ئەگەر ئەم بەرپەرێن دیروکا کەڤنا مللەتێ کورد ڤەدەین. دبیت ئەم ئێک ھەڤوکژی نەبینین، کو ب ئاوایەکێ فەرمی داخازا بەستن و گرێدانا کونگرێ نەتەوەیی ل کوردێن ھەرچارپارچێن کوردستانێ ھاتبیتەکرن. لێ ئەگەر بزڤرینە دیرۆکا ھەڤچەرخ دێ بینین کو ل باشورێ کوردستانێ و بتایبەت ژلایێ پارتی و خودێ سەرۆک بارزانێ ئەڤ پێنگاڤە ب ئاوایەکێ فەرمی و بەرنامە بۆ دارێتی وەکو پروژەیەکێ نشتیمانی و کوردایەتی دانا لسەر مێزا حزب و ئالیێن سیاسیێن ھەرچارپارچێن کوردستانێ. لێ بمخابنڤە ھندەک ژ ئالیێن سیاسیێن کوردی ل پارچێن دیترێن کوردستانێ بتایبەت ل رۆژئاڤا نەمازەژی پەیەدە و ھەسەدە بوونە رێگر لھەمبەر بەستنا ئەڤی پرۆژێ نشتیمانی. کو بدیدا مە ئەگەر ھەمی ئالیێن کوردی لدویڤ بانگەوازیا بارزانی چوبان دبیت ئەڤرۆکە زۆر ژوان گەڤ و مەترسیێن لسەر ئایندێ کورد و کوردستانێ ھەی ل ھەرچارپارچان دروست نەدبون. ھەروەسا دوژمنێن دۆزا کوردان ژی نەدشیان ب ئاسانی درزان پێخنە دناڤ رێزێن مللەتێ کورد، ئەڤجا ل باشور و باکور یان ل رۆژھەلات و رۆژئاڤا. بێگومان دبیت بۆ ھندەک حزب و ئالیان ئەڤ پرۆژە یێ گرنگ نەبیت یان دبیت ب گرنگ وەرنەگرتبیت، ژبەرکو ژلایێ کەسەکێ بھێزو خودان ئەزمون و باوەرەکا کوردایەتیا بھێز و برێک و میکانزمێن دیموکراسی، نەک برێکا خەباتا چەکداری و پارتی زانیا دەم بسەرڤە چویی دجیھانا ئەڤرۆدا دنێرتە دۆزا کوردی. ھەر ئەو بوونە رێگرێن سەرسەخت بۆ نەبەستنا ئەڤی کونگرەیی، چونکی ل وی دەمی گەڤ لسەر وان نەبوون و ئەوان ھزر ژی دڤان گەفاندا نەکریە ھەروەسا ئەو چەندژی نەزانیە کو دۆژمن ھەر دۆژمنە چ ئەڤرۆکە یان سباھی بیت. ئەو بو ژ دەرئەنجامێ ئەڤێ سیاسەتا چەوت پەیەدە بو ئەگەر کو تورکیا دەستێ خو درێژبکەتە رۆژئاڤایێ کوردستانێ و مەترسیەکا مەزن لسەر ئەڤێ پارچا کوردستانێ دروستکر ب ھەڤکاریا ھێزێن سوپایا ئازاد ل سوریێ. شیان د ماوەیەکێ کێمدا عەفرینێ و چەندین دەڤەرێن دیترێن کوردان بگرن. کو لبەرە مەودایێ ئەڤێ دەست بسەرداگرتنێ درێژتر بکەن. ژبەرھەبوونا پەیەدێ. ھەروەسا سیاسەتا وێ یا شاش و توندرەو دگەل خەلکێ کوردنشین و عەرەب نشین و ھەبوونا سەربازیا ب زۆری فاکتەرەکێ دیتربو کو دەنگێ خەلکێ خوجھێ ڤان دەڤەران ل جادەیێن ناڤخویی و دەرەکی بلند ببیت، ھەروەسا ب بھانەیا پاراستنا سنوری خو ژ ھێزێن تیرورست دەست ب ئوپەراسیونێن سەربازیکر ل ڤان دەڤەران و چەندین ناوچەیێن گرنگ و ستراتیجی داگیرکرن و رۆژ بۆ رۆژێ ئەڤ داگیرکرنە یا بەردەوامە. لەورا ژبەرھەبوونا تورکیا وەکو دۆژمەناکا سەرسەختا دۆزا کوردی کو دیرۆک شایەدێ ڤێ چەندێیە. گرنگبوو کوردێن رۆژئاڤا پەیاما سەرۆک بارزانی و نامەیا ھایدارکرنێ یا نێچیرڤان بارزانی لسەر گەفێن مەترسیدارێن وەلاتێن ھەڤسی و بتایبەت تورکیا ب گرنگ و بەرچاڤ وەرگرتنبا ھەتا کو دکاودانێن بڤی رەنگیدا شیابان بەرەڤانیێ ژ خو بکەن. ھەروەسا بەرژەنگێن گرێدانا کونگرێ نەتەویی دەرئەنجا ھەردا بو ئەڤان مەبەستان بیت. کو کوردان بکەتە ئێک رەنگ و ئێک دەنگ دکاودانێن نەخاستیدا. نەھێلیت دەستێ دەرەکی بھێتە دناڤ رێزێن مللەتێ کوردا ژبوی مەبەستێن خراب، دیسان ژبوی رێگریکرن ژ گەفێن وەلاتێن ھەڤسی. ئەڤجا ئەوا ئەڤرۆکە رۆژئاڤا دخازیت بھیتە کرن کو کونگرەیی نەتەوەیی یە دبیت دڤان کاودانان یا بزحمەت بیت. لەوما ئەڤرۆژی ئەو یێ باجا نەبەستنا کونگرەی ددەن.