بڕۆن بۆ لای بارزانی
دڵشاد مسته‌فا وه‌سانی
بەردەوامیی هاتن و چوونی شاند لە نێوان باڵەكایەتیی پایتەختی شۆڕشی كوردستان و بەغدای پایتەختی عێراق، بە لای جەماعەتی جەلالییەوە هەواڵێكی ناخۆش بوو، لەم بارەیەوە ئیبراهیم جەلال كە خۆی لەگەڵیان بوو دەڵێ:” لەگەڵ ئەو هەموو دڵسۆزی و خۆ گرێدانەی جەلالی بۆ بەعس و بە بەعسەوە، بەعس هیچ دەسكەوتێكی سیاسی ئەوتۆی لەسەر دەستی ئەو باڵە بۆ كورد نەدا بەدەستەوە”.
رۆژی 18ی كانوونی یەكەمی 1969 شاندێكی حكوومەتی عێراق دەگەنە كوردستان و دەبنە میوانی بارزانی، بەڵام رژێمی عێراق پێش ناردنی شاند بۆ لای مەلا مستەفا بارزانی، شاندێكی دیكەی پێكهێنا بوو بۆ ئەوەی بەو شار و شارۆچكانەدا بگەڕێن كە لەبەر دەستی رژێمدا بوون، مەبەستیان ئەوەبوو راو بۆچوونی هەندێ لە رۆشنبیر و كەسایەتییەكانی كورد بزانن، شاندەكەی رژێم یەكێ لەو كەسایەتی و نیشتمانپەروەرانەی لە سلێمانی بینیبوویان ئیسماعیل حەقی شاوەیس بوو، پێیان دەڵێ ئەگەر پارێزراو بم قسەی راستیتان بۆ دەكەم، ئەوانیش پێی دەڵێن چی دەڵێی بیڵێ، ئەویش پێی گوتبوون:”ئێوە لە خۆڕایی خۆتان ماندوو دەكەن، نە ئێمە و نە جاشە مۆدێل جۆراوجۆرەكان، هیچ لایەكمان نوێنەری گەلی كورد نین، ئەوەی بەڕاستی نوێنەری گەلی كوردە بارزانی و جەنگاوەرەكانی ئەون، ئەگەر لە رێككەوتن دەگەڕێن بڕۆن بۆ لای بارزانی، قسەی دوا قسە كە هەموو شتێك دەبڕێتەوە لای بارزانییە”.
ئەزموونی ساڵانی رابردوو دەریخست كە بەغدا چەند هەڵە بووە لە مامەڵەكردن لەگەڵ كوردستان، زیاتر بەدوای هەل و دەرفەتدا گەڕاوە، بۆ خۆدزینەوە لەرێككەوتنەكانی لەگەڵ كورد كردوونی، دوای 2005 بەغدا ساڵ بە ساڵ پشتی لە دەستوور كرد تا بارودۆخ بەتەواوی تێكچوو، دوای خیانەتی 16ی ئۆكتۆبەری 2017 بەغدا هێندەی دی زەمینەی بۆ خۆش بوو دژایەتی كورد بكات، ئەگەرچی لە ناوخۆی كوردستاندا هەندێ حزب هەموو توانای خۆیان بۆ نەهێشتنی سەرۆكایەتی هەرێمی كوردستان تەرخان كرد، بەغدا و ئەو حزبانە چاوەڕێی ئەوەیان دەكرد، خەڵكی كوردستان بە هۆی ریفڕاندۆمەوە بارزانی و پارتی سزا بدات، بەڵام بە پێچەوانەوە گەل لە دوو هەڵبژاردندا بارزانی و پارتییان خەڵاتكرد، بەغدا و حزبەكان پێیان وابوو بە نەمانی سەرۆكایەتی هەرێم، سەرۆك بارزانی هیچ رۆڵێكی نامێنێ، بەڵام پەند لە رابردوو وەرنەگیرا، بارزانی هەر بارزانییە، باشتر وایە بۆ چارەسەری و یەكلاییكردنەوەی كێشەكان بڕۆن بۆ لای بارزانی.
