ب ھەلدانەڤا روپەلێن دیروکێ گەلەک جاران خەم و کول و کوڤان و دەردێن گران ل سەر دل و دەروونێ تاکێ کورد دەردکەڤن و دیاردبن ! ھەر ھەمی ژی نەل بەر وێ داگیرکەریێ و خەبات و قوربانیدان و گیان فیدایی و بێ بەرھەم بونا زورەک ژ پێکولێن کوردان و کوشتن و سێدارێ بویە ب درێژاھیا دیروکی ! . بەلکی ژ بەر وێ خیانەتێ بویە ئەوا زور جاران پشکەک ژ کوردان ل ئاخ و وەلاتیێن خوەکری ژ سەردەمێ میرگەھان بگرە سەرەرایێ ھەمی دەستکەفتیان لێ خیانەت سیمایەک ئاشکرابویە ل دەمێ سەرھلدانا شورەشێن بەدرخان بەگێ بوتان و میرێ مەزنێ سوران و پاشایێ بابان عەبدرەحمان بەگ و شێخ عوبەیدوللایێ نەھری و سمکویێ شکاک و شێخ سعیدێ پیران و شێخ عبدالسلامێ بارزانی و شێخ محمودێ حەفید و مەلا مستەفایێ بارزانی و ئیحسان نوری پاشا و قازی محمد...ھتد. ل دەھان شورەش و سەرھلدانێن دیتر ژی دا سەرکردێن کوردا ھاتینە کوشتن و سێدارەدان ھەر ھەمی ژی ل ھوکارەکێ خویەتی کومدبن ئەو ژی خیانەتا پشکەک ژ دەروون نەساخ و بێ جورئەت و بەرژەوەندی خوازێن کورد بویە و خوە رادەستی ئەجیندایێن دەولەتێن دوژمن کریە و بوینە رێکخوشکەر بو داگیرکرنا کوردستانێ !
ل دیروکێ دا ھند نموونە ھەنە د دەھان گوتاران دا ھەمی نائێنە گوتن ئەو سەرکردێن کوردان ئەوێن ناڤێن وان ل سەری ھاتی و ھێشتا ژی ھەنە ھەمیان خیانەتا کوردی دیتیە و پرانیا وان بوینە قوربانیێن خیانەتا ھندەک ژ کوردێن خوەفروش . دەمێ دیروک دئێتە ڤەگێران بو ھندێ یە کوشیرەتان لێ وەربگرین و ئەوا خراب دووبارە نەکەین و یا باش باشتر بکەین و بنیاتەک موکم بێتەدانان , لێ ھندەک کالفام و فێسبوکباز و سێلفی گرو و بەرژەوەندی خواز و ترسنوک و خوفروشێن ئالیەک دیارکری کو ب گوتنا سەرکردێن وی ئالی و حەشدا شەعبی و سوپایێ ئیران و تورکیا و عیراقێ رێکەفتنەک گرێدا بو ھندێ ئاخا کوردستانێ رادەستێ پوستەلا داگیرکەرێن کوردستانێ بکەن ل زاخو بو خانەقین , ئەوێن فەر بو کو ل دیروکێ فێربن خیانەتێ نەکەن و وەلاتی بپارێزن و دەستکەفتیێن خەلکی بپارێزن , خیانەت ب شانازی زانی لێ چ پێنەچو ل سەرانسەرێ جیھانێ ڤێ خیانەتێ دەنگ ڤەدا وبونە مەتەلەک بو ھەر کەسەکێ خیانەتێ ل گیانەوەرەکێ بێ ئاقل ژی بکەت دێ بێژن توبویە خائینێ شازدێ ئوکتوبەرێ..
