پشتی راگەھاندنا ئەنجامێن ھەلبژارتنێن پەرلەمانێ کوردستانێ و دیاربوونا سەنگ و ھێزا جەماوەری یا ھەر پارتەکێ. دھێتە پێشبینی کرن کو رێزدار نێچیرڤان بارزانی سەروکێ حکومەتا ھەرێما کوردستانێ بھێتە راسپاردن ژ لایێ جەنابێ سەروک مسعود بارزانی و حزبا پارتی دیموکراتی کوردستان بو پێکئینانا کابینا پێنجێ یا حکومەتا ھەرێما کوردستانێ. ئەگەربپرسین ئەرێ بوچی کابینا پێنجێ ژی یا حکومەتا ھەرێمێ ھەر ب سەروکاتیا نێچیرڤان بارزانی بیت؟ گەلەک بەرسڤ ھەنە و راسپاردنا جەنابێ وی ژ بەر چەند ئەگەرێن دیار و راستیێن حاشا ھەلنەگرە.
یا خویایە کو کابینا چارێ یا حکومەتێ زەحمەتترین کابینە بوو ژ بەر بارگرانی و کاودانێن دژوار یێن ب سەر ھەرێما کوردستانێ دا ھاتین، لێ د ھەمان دەمدا سەرکەفتیترین کابینە بوو ب سەرکردایەتیا نێچیرڤان بارزانی کو ب شەھرەزایی و دبلوماسیەت و کەسایەتیا خو و ب دانپێدانا نافخویی و نێڤدەولەتی شیا ھەڤسەنگیەکێ دروست بکەتل دەمێ برینا بودجا ھەرێما کوردستانێ ژ لایێ دەستھەلاتدارێن عیراقێ ونزمبوونا بھایێ نەفتێ ل بازارێن جیھانێ و سەرھەلدانا قەیرانا ئابوری و ھێرشا درندانە یا تیرورستێن داعش بو دەڤەرێن ھەرێما کوردستانێ و ھەرێمێ ژ مەزنترین شکەستنێ قورتال بکەت ب تایبەتی ل دوو سالێن دووماھیێ دا.
ھەروەسا ئێک ژ دەستکەفتێن دی یێن سەروکێ حکومەتێ کو ھەر کوردەک شانازیێ پێ دکەت و د دیروکێدا ھاتە تومارکرن ئەوبوو ل پشتی ئەنجامدانا ریفراندومێ و خیانەتا ١٦ێ ئوکتوبەرێ کو گەلەک کەس و لایەنێن نافخویی و دەرەکی چاڤەرێی ژ ناڤچوونا قەوارێ ھەرێما کوردستانێ بوون و سەرکردێن چەند حزبێن دیارێن کوردستانێ ھەر روژ ب رێکا بەغدا ڤە بوون بو پشتەڤانی کرنا ھەلویستێن دکتاتوری یێن دەستھەلاتدارێن بەغدا و ب پارێزگەھکرنا ھەرێما کوردستانێ.لێ ھێژا نێچیرڤان بارزانی ب ئارامی و ب حوکمێ شەھرەزایی و پەیوەندیێن خو یێن دبلوماسی شیا قەوارێ ھەرێما کوردستانێ بپارێزیت و ھەرێمێ بەرەف کەنارەکێ ئارام ببەت.ھەروەسا د ناڤـ ئاستێ حزبێ دا دەستکەفتا ھەرە مەزن ئەوبوو کو د ھەردوو ھەلبژارتنێن پەرلەمانێ کوردستانێ و عێراقێ دا حزبا پارتی رێزا ئێکێ ب دەست خوڤە ئینا ل سەر ئاستێ عێراق و ھەرێما کوردستانێ، کو ھێژا نێچیرڤان بارزانی روولەکێ سەرەکی و کاریگەر د زێدەبوونا دەنگێن پارتی دا ھەبوون.
شەھرەزایی و سەرکەفتنا سیاسەتا نێچیرڤان بارزانی ھندەک کەس و لایەن دلتەنگ کرینە کو ئەڤە بو دەمێ چەند روژانە ل ھندەک کەنال و سایت و تورێن جڤاکی یێن سەر ب وان لایەنان ڤە ل سەر رادەست کرنا دەستھەلاتێ رەخنێ لێ دگرن و بەراوردا ھەرێما کوردستانێ دگەل عێراقێ دکەن ل دوور ڤی بابەتی. لێ ل دوماھیێ دێ بێژین ھەر ئەو سەرکردێن عێراقێ و ھەڤپەیمانێن وان بوون داخازا خو بەربژێرکرنا نێچیرڤان بارزانی دکر کو ببیتە سەروک کومارێ عیراقێ، ئەوژی ژ بەر سیاسەت و دبلوماسیەتا وی یا بھێز.
ئەڤە و چەندین دەستکەفتێن دیتر دبنە ئەگەرێن سەرەکی کو نە بتنێ ژ لایێ سەروک بارزانی و حزبا پارتی دیموکراتی کوردستان ڤە بھێتە راسپاردن لێ ل دەف حزبێن دی ژی نێچیرڤان بارزانی ئەو کەسە کو د ڤی دەمیدا یێ ژ ھەژی سەروکایەتی کرنا کابینا پێنجێ یا حکومەتا ھەرێما کوردستانێ بیت و چ بەدیل نەبن بو ڤی پوستی.
بەھروز زێباری