پشتی سالا ٢٠٠٣ هێدی هێدی ڤەژاندنا ئابوری ل هەرێما کوردستانێ دەستپێکر ل دەستپێکا سالێن ٢٠٠٦ کوردستان کەتە د قوناغا ئاڤەدانکرنێ و پرۆژەیێن خزمەتگوزاری و بهێزکرنا ژێرخانا ئابوری ل هەرێمێ هاتن ب جهئینان.
ل چ وەلاتەکێ دنیایێ حکومەت ب تنێ نەشێت پرۆژەیێن خزمەتگوزاری و وەبەرهێنانێن ب تنێ بکەت، هەرێما کوردستانێ ژی ب هەبوونا وێ سەقامگێریا مەزن یا هەی شیا سەرنجا کۆمپانیێن وەلاتێن بیانی بخو رابکێشیت و ب هاریکاریکاریا سەرمایەدارێن ناڤخوە دەست ب ئاڤەدانکرنا کوردستانێ بکەت.
پرۆژەیێن نیشتەجێبوونێ و دیسان یێن خزمەتگوزاری مینا نەخوشخانە و قوتابخانە و رێک و ریبار ژ وان پرۆژەیان بوون یێن حکومەتێ دەست بو ئاڤاکرنا وان کرین، سالێن ٢٠٠٦ تا ٢٠٠١٢ سالێن زێرین بۆن ژ بو ئاڤەدانکرنێ و دڤی دەمی دا هەرێما کوردستانێ بوو ناڤەکێ دیار ل سەر ئاستێ وەلاتێن جیهانێ ب تایبەت ل رۆژهەلاتا ناڤین، ب هزاران پرۆژە بۆ خوشکرنا ژیانا وەلاتیان هاتن دانان بێگومان ئەڤە ژی هەمی ب هاریکاریا وەبەرهێنەر و بەلێندەر و سەرمایەدارێن ناڤخو.
سالا ٢٠١٤ پشتی هەرێما کوردستانێ ب هەمی لایەکی ڤە ب تایبەت ئابوری لاواز بووی پتر ژ ٩٠ ژ سەدێ یا پرۆژەیێن نیشتەجیبوونێ و دیسان یێن خزمەتگوزاریان هاتن راوەستاندن و حکومەتێ شیانێن ب جهئینانا وان نەمان وەک خەرجکرنا پارەی د دەمێ دەستنیشانکریدا، بەلێندەرێن هەرێمێ کو د دەمێ زێرین و دەستفرەهیێ دا حکومەت پالپشتا سەرەکی یا سەرکەفتنا کارێن وان بوو و هەمی ئاسانکاری ژ بۆ کارێن وان دهاتە کرن خوە ل حکومەتێ کرە خودان و شیان ل گورەی پێدڤی خزمەتا هەرێمێ بکەن و هند پرۆژەیێن کو بجهئیانان وان یا پێدڤی بو نەراوەستینن، ئەڤ پینگاڤا ڤان بەلێندەران بۆ دیوارەک بو هلگرتنا حکومەتێ دا نەکەڤیت ئانکو وانژی پشکا خوە د سەرکەفتنا حکومەتێ دا هەبوو ل دەمێ قەیرانان، پتریا جاران ژی سەرۆکێ حکومەتێ بەلێند دابو وان کو ل گورەی پیدڤی هاریکاریا وان بهێتە کرن.
پشتی رۆژێن سەخت و دژوار دەربازبووین و لڤین کەتیە ڤەژاندنا ئابوری ل هەرێمێ حکومەتا هەرێمێ ب سەرۆکاتیا نێچیرڤان بارزانی بریارا خەرجکرنا ١٠٠ ملیون دولاران ژ بۆ بەلێندەران دایە، ئەڤەژی ئەو بەلێن بوو یێن گەلەک جاران ب بەلێنداران هاتیە دان و پشتی حکومەت شیای وی پارەی بدەست بێخیت شیا بەلینا خوە ب جهبینیت، ئەڤە هەم وەک حەقێ وان کو د رۆژێن دژوار دا ملێ خوە دا دگەل حکومەتێ و هەمژی ئاماژەیەکە کو حکومەت یا رژدە ل سەر ئاڤەدانکرنا کوردستانێ ژ هەمی لایەکیڤە.
ژ بیرنکەین خوراگریا خەلکی و سەرمایەدار و بەلێندەر و وەبەرهێنەران دگەل وێ متمانەیا حکومەتێ بو وان پەیداکری بوونە ئەگەر کو هەرێما کوردستانێ د نەخوشترین دەم دا ل هەمی رۆژهەلاتا ناڤین خوە لسەر پێا بگریت و نەبیتە مەیدانا وێرانکاریێ.