رۆژێكیان تلە بەردێكی ملهوڕ و خۆپەرست خۆی كێشا بە پارچە شووشەیەكی قەشەنگ و بێگەرددا.
پارچە بەردەكە بە دەم قاقای پێكەنینەوە گوتی: چاك لەت وپەتم كردیت؟!
پارچە شووشەكان لێك رامان و بە تەوسەوە گوتیان: بەخوا بەردێكی كاڵفام و گەوجە، نازانێت ئێمە هەتا پێماندا بكێشن، رۆخی رژد و تیژترمان لێ دەردەچێت ودژمنانمان پتر ئازار دەدەین.
زۆرجار باس لە بەهێزیی پارتی دیموكراتی كوردستان دەكرێت و بە چاوی ئەبڵەقەوە دەڕواننە مانەوەی ئەو حزبە بۆ پتر لە (72) ساڵ لە مەیدانی خەبات هەروا بە بەهێزی و گەشەكردنی، نەك هەر ئەوەندە، بەڵكو هەرجارێك هەوڵی گچكەكردنەوەی دراوە لەلایەن دژمنانیەوە، دەرئەنجامەكەی پێچەوانە بووە و لە بری لاوازبوون ئەو حزبە بەهێزتر بووە لە پێش ئەوەی هێرش بكرێتە سەری، بەڵگەی ئەم قسەیە سێ رووداوە لە سێ زەمەنی جیاوازدا كە هەوڵی گچكەكردنەوەی پارتی بەپێچەوانەوە شكاوەتەوە و بەهێزتر و رژدتر لە ئەزموونە تاڵەكان دەرچووە، ئەو روداوانەش بریتین لە:
1. داستانی هەندرێن:
لە شەستەكانی سەدەی رابردووەوە پارتی بووەتە لەمپەر و بەر لە پلانی لەناوبردنی كورد و دۆزەكەی دەگرێت، بۆیە دەوڵەتی عێراق سوپایەكی بەهێزی لە جەیش و جاش بەنیازی لەناوبردن، یان گچكەكردنەوەی پارتی گردكردەوە، بەڵام زیندەخەونی دژمنانی ئەو حزبە لە داستانی هەندرێن لە گۆڕ نراو، لە چوار بەش سێ بەشی سوپاكە لاشەیان مەڵاس بوو بە خاكی كوردستانەوە، ئەم داستانە كردیە كارێك كە حكومەتی عێراق لە بری یەك حیساب، هەزار ویەك حیساب بكات بۆ هێزی پارتی، چونكە قەبارەی هێزەكە دیار نەبوو كە لە نێو كەند و لەند و چیاكانی كوردستانەوە بەرپەرچی سوپای نیزامی عێراقی دایەوە، بۆیە دەرئەنجامەكە هەڵگەڕایەوە و ئەو هێرشە بووە مایەی ملدانی حكومەتی عێراق بو ئاگربەست و پاشانیش رێككەوتننامەی (١١ ی ئازاری ١٩٧٠).
٢. شەڕی ناوخۆ:
پاش راپەڕینە مەزنەكەی خەڵكی كوردستان و سەپاندنی ناوچەی دژە فڕین بۆشاییەكی سەربازی لە باكووری عێراق دروست بوو، بۆیە هەرێمی كوردستان بووە مەیدانی ساغكردنەوەی حیساباتی دەوڵەتانی ناوچەكە و ئێران بە هەنجەتی لێدانی دیموكرات و توركیاش بە نیازی لەناوبردنی پەكەكە بە ئارەزووی خویان تەڕاتێنیان دەكرد، هەر وەك هەر پارچەیەكی دیكەی دنیا كە غیابی هەژمونی سەربازی دەبێتە كێبڕكێ وململانێ لە پیناو سەقامگیربوونەوەی هاوكیشەكانی هێز، هەرێمی كوردستان پاش سێ سال دووچاری شەڕێكی نەگریسی ناوخۆ بووەوە لە ساڵی (١٩٩٤)دا، ئاگری شەڕەكە تا دەهات گەرمتر دەبوو بە فیتی وڵاتانی ناوچەكە و دەستێوەردانیان، كار گەیشتە ئەوەی یەكێتی نیشتمانیی كوردستان بە هاوكاریی پەكەكە پەلی پاسدارانی ئێرانیان راكێشا و بە هەمووان چوون بە گژ پارتیدا، تا بە تەواوەتی لە ناوی بەرن و لەم كاتەدا ئەزموونەكەی هەرێمی كوردستان و ناوچەی دژە فڕینیش لەناو دەچوو، چونكە هیچ وڵاتێكی زلهێز قایل نەبوو، ئێرانییەكان هەژمونی خۆ بسەپێنن بەسەر هەرێمی كوردستاندا بە بۆنەی غیابی دەسەڵاتی سەربازییەوە، بۆیە پارتی دیموكراتی كوردستان بڕیارێكی ژیرانەی دا و هەرێمی كوردستان و ئەزموونەكەی لە تیاچوونێكی حەتمی قوتاركرد لە (٣١ ی ئابی ١٩٩٦) دا و شەڕی ناوخۆ كۆتایی هات.
٣. داستانی پردێ:
ریفراندۆمەكەی (٢٥ ی ئەیلوولی٢٠١٧) بە رابەرایەتی پارتی دیموكراتی كوردستان لەرزی خستە ئەژنۆی دوژمنانی پارتی و خەڵكی كوردستانەوە و هەمووان دیمان هەر دوو دەوڵەتی ئێران و عێراق هەرچی بۆیان كرا لە جەیش و حەشد و لەڕێدەرچوو و فەرهوودچی كردیانە سەر هەریمی كوردستان و جارێكی دیكە زیندە خەونی یەكێتی نیشتمانی كوردستان سەری هەڵدایەوەو لە (١٦ی ئۆكتۆبەری ٢٠١٧) درزیان خستە نێو سەنگەرەكانی پیشمەرگەوە و رێگەیان خۆش كرد بو هێزەكانی دوژمن هەتا بێت و سەرجەم ئەو ناوچانەی كە قەڵەمڕەوی پارتی تێیدا بەهێزە، داگیری بكات و كیانی دەستووری هەرێمی كوردستانیش لە ناو ببرێت، بەڵام دیسان پارتی ئەو پلانە ئیقلیمی و نێوخۆییەی تێكشكاند لە داستانەكانی رۆژی (٢٠ی ئۆكتۆبەری ٢٠١٧) دا و خەڵكی كوردستانیش لایان دەركەوت كە تەنیا پارتی دیموكراتی كوردستان زامنی راستەقینەی كیانی دەستووریی هەرێمی كوردستانە، بۆیە لە هەڵبژاردنەكەی پەرلەمانی كوردستاندا پارتی سەركەوتنێكی گەورەی دیكەی تومار كرد و خەونی لەت و پەت كردنی خۆی و هەرێمی كوردستانی كردە خەیاڵپڵاوێكی نەزوك و قەتاوقەت بەدینەهاتوو..