دەھان فاکتەرێن جورا و جور وەکریە کوردستان بکەڤیتە بن دەستێ ھێزێن داگیرکەرێن دەڤەرێ , ژ سەدێ شازدێ ھەتا نھا ب شەر و خوشی و سزا و دیاری و پەیمان و بێ سوزی ئەڤ وەلاتە ھاتیە پارڤەکرن ل سەر زلھێز و وەلاتێن دەڤەرێ. لێ تشتێ کو ھەژی گرنگی پێدانێ یە ھەبونا روحا بەرەڤانی کرن و یاخیبونێ و ڤیانا ئازادی و سەربەخویێ یە د ناڤ کوردان دا . دەھان رێک ھاتینە تاقیکرن بو گەھشتن ب مافێن گەلێ کورد . داوی رێک ئەنجامدانا ریفراندوما سەربەخویێ بو ل (٢٥ ئەیلولا ٢٠١٧ ) و ئەو پێشوازی و شورەشا سپی یا گەلێ کورد , نەتەوەپەرستێن دەڤەرێ توشێ شوکێ کرن کو ئەڤ گەلێ ھندە ھاتیە تەپەسەرکرن و ب ڤی ئاوای و دناڤ دولەک ژ گورگێن برسی بەرەف پێنگاڤەکا سەربەخویێ دچن. لێ دیار بو وەکی ھەر جار داگیرکەرێن کوردستانێ ھەر ھیچ خوە ژ بەر ڤێ پروسا کو یا گونجای ل گەل یاسایێن نافخوی و نێڤ دەولەتی و دینی و دونیایی نەگرت و چ رێز ژ مافێن گەلەکێ رەسەنێ دەڤەرێ نەگرت کو ھزاران سالا بەری وان ل دەڤەرێ خوەدی ئیمپراتوریەت بویە .وەلاتێن ھەفسی تورکیا و ئیران دگەل عیراقێ کو ئەڤ وەلاتە یێ بەرھەف بو سەروەریا ئاخا وێ بێتە بنپێکرن تنێ کورد ب مافێن خوە نەگەھیت ! ئەڤێ ھەفکێشا نە ئێکگرتی تنێ دژی کوردا ئێکگرتی, پشتگیری ژ ئەوروپی و ئەمریکیا وەرگرت و گلوپێ کەسک بو ھاتە ھەلکرن بو ھێرشکرنە سەر کوردستانێ . ھەتا نھا ھەکێشە یا روون و ئاشکرایە و پرسیارێ ژ چ کوردەکێ بکەی دێ بێژیت ئەو دوژمنن و ناھێلن ئەم ببینە خوەدی کیانەک نەتەوەی , لێ یا نە پێشبینی کری و دژی ئاقلی و کەتواری و دیروکێ و ئولی و وەلاتی و کوردستانیان ژی , خیانەتا کالفام و فێسبوک و باز و شەلاتیێن بێ کەرامەت بو , کو ژ ١٢ ئوکتوبەرێ رازیبون ب رادەستکرنا پرانیا دەڤەرێن کوردستانی و رێکخوشکرن بو حەشدێ و پاسدارا کو ھێرشی ئاخا کوردستانێ بکەن . لێ یێ گرتی ب شیری بەرنادەت ب پیری وەکی باب و کالێن کوردا ھەر زوی ب گوھێن مەدا گوتیە . ئەڤێ خیانەت و دوژمنکاریا دژی کوردستانیان شازدێ ئوکتوبەرێ ب دیف خو دا ئینا و کیانێ کوردستانێ ھەمی کەفتە بەر گەفا نافچونێ و پێنگاڤێن ئەو بون ئەڤ وەلاتە بو دوژمن و خائینان بمینیت , بەلێ سوپاس بو خودایێ مەزن پشتی ھنگی بو پێشمەرگەیێن قەھرەمان کو شیان ل (٢٠ ئوکتوبەرا ) پار سال ڤێ پیلانێ بن ئاخ بکەن و خائینان شەرمزار بکەن .
دبیاڤێ لەشکەری دا ھەر کوردەکێ دیر ژ خیانەتێ بونە پێشمەرگە و کوردستان ھاتە پارستن , بەلێ پێنگاڤا گرنگ و مەزن و ب زەحمەت ئەو بو دیف داستانا پردێ دا ھاتی ئەو ژی قوناغا ڤەکرنا دەرگەھێن دبلوماسی بو کو ھەمی ل سەر کوردان ھاتبونە گرتن , دڤێ قوناغێ دا رولێ سەروکێ حکومەتا ھەرێما کوردستانێ باش دیار بو کو شیا ئەو لایەنێن تبلێن خو را دھژاندن و گەفێن توپ و فروکان دکر بەحس ژ دەربازبونا وێ قوناغێ دکر کو کورد تێدا و ئیدی دێ سوپا و دەسەلاتێن مەرکەزی ڤەگەرن ھەر بوستەکا کوردستانێ ھەمی بێ مەرج ئینانە سەر مێزا دانوستاندنێ و ئەو دلێ بەغدا کو نێچیرڤان بارزانی گوتی ل کیڤە بیت جارەک دن بەری َ ئاقلێ وان کەفتەف ھەولێرێ و زانی ئیدی بریارا کوردان ل ھەولێرێ دەردکەڤیت و ئەوێن خیانەت کری و کێر خو نەھاتی کێر کەسێ ناھێن. ئەو رەوشا ب ئەگەرێ شازدێ ئوکتوبەرێ ھاتیە روژەڤێ ب چار پێنگاڤێن سەروکێ حکومەتێ ھەتا رادەکێ زور رەوش بەرەف باشتر بونێ چو :
- بەردەوام داخازکرنا دیالوگێ و بجە ئینانا دەستورێ عیراقێ ب ئێک پاکیچ.
- پێکولکرنەکا بەردەوام بو ھندێ ئێک رێزیا کو ھاتیە تێکدان ب ئەگەرێ شازدێ ئوکتوبەرێ, جارەک دن ڤەگەرێت و ناڤ مالا کوردی بێتە رێکخستن . ھەروەسا پاراستنا پروسا سیاسی ل کوردستانێ ئەرکەک گرنگ و گران بو دگەل پارستنا ھەرێمێ ژ دوو ئیدارەییێ .
- کار کرن ل سەر ڤەگەراندنا پەیوەندیێن ھەرێمێ د گەل دەرڤە .
- پێکولێن بەردەوامێن سەروکێ حکومەتێ کریزا دارایی ھەتا رادەکێ زور سڤک کر و پێنگاڤێن بەردەوام ژی ھەنە بو ھندێ کریزا دارایی ب ئێکجاری نەمینیت .