جەنابێ سەرۆک بارزانی دئێکەم ڕوژا دەست پێکرنا ھەوا ھەلبژاردنان کو روژەکا پیروز بوو ل دەڤ ھەمی کوردستانیان ئەو ژی ڕۆژا (١١) ئەیلولێ یە کو دبیتە سال ڕوژا ھەلگیرسانا شورشا مەزنا ئەیلولی, ئەڤ ڕۆژە ھاتە ھەلبژاردن ژبۆ دانەنیاسینا بەربژێرێن پارتی دیموکراتی کوردستان ل ھەولیرێ وبارزانی د ووتارا خۆدا کەرم کر وگوت: (نابیت وان سوز وپەیمان ب خەلکێ بدەن یێن ھوین نەشێن جھبجھبکەن).
ل بەر روناھیا ئەڤێ گوتارا پڕ بھا یا سەرۆک بارزانی, پەیامەکا کورت وگرنگ ئاراستەی بەربژێر و بەرپڕسان کر ھەر وەکو دڤی بارودوخێ نوکە یێ ھەرێما کوردستان تێدا دەرباز دبیت د بێژینە بەربژێران دراستگوو بن و ڤێ گوتنا مەزنان ژبیر نەکەن یا دبێژیت,( ھەزار گوتن گوری کریارەکێ ببن).
دڤێت ئەم پارتی و ھەمی بەربژێرێن مە وێ چەندێ بزانن نوکە دەمێ ھندێ یە دگەل ھەڤولاتی و گەلێ کوردستانێ دراستگوو بن و ب وێرەکانە بریاران بدەن وپەنجێن خۆ دانینە سەر برینێ و وان کێشە و کێم وکاسیان بەحس بکەن و بەرچاڤ بکەن وبەحسێ ھندێ بکەن کو دڤێ کوردستانێدا کی یە دشێت کوردستانێ بەرڤ کەنارێ سەرکەفتنێ ببەت, ئێدی ھەڤولاتیێن کوردستانێ تێر بوینە ژ گوتنێن تەیسوک وبریقەدار وھزار پسیار د سەریدا دلڤلڤن, چونکە تا نوکە ھەر گوە ل ھندەک سوز وپەیمان وگوتنان بوینە ژپارت ولایەنێن سیاسی وگوتارێن بەربژێران, ئێدی ئەو باوەر ژ گوتان ناکەن وماندی بوینە ب ڤان کاران ڤە تا کار گەھشتیە وێ رادێ بەربژێر تنی نەشێن سەد کەسان کوم ڤە بکەن و بو باخڤن, چونکە ئەو باوەریا دناڤبەرا بەربژێری و دەستھەلاتێ وخەلکیدا نەمایە و بەرەڤ لاوازیێ چوویە, خەلکی باوەری ب گوتن وسوز وپەیمانێن بەربژێری وپارت ولایەنێن سیاسی نەماینە, خەلک ب رەنگەکێ ئاشکرا دناڤ بازار ومێزگەرد وھەمی کومبونێن جڤاکیدا بەحسێ وێ بێ باوەریێ دکەن, لەوما دڤێت بەربژێر و ھەمی لایەنێن سیاسی ژڤی قالبی دەربچن وراستگویانە و رونتر بەحسێ گیروگرفت وئاستەنگان بکەن, و پتر شور ببنە دناڤ جەماوەریدا ونەک بتنێ بۆ بدەست ڤەئینانا دەنگان, بەلکو بۆ ھندێ باوەریا تاکێ کورد ڤەگەریت وباوەری ب دەستھەلاتێ ھەبیت, و پێکڤە دگەل ھەڤولاتیان ل رێکێن چارەسەریێ بگەرن, دڤێت بەربژێر و بەرپڕسێن لایەنێن سیاسی بەحسێ گەندەلیێ وگوندەلکاران بکەن و رێکێن بن برکرنا وێ دابرێژن بۆ ڕھھەلکێشانا ڤێ ئێشا کوژەک, کو ڕۆژ ب ڕۆژێ قەلەوا قەلەو دکەت و لاوازا لاوازتر دکەت, بەحسێ بەرتیلی و (واستە)کاریێ و خزم خزمانیێ بکەت, ورێکێ لێ بگرن, بەحسێ بێکاریا