شانازی کرن ب خیانەتێ ل دەمەکێ دا ھات دەمێ ئەوێن ئەو کارە کری بو وان ب دروستی نەچو سەری و ل سحێلا و پردێ پێشمەرگەی داستانەک تومار کر و بەرەڤانی ل کیانێ سیاسی و دەستوری یێ کوردستانێ کر و شیا وێ پیلانا خیانەتکارێن کالفام و فێسبوکباز ژ ناڤببەن کو دڤیا فیدرالیەت نەمینیت و ببیتە (منتقت شیمال العراق ) . وەکی جاشێن بەرێ بناڤێ کوردێن ب شەرف و کەرامەت و ئازادی خواز حوکمی بکەن !
خیانەتا مراھقێن سیاسی ل شازدێ ئوکتوبەرێ دربەک مەزن ل کاروانێ چاکسازی و پێشڤەچونێ دا ل کوردستانێ و خوسارەتەک زور ژ ئالیێ ئابوری ڤە ب ب کوردستانیان کەفت , سەرەرایێ دورپێچێن سیاسی و ئابوری و سەربازیێن عیراقی و وەلاتێن ئیقلیمی . ئەو روژێن دیف شازدێ ئوکتوبەرێ دا ھاتی ئەنفال و جینوساید و فەرمان و مالوێرانکرن و روژێن رەش بون , نە ب ھنێرا پوستەلا حەشدێ بو, لێ ب ئەگەرێ خیانەتا کالفام و مراھقێن سیاسی بو . ئەو روژە فەرە بێنە ساخ کرن و پرسیارەک ژی بێتەکرن , ئەرێ خیانەت و دورپێچ و سوپا و حەشد و راوێژکارێن بیانی و راگەھاندنا دوژمنا دگەل یا خیانەتکارا کو ھەمی دژی کوردستانیێن ئازادی خواز رادوەستان , ب چ ئاوا ئەو روژە دەربازبون ؟ سوپاس بو خودایێ مەزن کو ئەو پیلانا ھاتیەدانان ل سەر کوردستانیان درباز بو و ھێدی ھێدی کوردستان یا ڤەدگەرێت سەر سککەیێ راست و دروست . لێرەدا فەرە رولێ پێشمەرگێ بەرەڤانی کری دگەل ھێزێن ئێمناھیێ و خەلکێ کوردستانێ نەئێتە بیرکرن کو خوە ژ بەر تەنگاڤیا وان روژێن رەش و گران گرت .
ھەروەسا رولێ سەروکێ حکومەتێ بەرێز نێچیرڤان بارزانی د ڤێ قوناغێ دا ب گروڤەیا دوست و دوژمنێن کوردان رولەک میحوەری بو و شیا ب سیاسەتا نەرم و واقعیانە ھەمی ئالیەکێ ڤەگەرینیت سەر مێزا دانوستاندنێ ھەروەسا وان پیلانان ھەمیان ژناڤببەت و دووبارە لاپەرەکێ نوی یێ پەیوەندیا ل گەل بەغدا و دەڤەرێ ڤەکەت و کریزا دارایی ھەتا رادەکێ زور چارەسەر بکەت و ئێمناھیێ بزڤرینیت و باوەرییا خەلکی دووبارە ب حکومەت و پەرلەمان و سازیێن گشتی ڤەگەرینیت , سەرەرایێ ڤەکرنا دەرگەھێن وەلاتێن مەزن ل سەر کوردستانێ تایبەتی فەرەنسا و ئەمریکا و روسیا و ئەلمانیا .
رولێ نێچیرڤان بارزانی ل پشتی خیانەتا مراھقێن سیاسی ل شازدێ ئوکتوبەرێ دا د چەند مەلەفێن گرنگ دا ب روونی دیار دبیت ژ وانا :
- پاراستنا کیانێ سیاسی و دەستوری یێ ھەرێما کوردستانێ ژناڤبرنێ و دوو ئیدارەییێ.
- ڤەگەراندنا باوەریێ بو خەلکی , و پاراستنا پروسا سیاسی ل کوردستانێ .
- بەرەف پێش برنا دبلوماسیەتا کوردی و ڤەگەراندنا پێگەھێ کوردستانێ .
- سڤکرنا کریزا دارایی ل سەر ملێن کوردستانیان و بەردەوامی دان ب چاکسازیێ.