فریادره‌س
کارزان فەقێ
ساله‌ك به‌رى نها، هه‌ولێر و به‌غدا د ئالۆزتریێن په‌یوه‌ندیێن خوه دا ده‌رباز دبوون، په‌یوه‌ندییه‌كا وه‌ها كو هیچ ساته‌كا ڤێ هه‌رێمێ ئاسایى نه‌بوو، ئه‌وێ كو وى ده‌مى گرنگ و جهێ تێبینێ بوو، سه‌ره‌راى هه‌موو وان كێشه و گرفتێن ل پێشیا مان و ب هێزبوونا حكومه‌تا هه‌رێمێ و تاكه قه‌واره‌یێ كوردان ، فریادره‌سه‌ك هه‌بوو رۆژانه د كه‌نالێن مه‌دیایێ دا دهاته دیتن و د گۆتنێن وى دا ب تنێ ئاماژه‌یێن چاره‌كرنێ بۆ خه‌لكێ كوردستانێ دهاته بهێستن، كه‌واته ئه‌گه‌ر بریاره دناڤبه‌را نووچه‌یه‌كێ مه‌دیایێن ئێكه‌تیێ كو باس ل داگیركرنا هه‌ولێرێ ژ لایێ حه‌شدا شه‌عبی دكه‌ت و نووچه‌یه‌كێ مه‌دیایێن پارتى كو باس ل چاره‌كرنا كێشه‌یێن ناڤبه‌را هه‌ولێرێ و به‌غدایی دكه‌ت، بێ دوو دلى ئه‌ز دێ باوه‌ریێ ب وى نووچه‌ى ئینم كو ئاماژه‌یێن گه‌شبینى دناڤدا بن، ئه‌گه‌ر ژبۆ كورده‌كێ دلسۆزێ به‌غدایێ جهێ دلخوه‌شیێ بیت كو ل پشتى روودانێن شازده‌ى ئكتۆبه‌رێ ئاسمانێ هه‌رێما كوردستانێ هاته گرتن و ئێدى سه‌رۆكێ حكومه‌تێ نكاریت سه‌ره‌دانان وه‌لاتێن ده‌رڤه بكه‌ت، بێ دوودلى بۆ من جهێ دلخوه‌شیێ یه كو سه‌رۆكێ حكومه‌تا هه‌رێمێ ب ترۆمبێلێ دچوو توركیا ژنوو ل وێرێ ب فرۆكه‌ى به‌ره‌ف وه‌لاتێن ئه‌وروپا دچۆ ژ بۆ چاره‌كرنا كێشه‌یێن ناڤبه‌را هه‌ولێر و به‌غدایێ. هه‌موو ئه‌و بزاڤێن پشتى روودانێ شازده‌ى ئكتۆبه‌رێ چێبووین دلخوه‌شكه‌ر نه‌بوون، هه‌بوونا گروپه‌كێ كو ببیته ئه‌گه‌رێ ژ ده‌ستدانا كه‌ركووكێ و ئینانا هه‌موو نه‌هامه‌تیێن پشتى ریفراندۆمێ ل هه‌مبه‌ر هه‌بوونا فریادره‌سه‌كى وه‌كو نێچیرڤان بارزانى سه‌رۆكێ حكومه‌تا هه‌رێمێ كو ببیته ئه‌گه‌رێ مانا تاكه قه‌واره‌یێ فه‌رمیێ كوردان ل جیهانێ و ئاسایى كرنا په‌یوه‌ندیێن ناڤبه‌را هه‌ولێر و به‌غدایێ، بێگومان ئه‌ز دێ نێچیرڤان بارزانى كه‌مه جهێ شانازى و فریادره‌س. كه‌واته تو چه‌ندێ ئازادى لاهوور و پاڤێلى ب قاره‌مان بدانى، وه‌ها ئه‌ز ژى ئازادم من ل ده‌ف خوه قاره‌مانه‌ك هه‌بیت، یان ب ره‌نگه‌كێ دى، تویێ كورد چه‌ند ل به‌ندا بزاڤێن وان پارتێن نه‌رازى بووى كو ل رێكا به‌غدایێ ل سرایێ بوون ژ بۆى كو عه‌بادى به‌رده‌وامیێ بده‌ته وان دۆرپێچان هه‌تاكو حكومه‌تا هه‌رێمێ ب ته‌مامى بشكێنێت، ب هه‌مان شێوه ژى ئه‌ز ل به‌ندا وان سه‌ره‌دان و بزاڤێن سه‌رۆكێ حكومه‌تا هه‌رێمێ بووم ژ بۆ شكاندنا وان دۆرپێچان، ل دووماهیێ چ روودا، هه‌موو راوێژ و شێره‌تێن حزبێن نه‌رازى یێن هه‌رێمێ سه‌رنه‌گرت و حكومه‌ت و قه‌واره‌یێ هه‌رێمێ كوردستانێ ب بهێزێ ده‌ركه‌فته‌ڤه، مان و چاڤه‌رێبونامه ل به‌ندا باشتركرنا ره‌وشێ ب هه‌روه نه‌چوو، نها دناخێ هه‌ركه‌سه‌كێ پارتى و دلسوزێ هه‌رێما كوردستانێ فریادره‌سه‌ك هه‌یه كو بوویه ئه‌گه‌رێ چێكرنا كوردستانه‌كا بهێز، كو بوویه ئه‌گه‌رێ دروستكرنا هه‌ماهه‌نگیه‌كا باشتر دناڤبه‌را هه‌ولێر و به‌غدا، بۆ چار سالێن بهێت ژى ئه‌و فریادره‌س دێ جهێ هێڤێى و خواستا مه بیتن
