بەغدا وەک پایتەختی عرووبە نە لە ئێستا و نە لە رابردوودا چاوی بە سەرکەوتن و دەستکەوتەکانی کورد هەڵنەهاتووە و لە داهاتووشدا هەمان هەڵوێستی دەبێ، سەرکەوتن و دەستکەوتەکانی کوردیش وایکرد بە نەخشە و پلانی پێشوەختە و بە چەند قۆناغێک لە رێگای دەستە و گرووپە عێرقچیەکانی کوردستانەوە سنوورێک بۆ دەستکەوت و سەرکەوتنەکانی کورد دابنێ، لە قۆناغی یەکەمدا بە پێی نەخشەیەک کە بەرپرسێکی ناو لایەنێکی کوردی بۆی کێشابوو مووچەی فەرمانبەران و بودجەی حکومەتی هەرێمی بڕی، لە رێگەی عێرااقچیەکانیش کەوتە ئاژاوە نانەوە و هەڵکوتانەسەر و سوتاندنی بارەگاکانی پارتی، دواتر بۆ لاواز کردنی پێگەی کورد کاری لەسەر ئەوە کرد لە بەغدا پاکتاوی پارتی بکات، بۆ ئەو مەبەستەش دووبارە کەڵکی لە فراکسیۆنە کوردیەکانی وەک گۆڕان و یەکێتی و کۆمەڵی ئیسلامی وەرگرت و وەک دەیویست پارتی لە بەغدا پاکتاو کرد، دوای ئەوە هەر ئەو فراکسیۆنانە بە کودەتاکەی ٢٣ی حوزەرانی ناو پەرلەمانی کوردستان هەستان، دوای ئەوانەش لە پەرلەمانی عێراق میلیشیای حەشدی شەعبیان بە یاسایی کردو مووچە و مافە دەستوورەکانی پێشمەرگەشیان خستە ژێر رەحمەتی حکومەتی عێراق.
تا ژیانی خەڵکی کوردستان سەختتر دەبوو خواستی عێراقیچێتی ئەو لایەنانەش هەڵدەکشا، تا وای لێهات هەموو داخوازیە سیاسیەکانیان لە ناردنی مووچەی فەرمانبەرانی سلێمانی و دەوروبەری کۆ کردنەوە و بە شانازیشەوە باسیان لەو هەوڵەی خۆیان دەکرد، ئەوەش پیلانێک بوو بۆ ئەوەی قەوارەی حکومەتی هەرێم نەهڵن و بە لاوازی فدراڵی پارێزگاکان بچەنەوە بەر دەرگای بەغدای عرووبە، هەموو ئەو رووداوە خیانەتکارانەو زۆر رووداوی تریش بەر لە خیانەتی ١٦ی ئۆکتۆبەر بوون.
شەڕی داعش و سەرکەوتنەکانی پێشمەرگە و شکست و ئابڕوو چوونی سوپای عێراق ئەوەندەی تر کوردی لە دوا سەرکەوتن و گەیشتن بە مافە نەتەوەییەکانی نزیک کردەوە، ئەوەش وایکرد بەغدا دوا بۆمبە تەوقیت کراوەکەی لە ١٦ی ئۆکتۆبەری پارساڵدا بە رووی سەربەخۆخوازانی کورددا بتەقێنێتەوە و کەرکوک و ناوچەکانی تر بخاتەوە ژێر هەژموونی عەرەبگەرایی خۆی.
هەموو پاکانەی خیانەتکاران بۆ خیانەتی ١٦ی ئۆکتۆبەر ریفرادۆمە و دەڵێن: ئەگەر ریفراندۆم نەکرابا ئەوەی ١٦ی ئۆکتۆبەر رووی نەدەدا و رووداوی ١٦ی ئۆکتۆبەر کاردانەوەی ریفراندۆم بوو، جا ئەگەر گەڕانەوە بۆ دەنگ و بڕیاری خەڵکی کوردستان بیانوو بێ بۆ خیانەت کردن، ئەوا تا کورد مابێ بیانووی خیانەت کردن رۆژانە لەبەر دەستی خیانەتکاراندا دەبێ، کێشە لەوەدا نییە بەو خیانەتە نیوەی کوردستانیان بە داگیر کردن دایەوە، کێشەی گەورە لەوەدایە خیانەتیان حەڵاڵ کردووە و خیانەتیش وەک شۆڕشگێڕی و وڵاتپارێزی بە شۆڕشگێڕ و وڵاتپارێزان دەفرۆشنەوە.
