ئەو عورفەی لە بەغدا پێکهێندرا هەڕەشە لە عورفەکەی هەولێر دەکات
دڵشاد مسته‌فا وه‌سانی
پرسیار ئەوەیە لە هەردوو ئۆكتۆبەردا، قەباحەتەكان بەناوی كورد و پاراستنی یەكڕیزییەوە كران، لە هەمووی سەیرتر بۆ دەسكەوتی حزبی لە كوردستان، باس لە رێككەوتنی ستراتیجی نێوان پارتی و یەكێتی دەكەن، لە كاتێكدا لەسەر زاری هەندێ لە بەرپرسەكانیان، بە گاڵتەوە باسیان لە كۆتایی پێهاتنی رێككەوتنەكە كردووە، بەرلەوەی لە بەغدا لەگەڵ پارتی رێكبكەون و لە دواكاتی كۆتایی لێی پەشیمان ببنەوە و دواتر رێككەوتنی نهێنی بۆ وەرگرتنی پۆستی سەرۆك كۆمار بكەن، دەیانگوت بەپێی رێككەوتنی ستراتیجی سەرۆك كۆمار مافی یەكێتییە.
ئەو عورفەی یەكێتی لە بەغدا دایهێنا، هەڕەشەیەكی گەورە لەو عورفە دەكات كە ساڵانێكە لە كوردستان بۆ بەرژەوەندیی باڵا هەیە، بەڵام ئێستا كاتی ئەوەیە پێداچوونەوەیەك بكرێ، ئاخۆ ئەو عورفەی كوردستان، بۆ ئەوە بوو لایەنێك بەتەنیا رێككەوتنی ژێربەژێر دژی بەرژەوەندیی گشتیی كوردستان بكات؟ لە هەڵبژاردنی 1992 پارتی یەكەم بوو، بەڵام نیوە بەنیوەی قبووڵ كرد كە قێزەونترین شێوازی بەڕێوەبردن بوو، بۆ ئەوەی قۆناغی دوای هەڵبژاردن سەركەوتووبێت، كەچی شەڕی ناوخۆ روویدا، تا 25 ی ئەیلوولی 2017 پارتی لە زۆر مافی خۆی خۆش بوو، بۆ ئەوەی كوردستان بەو رۆژە بگات كە بڕیار لەسەر چارەنووسی خۆی بدات، كەچی باڵی دەستڕۆیشتووی یەكێتی لە 16ی ئۆكتۆبەر رێككەوتنی ژێربەژێری كرد و حەشدی شەعبی هێنایە كەركووك.
پرسیاری جدی ئەوەیە، ئایا لە دوای 2ی ئۆكتۆبەرەوە ئەو عورفە كاری پێدەكرێ؟ پێم وایە ئەو عورفەی لە بەغدا داهێنرا فیشەكێكی بە رۆحی عورفەكەی هەولێرەوە نا، بۆیە بۆ تاقیكردنەوەی شێوازێكی دیكە، پێویستە حكوومەت بەپێی مافی هەڵبژاردن، رۆڵی خۆی بگێڕێت و كۆتایی بەو پاشاگەردانییە بهێنێ كە بووە هۆی رێگری لە حكوومەت و یەكڕیزیی راستەقینە.