لاوان وگەنجان ودەرچویێن زانکو پەیمانگەھان بکەت و رێکێن چارەسەریێ و دەلیڤێن کاری بۆ ببینیت,بەحسێ کێم وکاسیێن نافخۆ وھەرێما کوردستانێ بکەت ھوکارێن پەیدابونا وان کێم وکاسیان دەست نیشان بکەت وچارەسەر بکەت, بەحسێ ھندێ بھێتە کرن کو دۆژمن دنێرینگەھان و بوساندانە داکو ھەرێما کوردستانێ بکەن گورەپانا کێش وبێشێن خۆ, بەحسێ قەیرانا ئابوری بھێتە کرن و رێکێن چارەسەریا بو ببینن, ودڤێت بزانین پێشکەفتنا وولاتان ب ژێرخانەکا ئابوری یا بھێز دھێتە پێشڤەبرن, ودڤێت بزانین ل شوینا دورستکرنا پرۆژێن ئاڤاسازی(بیناسازی),گرنگی ب کەرتێ کشت وکال وپیشەسازی وگەشتیاری وژێدەرێن ئاڤێ بھیتە دان, کارگەھێن مەزن بھێنە دورستکرن داکو ب ھزاران کارکەر تێدا کار بکەن, یاسایا کاری بۆ کەرتی تایبەت بھێتە دەرکرن داکو کەرتی گشتی و تایبەت وەکو ئێک تێدا خودان ماف بیت وخەلک بەرێ خۆ بدەتە کەرتێ تایبەت و گڤاشتن ل سەر کەرتێ گشتی سست ببیت, بڤێ ئێکێ دێ دەلیڤێن کاری زور بن وخەلکێ بەر ل دامەزراندنێ نابیت و بەرێ وان ل موچێ سەرێ ھەیڤێ نابیت.
گوتنا سەرۆک بارزانی ھەر ئەڤ رامانە ژێ دچیت, دەمێ گوتی وان سوز وپەیمانان بدەن یێن ھوین دشێن جھبجھبکەن, ئەگەر ئەڤە ھاتە کرن وخەلک فێری ھندێ بوو کو بەربژێر وپارت ولایەنێن سیاسی دگەل وان دراستگونە, بێگومان خەلک دێ باشتر شێت لیست و بەربژێرێ وان باوەری پێ ھەی ھەلبژێریت.
خەلکی ئەڤە چەند سالە ئەو تێبینی کریە کو ئەو سوزوپەیمانێن بەربژێر ولیست ددەن نەشێن جھبجھبکەن و بتنێ گوتنن, لەوما ھاتیە گوتکن(ھزار گوتن گوری کریارەکێ ببن), چونکە دەمێ نەھێنە جیھبجکرن بتنێ گوتنن ژدەڤەکی دەرکەفتینە وبێ کریار.
سەرۆک دپەیاما خۆدا بەربژێرێ مە ھشیار دکەت,ودەتە پاش ژسوزوپەیمانێن نەھێنە جھبجھکرن,ئەڤە ژی وەرچەرخانەکە و دێ گورینێ دگەل تشتاندا چێکەت و ئێدی بەربژێری ماف نینە ھندەک گوتنێن وەسا بکەت کو نەک ئەو بەلکو پارتا وی ژی نەشێت جھبجبکەت, بەلکو دڤێت بەربژێر بزانیت کو پارتا وی پرۆژەک ھەیە ودارێژتیە ودڤێت ھەمی بەربژێر پابەندی وی پرۆژەی بیت.
ل دوماھیێ دڤێت بۆ خەلکی رون ببیت کو بتنێ دابینکەرێ ئاڤەدانیێ وئارامیێ و بەرگیریا سەرخستنا مافێن نەتەوەیی یێن گەلێ کوردستانێ, مافێن کەمایەتیان یێن ئاینی ونەتەوەیی وسیاسی بتنێ جەنابێ سەرۆک وپارتی دیموکراتی کوردستان ولیستا١٨٣ێ یە, چونکە دوریشمەکێ راستەقینە یێ بلندکری(بنیات نانا کوردستانەکا ب ھێز), واتە کوردستان بەرڤ ئارامیێ وئاڤەدانیێ وھرێمەکا ب ھێز دچیت.