ب سەدەما نەبوونا چاڤدێریەکا چر لسەر دەرمان و کەرەستەیێن ئاھێن خوارنێ یێن دھێنە دناڤ ھەرێما کوردستانێ دا کو بێگومان ئەڤ چەندە ب ئاسایشا نەتەوەیی ڤە یا گرێدایە و ھەبوونا بازارەکێ ئازاد ژی ب دیتنا من بڤی ئاوایی جورەکە ژ بازرگانی کرنا بازارێ رەش نەک کارەکێ مروڤایەتی یە بگرە دژی مروڤایەتیێ یە ژی و جورەکێ دیترێ تیرورێ یە.
ھەر بازرگانەک ب رەنگەکی و ئاوایەکی کەرەستەیان دھینە دناڤ ھەرێما کوردستانێ دا و بازرگانیکرن ب سامان و سەروەتێ ڤی وەلاتی تێتەکرن بێ ل بەرچاڤ وەرگرتنا وێ چەندێ کو ئایا ئەڤ رێژا زۆرا ئینانا ڤان کەرەستایان تاکو چ رادە و چ ئاست کوالیتییەکا ئاست بەرز ھەیە و د گونجایی نە ژبۆ بکارئینانێ و وەکو پێتفی مفا دێ لێ ھێتە وەرگرتن یان نە و دگەلدا ژی رەنگە ب کێر خارنێ نەھێن ل دەزگەھێت میدیایی ریکلام بۆ بھێتەکرن.
دیارە ژی ب سێ رەنگا ئەڤ بازرگانییە تێتەکرن یان ب رێکا سنووران یان ژی ب رێکا فروکەخانەیێن ھەرێمێ ھەروەھا دناڤخوویی دا ئەڤ بازرگانییە تێتەکرن، ڤێ ئێکێ ژی گومان و دوو دلی لجەم ھەڤوەلاتیێن کوردستانێ دروست کرییە کو ئەڤ چەندە راستە و خۆ ب ژین و ژیارا ھەرکەسەکی ڤە یاگرێدایە کو کەس نییە پێتڤی ب خارنێ و ڤەخوارنێ نەبیت تاکو بەردەوامیێ بدەتە ژیارا خۆ و دگەلدا ژی دەرمان ژبۆ چارەسەرکرنا نەساخیان تێتەبکارئینان لێ ئەگەر نە د وی ئاستی دا بیت کو کەسانێ نەساخ مفایی ژێ نەبینیت و دگەلدا ژی زیانێ بگەھینتە ساخلەمیا مروڤی.
لێ یا تێتە دیتن ژ جەم بازرگانان بتنێ کو بگەھنە قازانج و مفایێ ب مخابنی ڤە دبێژم خۆ ب بەرپرس نادانێن ل پاراستنا ساخلەمیا تاکێن جڤاکی دگەل رێزێن من بۆ بازرگانێن خودان ویژدان، لێرە دا دکارین بێژین کی بەرپرسیارە کو ئەڤە چەندین سالە ب رەنگەکێ بوێرانە ئەڤ کەرەستە دھێنە دناڤا ھەرێمێ دا بێی کو پشکنینێن دروست و پێتڤی لسەر بھێنە کرن و ھەڤوەلاتیێ بەرێزێ مە تووشی دەھان دەردە سەریان کری، ئەڤجا لێرە دپرسین بۆچی تانھا لایەنێن پەیوەندیدار خۆ لڤێ ئێکێ نەکرییە خودان و لجھێ بەرپرسیارەتیێ دا نەبووینە؟
لێ خوشبەختانە ل گوری ئاگاھیان رێزدار نێچیرڤان بارزانی، سەروک وەزیرێن ھەرێما کوردستانێ رەزامەندیا خۆ دیارکرییە بۆ دروستکرنا دەزگەھەکێ تایبەت بۆ کونترولکرنا خوارن و دەرمانان، ب ھەڤشێوەیێ ئەمریکا و وەلاتێن پێشکەڤتی یێن جیھانێ کو ئەڤ دەزگەھە راستەوخۆ دێ ژلایێ بلندترین دەستھەلات ڤە ھێتە ب رێڤەبرن کو ھزرا دامەزراندنا ڤی دەزگەھی یا سەروک وەزیرانە و رەزامەندی لسەر دامەزراندنا ڤێ چەندێ ھاتییە کرن و نوکە د قوناغا دوماھیێ دایە، بڤێ چەندێ ئێدی دێ کونترولا خوارن و دەرمانان ل دەرگەھێن سنووری و فرۆکخانان و دناڤخوویا ھەرێمێ ژی دا ب رێیا ڤی دەزگەھی دھێتەکرن.
بێ گومان ئەڤ چەندە ژی د بەرژەوەندا ھەرتاکەکێ دەڤەرێ یە ژ پێخەمەت پاراستنا سامان و گیان و ساخلەمیا ھەڤوەلاتیان ژ خوارن و ڤەخوارنێن نە ساخلەم و تووش نەبوون ب نەساخیان، ئەڤە ژلایەکی و پێتڤی نەبوون ب داو دەرمانان ژلایەک دیتر، ھیڤی و ئومێدا ھەر کەسەکی ژی ئەوە کو ئەو بریارێن بەری چەندێ ھاتینە دەرئێخستن ژبال سەروک وەزیران ڤە بکەڤنە دوارێ بجھکرنێ دا ژبەرکو زۆر دگرنگ و فەرو پێتڤی نە ژوانا ھەرکەسەکێ ب قاچاغ کرین و فروتنێ ب دەرمانا و کەرەستێن نوژداری بکەت بھێتە سزادان و دووبارە وەرگرتنەڤا مولەتا کرین و فروتنا دەرمانان ل وەزارەتا ساخلەمیێ کو دێ تاکە لایەن بیت مافێ تومارکرن و دانا مولەتێ ھەبیت، دگەلدا چاڤ خشاندن ل تومارا کومپانیان ھەروەھا راگرتنا دامەزراندن و تومارکرنا کومپانیێن نوی تاکو بریارێن نوی بۆ بھێنە دەرئێخستن و ھەژمارەک بریارێن دیتر بڤێ ئێکێ و دانانا کونترولا جوری ژبۆ کەرەستێن خارنێ و دگەلدا دەرمانان دێ ژڤی جورێ تیرورێ ھێنە پاراستن ..