دوای ریفراندۆم و ٩٣% دەنگی خەڵکی کوردستان بەڵێ بۆ سەربەخۆیی کوردستان، باڵە عێراقچیەکەی ناو یەکێتی وەک وڵامدانەوەی دەنگ و بڕیاری خەڵک حەشدبوونی خۆیان راگەیاند و لە خیانەتێکی بێ وێنەدا کەرکوکیان وەک هێلکەی پاککراو رادەستی حەشدی شەعبی و سوپای عێراق کرد، دوای ئەوە بزووتنەوەى گۆڕان و کۆمەڵ و یەکگرتووی ئیسلامی کورد گوتەنی دەستیان لە کراسی کوردایەتی دەرهێنان، لەبەر ئەوەی بڕوایان بە کوردبوون و کوردایەتی لەق بوو، پێیان وابوو کۆتایی بە حکوموتی هەرێم هاتووە و لەمەودوا شتێک نامێنێ بەناوی حکومەتی هەرێمی کوردستان و حەشد و سوپای عێراق تەواوی کوردستان داگیر دەکەنەوە, جا بۆ ئەوەی لە بەغدا شوێن و پێگەی حزبییان بۆ دابنرێ و بەرژەوەندیە کەسی و حزبییەکانیان نەکەونە ژێر هەرەشە و مەترسی لەناوچوون، لە حکومەت کشانەوە و دژایەتی کردنی حکومەتیان لە جاران تۆختر کرد، دوایی بەرهەم ساڵحشیان هاتە پاڵ و کەوتنە راکەراک بەرەو بەغدا، بەوەشەوە نەوەستان بۆ بەدەسهێنانی رەزامەندی بەغدا بەرەی (ئینقاز)یان پێکهێنا و داوای هەڵوەشانەوەی حکومەتی هەرێم و پێکهێنانی حکومەتی (ئینقاز)یان دەکرد.
کشانەوەی ئەو لایەنانە لە حکومەتی هەرێم لەو قۆناغە هەستیارەدا، جیا لەوەی راکردن بوو لە بەرپرسیارێتی نەتەوەیی و نیشتیمانى، پشتیوانیش بوو لە هەوڵەکانی دوژمنان بۆ لە قالبدانی حکومەتی هەریم و دەستکەوتەکانی کورد لە مەنگەنەی داگیرکاری خۆیاندا، بەڵام پارتی وەک پیشەی هەمیشەیی خۆی شانی دایە بەر ئەرکە نەتەوەیی و نیشتیمانیەکان و خەونی پێکهێنانی حکومەتی ئینقازی ئەوان و خواستی دوژمنانی بۆ نەهێشتنی حکومەتی هەرێم پووچەڵ کردەوە.
ئێستا کە پارتی ئەو قۆناغە هەستیارەی بە سەرکەوتوویی تێپەڕاند و حکومەتی هەرێمی پاراست و ریفرادۆمی کردە تاپۆ و لە هەڵبژاردنیش ئەو سەرکەوتنە گەورەیەی بەدەستهێنا، ئەوانەی دوێنێ لە نائومێدیدا تەنها لە خەمی مانەوەی خۆیاندا بوون و بۆ ئەو مەبەستەش لە بەغدا سەرەیان دەگرت و حکومەتی هەرێم و رەنج و خوێنی شەهیدان و دەستکەوتەکانی کوردیان بە بەرژەوەندی خۆیان و ناردنی مووچەی سلێمانی و دەوروبەری دەگۆڕیەوە، دەیانەوێ بێنەوە ناو ئەو حکومەتەی کە خۆیان لە رێگای ئاژاوەگێڕیەکانی سەر شەقام و پێکهێنانی حکومەتی ئینقازەوە کاریان بۆ رووحاندنی دەکرد, بەوەش ئەو لایەنانە بیانەوێ و نەیانەوێ پەردە لەسەر بچووکی خۆیان و گەورەیی پارتی لادەدەن و ددان بە شکستەکانی خۆیان و سەرکەوتنەکانی پارتیشدا دەنێن.