عیراقا پشتی سالا ٢٠٠٣ ل سەر پرەنسیپێ تەوافقێ ھاتیە بنیاتنان و ل دەستورێ عیراقا نوی ژی دا کو پتر ژ ٨٠% وەلاتیان دەنگ بو دایە ل سالا ٢٠٠٥ ھەمان دیتن بو عیراقا پاشەروژێ ھەیە کو دڤێت ھەمی پێکھاتە سەرەرایێ ھەبونا جوداھیێن نەتەوەی و مەزھەبی و ئولی دڤێت ب ئازادی و یەکسانی و سەربەخو ل عیراقێ دا بژین پشکداربن ل رێڤەبرنا وەلاتی. ب جە نەئینانا دەستوری وەکر کو وەلات ھەمی ریبریێ کریزێن ئابوری و سیاسی و جڤاکی و بکار ئینانا ھێزێ بیت ل کریزێن نافخوی دا و داویێ عیراق ل جھێ ھندێ بەرەف پێش بچیت سەدان پێنگاڤان بەرەف پاش ڤە چو !
ئێک ژ وان نەریتێن دەستوری ئەوە کو سێ پوستێن مەزن ل وەلاتی دا بێنە پارڤەکرن ل سەر سێ پێکھاتێن سەرەکی شیعە و سوننە و کورد , پوستێ سەروک کومار بەر ب کوردان دکەڤیت دیف عورفەکێ دەستوری کو ئیدی بێ ئێک و دوو ھاتیە ڤەبرین بو کوردان . ئەرێ د ناڤ کوردان دا ژی ھاتیە ڤەبرین بو ئالیەکێ دیارکری ؟ ئەڤە ئەو پرسا ئەوا نھا بیە جھێ گەنگەشە و کێشمەکێش و ھەتا جورە ئالوزیەکێ ژی د ناڤبەرا دوو ئالیێن سەرەکی یێن کوردستانی پارتی دیموکراتی کوردستان و ئێکەتیا نیشتیمانی کوردستان پەیداکریە. دیف ریکەفتناما ستراتیجی ئەوا د ناڤبەرا پارتی و ئێکەتیێ ھەبو کو نھا وەک رەسمیات نەماینە پوستێ سەروک کوماری بەرامبەر سەروکێ ھەرێمێ بو . لێرەدا پشتی مرنا سەروک مام جەلال و دەست بەرداربونا سەروک بارزانی ژ پوستێ سەروکێ ھەرێمێ و پارڤەکرنا دەسەلاتێن سەروکێ ھەرێمێ ب سەر سازیێن بجە ئینان و دادوەری و یاسادانانێ , نھا دا پارتی خوە بێ بار دبینیت ل ڤی پوستی . ئەنجامێن ھەلبژارتنێن (١٢/ ٥) پارتی وەک مەزنترین پارت ل سەر ئاستێ ھەرێمێ و عیراقێ دەرکەفت و ب ھەمی شیان کار دکەت نھا پوستێن کو چوار سالێن چوی ل سەر بنیاتێ تەوافقێ ب ئالیێن دیتر دای و بوینە رێگر ھەمبەری پروژێن پارتی وەربگریت و ب جێگرێ سەروکێ پەرلەمانی دەست پێکر و نھا ب بەربژێکرنا فواد حسێن بو پوستێ سەروک کوماری و چونا شاندا پارتی ب سەروکاتیا جێگرێ سەروکێ پارتی نێچیرڤان بارزانی و ئەنجامدانا چەند کومبونێن گرنگ ل گەل حەکیم و عەبادی و عەلاوی و مالکی و فەیاز و عامری و سەدری ب دیتنا من چوار خالێن گرنگ دیار بون ل ڤان کومبونان دا :
- بو ئالیێن عیراقێ زورگرنگە پارتی ب ھێز ڤە کار بکەت ل عیراقێ دا , تایبەت حکومەتا عیراقێ ئەڤ چەندە زور پێ باشە ژ بەرکو پارتی ل ھەرێمێ دەسەلاتدارا پلە ئێکە و ب ڤێ چەندێ ھاریکاری و ھەماھنگی ناڤبەرا ھەردوو حکومەتان دێ بھێز کەڤیت .
- دیار بو ئیدی پارتی پوستێن بەغدا دێ بکار ئینیت بو پرسێن نەتەوەی و نیشتیمانی و گرنگیا وان پوستان بو دیار بو تایبەت دەمێ دیتی ئەو پوست ژ بال کوردان ڤە دژێ وێ دئێنە بکار ئینان .
- ئەو پارتا پتر کار بو سەربەخویێ و خو ل بەر سینگێ تاکرەویا بەغدا ددەت پارتی یە , لەوما نھا ئیران ژی ل گەل وێ ئێکێ یە و ب گرنگ ژی دزانیت کو پارتی ل گورەپانا سیاسی ل بەغدا رولێ خوە ببینیت .
- داخازکرنا پوستێ سەروک کوماریێ ژ بال پارتی ڤە ل مەزایدە و گەڤاشتنان دەرکەفت و بیە جدیات و سنورەک بو وێ چەندێ ھاتە دانان کو پارتی گرنگیێ ب بەغدا نادەت , ئیدی ھەر پوستەک ھەبیت بو کوردان فەرە ب ئوکیێ پارتی دەرباز بیت .
پرس نەکرنا ئێکەتیێ ب پارتی ل سەر دیارکرنا بەرھەم سالح بو پوستێ سەروک کوماریێ ڤە جھێ پرسیارێ بو , ژبەر کو ھەردوو ئالیی پشتی ھەلبژارتنان ل سەر وێ چەندێ رێککەفت بون کو ب ئێک شاند و ئێک پروژە و دیتن بەرەف بەغدا بچن . بەلێ دیار بو ئێکەتیێ دڤیا ھەم بەرھەم و ھەم سەروکاتیا کومار ب ئێک جار دەست بکەڤن ! بەلێ پارتی ژی وەک ھەڤرکێ سەرەکی یێ سیاسی یێ ئێکەتی نھا کەفتیە یاریەکا گەرم یا ب دەست ئینانا ڤی پوستی و دڤێت وێ چەندێ بو ھەمی ئالیەکێ بێژیت فەرە ھەر ئێک دیف سەنگا خو کار بکەت و پوستا وەربگریت و بریاران بدەت .
ل داویێ دەربازکرنا ڤێ قوناغێ دکەڤیتە سەر ملێن ھەردوو پارتێن سەرەکی و دڤێت ل سەر پروژەکێ گشتگیر رێکبکەڤن کو سێ خالێن سەرەکی ب خوەڤە بگریت:
- پلە و پوست و سەروبەرێ کەرکوک و دەڤەرێن رەسنێن کوردستانی ل ماددێ (١٤٠) و گرنگە پروژەکە و کەسێن ھەژی ڤێ دەڤەرێ و ڤێ قوناغێ بێتە دەست نیشانکرن و دارێشتن تایبەتی ژ بال ئێکەتیێ ڤە , بو ھندێ ئەوا پشتی شازدێ ئوکتوبەرێ بیتە لادان ل سەر دەڤەرێ.
- گرنگی دان و پێش ئێخستنا پروژێ ھەردوو لایان .
- پارڤەکرنا پوستێن بەغدا دیف سەنگا ئالیێن سیاسی یێن کوردستانی.