نزیكى سه‌د سالانه كه‌ركووك خوه‌دان په‌ترۆله و په‌ترۆلێ وێ ژبۆ بازارێن جیهانێ دچیت، لێ د دیرۆكا ده‌رخستنا په‌ترۆلا كه‌ركووكێ هیچ به‌هایه‌ك ژ بۆ كه‌ركووكێ و خه‌لكێ وێ د داهات و خێرێن كه‌ركووكێ نه‌هاتیه دان، ئانكو هه‌موو ده‌مان به‌غدا سه‌نته‌رێ وه‌رگرتنا خێر و بێرێن كه‌ركووكێ بوویه و خه‌لكێ كه‌ركووكێ ژى ل ژێر وێ دووكه‌لێ و بهێنا گازێ نه‌بووینه خوه‌دان تایبه‌تمه‌ندییه‌ك كو جووداتر ژ خه‌لكێ ئیراقێ سه‌ره‌دره‌ى ل گه‌ل وان بهێته كرن، د هه‌موو ڤان سالێن ده‌رخستنا په‌ترۆلێ ل كه‌ركووكێ ب ته‌نێ سێ سالان حكوومه‌تا هه‌رێما كوردستانێ بوویه فرۆشیارێ وێ په‌ترۆلێ و د ڤان سێ سالان دا ئه‌و كارێ حكومه‌تا هه‌رێما كوردستانێ ژ بۆ كه‌ركووكێ كرى، ئه‌گه‌ر كێم ژى بیت، لێ هیچ ده‌مه‌كى د دیرۆكێ ئیراقێ دا ئه‌و ژ بۆ كه‌ركووكێ نه‌هاتیه كرن، چونكى نیچیرڤان بارزانى سه‌رۆكێ حكومه‌تا هه‌رێمێ ب سیسته‌مێ پترۆ دۆلارى سه‌ره‌دره‌ى ل گه‌ل ئیداره‌یا كه‌ركووكێ كر و مه‌هانه ژ داهاتێ په‌ترۆلا كه‌ركووكێ 10 ملیۆن دۆلار ژ بۆ پارێزگه‌ها كه‌ركووكێ دهاتن مه‌زاختن، ئه‌و كوژمه ژى ژ بۆ خزمه‌تگۆزارى و دامه‌زراندنا خه‌لكێ كه‌ركووكێ بوو د كه‌رتێن حكومى دا، كه‌واته ل ده‌مێ ده‌رخستنا ئێكه‌م بیرا په‌ترۆلێ ل بابه‌گور گور سالا 1927 و هه‌تا نها خه‌لكێ كه‌ركووكێ ل پێش چاڤێن خوه ب ته‌نێ دووكێل و تانكه‌رێن ڤه‌گۆهستانا په‌ترۆل و به‌رهه‌مێن ژێر زه‌ڤیا خوه دبینن، لێ سێ سالێن ده‌ستهه‌لاتداریا حكومه‌تا هه‌رێمێ ل كه‌ركووكێ كو پشتى هاتنا داعشێ ده‌ستپێكر هه‌تا روودانێن 16ى ئكتۆبه‌را سالا 2017 به‌رده‌وام، وه‌رچه‌رخانه‌ك ل وێ پارێزگه‌هێ دروست كر، چوونكى كوژمه‌یێ پترۆدۆلار وه‌كو ڤه‌ژینه‌ك بوو ژ بۆ خه‌لك و ئیداریا كه‌ركووكێ، له‌ورا ئه‌گه‌ر خیانه‌تا 16 ئكتۆبه‌رێ ژبۆ ئیراقیێن سیاسه‌تڤان كریاره‌كێ نشتیمانى بیت و سیاسه‌تڤانێن عه‌ره‌ب یێن كه‌ركووكێ چه‌ند په‌سنا گروپا خیانه‌تا 16 ئكتۆبه‌رێ بكه‌ن، لێ خه‌لكێ ئاسایى و بێ ده‌ستهه‌لاتێن عه‌ره‌ب و توركمان و كوردێن كه‌ركووكێ باش دزانن دناڤبه‌را سالێن 2014 هه‌تا شازده‌ى ئكتۆبه‌را 2017 حكومه‌تا هه‌رێمێ ژ روویێ ئابووریڤه چ تایبه‌تمه‌ندییه‌ك دایه وان، كه‌واته نه ب ته‌نێ كوردان كه‌ركووك ژ ده‌ست دا، به‌لكو هه‌ژار و بێ ده‌ستهه‌لاتێن توركمان و عه‌ره‌بان نها باش هه‌ست ب ژ ده‌ستدانا كه‌ركووكێ دكه‌ن، له‌ورا ئه‌گه‌ر د هزرا مندا ئه‌و گرووپ چ خیانه‌ته‌ك كربیت، نها د هزرا غه‌یره كوردێن كه‌ركووكێ ژى خیانه‌ته‌ك مه‌زتربوویه، چونكى ئێكسه‌ر زیان ب ژیارا وان كه‌فت و ئه‌و 10 ملیۆن دۆلارێن حكومه‌تا هه‌رێما كوردستانێ مه‌هانه ژ داهاتێ په‌ترۆلێ ژ بۆ كه‌ركووكێ ره‌وانه دكر، ئیدى ل شازده‌ى ئكتۆبه‌را 2017 هاته برین و جارده‌ن ده‌ستهه‌لاتداریا به‌غدایێ بوویه‌ڤه حاكمێ وێ پارێزگه‌هێ. ئیدى پێدڤى ناكه‌ت بۆ كه‌ركووكیه‌كێ رووهن بكه‌ى نێچیرڤان بارزانى كورده و ژ فلان پارت و باژارى یه، به‌لكو ئه‌و گرنگیا د بیاڤێ ئابوورى دا د سێ سالێن ژ بۆ كه‌ركووكێ هاتیه كرن بخوه ل ده‌ف وان بوویه شاهدحال، باشتریبن به‌لگه‌ژى ئه‌وه چما خه‌لكێ كه‌ركووكێ ل گه‌ل بانگه‌وازا جوودانێ ژ ئیراقێ بوون؟
کارزان فەقێ
