دەست برن بو چارەسەریا کێشەیان ل عیراقێ دا ھەر پالدەرەک ھەبیت ژ بلی ئاقلیەتا ئێک دوو قەبولکرنێ و رێزگرتن و دەستور بجە ئینان و مافێ وەلاتی بون و پاراستنا کەسایەتیا تاکی ب ھەمی جوداھیێن نەتەوەی و ئولی و مەزھەبی و ھزری و حزبی و ئایدلوژیایی ڤە رامانا ھندێ ددەت کو کێشە دئێنە سرکرن و بو دەمەکێ کێم دئێنە نڤاندن و سەرش نیڤە دووبارە دبن و وەلات ریبریێ کێشێن مەزنتر دبیت ژ بیاڤێن سەربازی و سیاسی و ئابوری و پەروەردەیی و ھەتا روشنبییری و تائیفی و نەتەوەی و ب کورتی و کوردی کێشە ل دەروونێ تاکێ عیراقی ب رەنگێ بوماوەی (ویراسی) بو ماینە و ئەو و ئەوێ بەری وی و یێ دیف دا دئێت ھەمان کێشە ھەبوینە و گەھشتنە رادێ موستەحیلیێ کو ئەڤ کێشە چارەسەر ببن..لێ ئەگەر عادل بیت دەرفەتەک باش ھەیە وەک سەرکرداتیا کوردی دووپاتی ل سەر کری.
لێ ئەڤ چەندە رامانا ھندێ نادەت دەرفەت نەمایە بو چارەسەریا کێشەیان ل عیراقێ ب گشتی و تایبەت کێشەیێن ناڤبەرا بەغدا و ھەولێرێ , وەکی نێچیرڤان بارزانی سەروکێ حکومەتێ بەحس ژ ڤێ دەرفەتێ کری کو ھاتیە پێش بو بەغدا و ھەولێرێ کو ئەو کێشێن بو دەمێ سەد سالانە ناڤبەرا ھەردوو لایان دا چارەسەر بکەن دیف دەستورێ کو پرانیا عیراقیان دەنگ ل سەر دای ل سالا ٢٠٠٥ . ب ڤی ھەلویستێ سەرکرداتیا کوردی را دیار دبیت کو باوەریەک باش ھەیە د گورەپانا سیاسی یا کوردستانی دا کو پشتی ھەمی وان ئالوزیێن ھاتیە پێش ھەردوو ئالییان دەرفەت ھەیە ل سەردەمێ سەروک وەزیرێ راسپاردیێ عیراقێ عادل عبدالمھدی ھەر ھیچ نەبیت ئەو رەوشا سەربازی و دورپێچا ل سەر کوردستانێ و بێ باوەریا دروست بوی جارەک دیتر ھەردوو ئالی ب دیالوگەک سەردەمیانە و دیف دەستورێ عیراقێ کێشەیان چارەسەر بکەن.
بو ھندێ کورد دانوستاندن و کارەک باش و بەرژەوەندیا کوردستانیان ب پارێزن فەرە چەند پێگاڤان پاڤێژن ل بیاڤێن جودا جودا وەکی :
ئێک :
سەرەرایێ ھەلویستێ نە بەرپرسیارانە یێ ھندەک ئالیێن سیاسی کو دیر ژ ئێک رێزیا ناڤ مالا کوردی کار کریە ل بەغدا و ھەتا دژایەتیا زورەک ژ پێنگاڤێن دەربازکرنا ڤان کاودانێن ل ھەرێمێ ژی ھاتیە کرن ژ ئالیێ ھندەک کەسان ڤە , بەلێ فەرە سەرکرداتیا سیاسی یا کوردستانی ل گەل ھەمی ئالیەکێ ب ئێک دەنگ و ئێک رەنگ کار بکەن و مەترسیا رەوشێ و دەمی و کاودانێن دەڤەرێ ل پێش چاڤ بیت و ئەوا ب خوینا شەھیدا و خەباتا سەد سالان بەرھەم ھاتی نەکەنە گوری کێشمە کێشا سیاسی .
دوو :
زور گرنگە ھەمی پارتێن سیاسێن کوردستانی ل گەل حکومەتا ھەرێما کوردستانێ کار بکەت بو زڤراندنەڤا دبلوماسیەتا کوردی و ل دەمێ سەرەدان و پێشوازیا شاندنێن بیانی تایبەتی وەلاتێن ھەفسی و ئێکەتیا ئەوروپا و ئەمریکا بەردەوام نیەتا سافی و ئارمانجا کوردستانیان ل ئاشتیێ و چارەسەریا کێشەیان بو دیار بکەن و لوبیێ بو کێشا کوردی بکەن ل جھێ شکاندن و لێدانا ناڤ و دەنگێن ھەرێما کوردستانێ .
ئەڤ وەلاتە ب کارێ ھەفپشک و تەوافق و برایەتی و رێزگرتنێ جوان دبیت و بھێزدکەڤیت و بەرەف پێش دچیت , لەوما نھا فەرە کورد سەرەرایێ ھەمی کێم و کورتیان ل ئێک دوو ببورن و ئارمانجا مەزن کو پاراستنا کیانێ سیاسی و دەستوری یێ ھەرێمێ یە بپارێزن و بگەھینە کنارێن ئێمناھیێ .
ھەبونا کێشەێن خوەدی ژییەک سەد سالی ل عیراقێ دا ھیچ رەوانیە چاڤەرێ عادل عبدالمھدی بکەین چارەسەریەک رە و ریشالان بو ببینیت, بەلێ ھەبون و ھاتنە پێشا دەرفەتێ ھندەک جارن دیروکێ ل سەر ناڤێ کارەکتەرەک سیاسی تومار دکەت کو ھەتا دونیا ھەیە ناڤێ وی ل ناڤ سەرکردێن کاریگەرە دئێتە گوتن. نھا دەمێ بەحس ژ وێ دەرفەتێ دئێتە کرن ئەوا بو عادل عبدالمھدی ھاتیە پێش ژ ئالیێ نێچیرڤان بارزانی ڤە بو ھندێ دزڤریت کو ئەڤ کەسە خوەدی دیروکەک ھەتا رادەکێ باشترە ل ئەوێن پێش خو تایبەتی دگەل کوردان, بەلێ ئەڤ چەندە شفاعەتێ بو کوردان ناکەت ئەڤەر دوو پێنگاڤێت سەرەکی نەھاڤێژن بەری ھەر تشتەکێ ئەو ژی رێکخستنەڤا ناف مالا کوردیە بو ھندێ پێگەھێ کوردستانێ بھێز بکەڤیت و بەرەف پێش بچیت و ئەوا ب سەری ھاتی دووبارە نەبیت . ھەروەسا ھەمی ئالیەک کار بکەت ژ بال خوەڤە بو ھندێ کو کوردستان بھێز بکەڤیت ژ بەرکو کوردستانا بھێز واتا تاک و جڤاک و حزب و حکومەت و ئابور و سەرباز و سیاسەت و پەروەردا بھێز و پاشەروژا گەش و ئارام .