الإثنين 10:22 م
http://gulan-media.com/sorani/articles.php?id=8303&eid=317
الثلاثاء 7:29 م
یەکێتی موزایەدە بە مانەوەی لە کەرکوک دەکات
سوورە مەرگەیی
دوای خیانەتی ١٦ی ئۆکتۆبەر و فرۆشتنی کەرکوک، تا ئێستاشی لەگەڵدابێ بەشێک لە سەرکردەکانی ئەو حزبە و بە تایبەتیش کەرکوک فرۆشەکان، بە مەبەستی شاردنەوەی خیانەتەکەیان و خۆڵ کردنە چاوی خەڵک، موزایەدەی ئەوە دەکەن کە گوایە لە کەرکوک ماونەوە و شارەکەیان بەجێ نەهێشتووە، ئەوە خۆی لە حۆیدا بەڵگەی ئەوەیە کە خیانەتەکەیان کردووە و دەیانەوێ بەو موزایەدە کەمێ باری گرانی خیانەتەکە لەسەر خۆیان سوک بکەن.
لە راستیدا مانەوەی یەکێتی لە کەرکوک بەڵگەیەکی حاشا هەڵنەگری خیانەتەکەیە، چونکە لە هیچ وڵات و سەردەمێکدا نەبینراوە و نەبیستراوە، خیانەتکاران لەگەڵ خیانەت لێکراوان رەو بکەن، یان هەمان ئازاری خیانەت لێکراوان بچێژن، ئەوەی بینراوە و بیستراوە خیانەتکاران بە زەلیلی لەگەڵ خیانتە بۆ کراوان ماونەوە و بە فەرمانی ئەوانیش جووڵاونەوە، ئەگەرنا مانەوەیان چ سوودێکی بۆ کورد و کەرکوکیەکان هەبووە؟! ئایا توانیانویانە رێگری بکەن لەوەی سووکایەتی بە ئاڵای کوردستان و بەهاو رەمز و پیرۆزیە نەتەوەییەکانی کورد نەکرێ؟! ئایا تونیویانە رێگری لە تەعریب و گرتن و ئیهانە کردنی کورد بکەن؟! ئایا ئاڵای کوردستان لەسەر بارەگا و مێزی پێش بەرپرسەکانیان دەبینرێ؟! ئایا توانیویانە رێگری لەو گرتن و رفاندنە بکەن کە حەشدی شەعبی لە کەرکوک بەرامبەر بە کەرکوکیەکان ئەنجامی دەدات؟! ئایا حزبێک بە داگیرکاری و باڵادەستی دوژمنەکەی و زەلیلی خۆی رازی بێت، بۆ مانەوەی موزایەدەی چی بەسەر خەڵکدا دەکات! خۆ ئەگەر مانەوە وەڵام بێ بۆ شۆڕشگێڕی ئەوان و داگیر نەکراوی کەرکوک، لە گەرمەی ئەنفال و کیمیابارانی هەڵەبجە و کوردستان مستەشار و جاشەکان رەویان نەکرد و لە شار و شارۆچەکەکانی ژێر دەسەڵاتی بەعس مانەوە، بەڵام کام مانەوە؟! مانەوەیەک کە بە هەموو زوڵم و ستەمێکی بەعس رازی بوون و بەعس چۆن فەرمانی پێ کردبان، دەبووایە وا بکەن و فەرمانەکانی بەعس وەک خۆی جێبەجێ بکەن.
١٦ی ئۆکتۆبەر بە شێوەیەک ئەنجامدەرانی سڕ کردبوو کە دوای بە ئاگا هاتنەوەیان و هەست کردن بە گەورەیی خیانەتەکە، هەر یەکە و بە ئاوازێک وڕێنەی دەکرد، یەک دەیگوت: رێککەوتنمان لەگەڵ حەشدی شەعبی نەکردووە، یەک دەیگوت: بۆ رێککەوتن لەگەڵ حشدی شەعبی و هێنانەوەیان بۆ کەرکوک لە کۆی (٥٠) ئەندامی سەرکردایەتی واژۆی (٣٨) ئەندامی سەرکردایەتیم لایە، یەک دەیگوت: فیشەکمان لێبڕان و چەکی پێویستمان نەبوو، یەک دەیگوت: پاشەکشەمان کرد، یەک دەیگوت: کەرکوک شارێکی عێراقییە و گەڕاوەتەوە باوەشی نیشتیمان، ئیتر هەر یەکە و بە ئاوازێک دەیخوێند.