دەبێ پارتی کەڵک لە رابردوو وەربگرێ بۆ بەشداری لایەنەکان لە کابینەی داهاتوو ئەو مەرجانەی خوارەوەی هەبن:ــ
١ــ نابێ رێگا بدات لایەنەکانی بەشدار بوو لە کابینەی داهاتوو لە نێوان هەولێر و بەغدا گەمەی دەستکەوتی حزبی بکەن.
٢ــ نابێ هاوڕێی نیوەرێگابن و کەی ویستیان بڵێن: ئێمە حکومەتی (ئینقاز)مان دەوێ، پارتی ئێمە رۆیشتین و تۆش چی دەکەی بیکە.
٣ــ نابێ لە حکومەت بن و لە شەقامیش بڵێن: حکومەت شکستی خواردووە و (ارحل).
٤ــ نابێ خۆیان بە خاوەنی سەرکەوتنەکان بزان و دەهۆڵیش بۆ شکستەکان بکوتن.
٥ــ نابێ چیتر رێگە بدرێت پەرلەمان لە شوێنی یاسا دانان و چاودێری کردنەوە بکرێتە فەوزاخانەی سیاسی و شوێنی موهاتەرات و موزایەدەی حزبی، وەک ئەوەی لە رابردوو کێشەیان بۆ پرۆژەی چاکسازی درووست دەکرد و لە دەرەوەش کۆنگرەی رۆژنامەوانی ساز دەکرد و شیوەنی ساختەیان بۆ خەڵک و هاووڵاتیان دەڕشت، یان بۆ خانەنشین و ئیمتیازی خۆیان لەناو هۆڵی پەرلەمان دەست و قاچیان هەڵدەبڕین و لە شەقامیش باسی خانەنشینی نایاسایی و مووچەی زەبەلاح دەکرد.
٦ــ نابێ بە مەبەستی کێشە درووست کردن و فەوزا نانەوە چیتر بڵێن: نەدەبوو وا بکرێ، دەبێ لەگەڵ هەموو نەدەبوو وابکرێیەک بڵێن: دەبێ وا بکەین.
٧ــ دەبێ یەک رووبن و خۆیان بە کوردستانی بزانن، نەک وەک ئەوەی لە شەڕی داعش بەشێکان وەک هاوکارێکی شاراوەی داعش شەقامیان دەجووڵاند، لە دوای ریفراندۆم و هاتنی حەشدی شەعبیش ئەوانیتر بوونە چاوساغی حەشد و پاراستنی کوردستانیان بۆ پارتی جێهێشت.