمی لایەکی ڤە رەوشا وێ تێکچو، سیاسی، ئابوری، ئێمناهی تا دوماهیکێ، رێفراندوما سەرخوەبوونا هەرێمێ ژی بو ئەگەرەکێ دی ئەو پارت ب هاریکاریا دوژمنێن جیران دورپێچێن ل سەر هەولێرێ خورتبکەن. د وی دەمی دا کو هەمیان دگوت تشتەک نەمایە ب ناڤێ هەرێما کوردستانێ، نێچیرڤان بارزانی ب سیاسەتا خوە یا دانوستاندن و دوپاتیکرن ل چارەکرنا کێشەیان بێ شەر شیا دورپێچا دوپلۆماسی بشکینیت و پشتەڤانیا نێڤدەولەتی ژ وەلاتێ فرەنسا دەستپێکر بدەستڤە بینیت و حکومەتا حەیدەر عەبادی بێی مەرجێن وی بجهبینیت بینیتە سەر مێزا دانوستاندنان، ژ لایەکی ڤە هەولێن راکرنا وان دورپێچان ددا، ژ لایەکی ڤە بزاڤێن باشکرنا رەوشا ئابوری یا هەرێمێ ددا، ژ لایەکی ڤە هەول بۆ ئاشتکرنا پارتێن ناڤخوە و پاراستنا ئێکرێزیا ناڤمالا کوردی ددا، ژ لایەکێ دیڤە دوپاتی ل دەستڤەئینانا مافێن دەستوری یێن هەرێمێ دکر د چارچوڤێ ئیراقێ دا، ئەڤە هەمی بوونە ئەگەرێن بەرچاڤ بو سەرکەفتنا حکومەتا ڤی مرۆڤی د دەمەکی دا پتریا پارتان د سەخترین رۆژێن حکومەتێ دا خوە ڤەکێشا، ڤێ چەندێ وەکر ناڤێ کەساتیا نێچیرڤان بارزانی ل سەرانسەری جیهانێ ژ جاران کاریگەرتر دیار بیت، لەورا د نهادا پارتا سەرکەفتی پارتی دیموکراتی کوردستان نێچێرڤان بارزانی ب کاندیدێ خوە ژ بۆ پێکئینان حکومەتا نوو یا هەرێمێ د دەتە زانین، پتریا چاڤدێران ژی نێچێرڤان بارزانی ژ بۆ وی پۆستی د دەمێ نهادا ب باشترین د دەنە زانین.
د نهادا هەموو ل بەندا سەرەدانا کاندیدێ پارتینە ژ بۆ لایەنێن سیاسی بۆ پێکئینانا حکومەتا نوو د دەمەکی دا پتریا وەلاتیان و دیسان چاڤدێرێن سیاسی حکومەتا زورینە بۆ قوناغا نها ب باشتر دزانن لێ ئەڤە وێ چەندێ ناگەهینیت کو پارتی ب سەرکێشیا نێچیرڤان بارزانی بەحسا سەرەدانا لایەنێن سیاسی نەکەت بەلکو وان بریار دایە سەرەدانا هەموو لایەنان بکەن د دەمەکی دا تا نها ب تنێ ئێکگرتوویا ئیسلامی و نەوەی نووێ ئۆپۆزسیون بوونا خوە راگەهاندیە، ئەڤەژی ئەگەرەکێ بەرچاڤە کو پارتێن مایی چاڤ ل سەرەدانا نێچێرڤان بارزانی یە بو دەف وان لایەنان.
حکومەتا نوو ب سەرکێشیا نێچیرڤان بارزانی دێ دەرگەهەکێ نوو ل هەمبەر ئارامی و باشترکرنا ئابورا وەلاتی و پتر گرنگیدان ب پرۆژەیێن خزمەتگوزاری ل هەمبەر وەلاتیان ڤەکەت، گەر حکومەتا نوو دەرگەهی ل هەمبەر شیانێن گەنجان ژی ڤەکەت دێ سەرکەفتیترین حکومەت بیت د مێژوویا حکومرانیا هەرێمێ دا.