وەرگرتنا بەرپرسیاریێ د چ ئاست و پلە و پوست بیت د جڤاکان دا ب درێژاھیا دیروکێ دا یا بێ رەخنە و تان لێدان و گازندە نەبویە , تایبەتی ژ بال وێ تەخێ ڤە کو د ژیواری دگەھن و پێکولا ئەلتەرناتیفەکێ باش بو وەلاتی دکەن . یان ئەو کەسێن دڤێت ب لێدانا وەتەرێ رەخنێ و ھاندنا خەلکی ب وێ بگەھن ئەوا کو خەلک بخوە و پێشیێ ئەو رەخنێ ژێ دگریت ! ھندی دونیا و حکومەت ھەبویە پشکەک ھەبوینە بێ دەنگ بوینە ل سەر کارێن حکومەتێ و ھندەک ژی بەرەڤانیکەرێن دەسەلاتێ بوینە و یا دیتر ژی رەخنەگر بوینە ب نیەتێن باش و خراب .
دەسەلاتداریا کوردی ل سالا ١٩٩٢ ھەتا نھا ل چارچوڤەکێ سیاسی و ئابوری و سەربازی و پەیوندیێن دەڤەرێن یێن تێکھەل و مەترسیا چەند ئالیی دەرباز بویە , زێدەبارێ ھەبونا دەھان کێم و کورتیێن جودا کو فەرە بکەڤنە بەر رەخنێن ھەمی ئالیان بو ھندێ بەرەف باشتری و حوکمەکێ رەشید بچیت کو ھەژی ڤان قوربانیان بیت کو گەلێ کورد ب درێژاھیا دیروکی گوری ڤێ ئاخێ کری .
ئەوا جودا کو دئێتە دیتن ل ناڤ رەخنەگرێن کوردستانێ دا ھەبونا جێگر سەروک وەزیر و وەزیر و رێڤەبەرێن گشتی و بەرپرسێن بلندە د دەمەکێ دا پشکەکن ژ ڤی ئەزمونی ب باش و خرابی ڤی ! ئەرێ یا رەوایە پێنچ کەنالێن ئاسمانی ژ بال حزبەکێ ڤە بێنە رێڤەبرن و داویێ بێژیێ حکومەت گەندەلیێ دکەت ؟ ! ئەڤە ئاخ باراندنە ب سەر سەرو چاڤێن خەلکی ڤە.وەکی وێ بانگەشا ھەلبژاردنێ ئەوا جێگرێ سەروکێ حکومەتێ دکەت بەرێز قوباد تالەبانی کو ب سەدان دەفتەر دولاران ل بانگەشێ ددەت و کەسێ دوویێ ل ناڤ حکومەتێ و ل ئالیێ دیتر د کەمپینێن ھەلبژارتنێ دا دەست ب تانە لێدان و رەخنە و گازندا دکەت ل حکومەتێ ! ئێ قوربان ئەگەر تو رەخنە بگری ! گەنج و روش و روتی وەلاتی چی بلێن ؟ ئەگەر ھەموو تشتەک تە ھەیە و رەخنێ دگری ! ئەرێ رەخنان ژ کی بگرین ؟ و کی بەرپرسە ؟ کی بەرەڤانیێ ل کار و چالاکی و خزمەتێن حکومەتێ بکەت ؟ ئەرێ ل چ مودیلێ سیاسی ل دونیایێ دا ھەیە د ئێک دەمدا حکومەت و رەخنەگر ژی بی ؟ ئەرێ ئەگەر راست بێژی بوچی سالێن چوی ئەڤ دروشمە تە نەکرنە کریار ؟ ئەڤە و دەھان پرسیارێن دیتر دھێنە کرن ل سەر وان کەسێن ب پارێن حکومەتێ کەیفێ دکەن و رەخنا ژی لێ دگرن .
د کابینا پێنجێ دا کو ب کابینا تەوافقی و چار سالێن ئارامیی دھاتە نیاسین لێ تەوافق و ئارامیا سیاسی و بێ باوەریا ناڤ ئالیان کێم بو و داھێنانا ھەری تازە ژی ھاتیە گورەپانا سیاسی یا کوردستانێ دا ئەو بو پارت ھەبو د ئێک دەمدا د حکومەتێ دا بو و رەخنەگر و ئوپوزسیون ژی بو! ب راستی ل ھاولاتیان ژی تێکچوبو ئەرێ چاوا دبیت بەرپرس ب پلا وەزیر و بلندتر رەخنەگر بیت ؟ ئەڤ چەندە کەفتە بەر رەخنا بەرێز نێچیرڤان بارزانی سەروکێ حکومەتا ھەرێما و راگەھاندا (بەردەوام رەخنەگرتن ب ساناھی ترە ل بنیاتنانێ ) رەخنەگرتن ب ساناھی یە و دئێـتەگرتن بو مەرەمێن حزبیێن تەسک لێ بنیاتنان و ئاڤەدانی و بەرپرسیاریا روژێن نەخوش و دەمێن نازک و مەترسیدار ب زەحمەتە , کو دیار بو پشتی روژێن خیانەتا شازدێ ئوکتوبەرێ ھەر لایەک دیف سەرێ خوە کەفت و کورسیێن وەزیرا چول و ھول بون !
رەخنەگرتنا جێگێرێ سەروکێ حکومەتێ ل حکومەتا ھەرێما کوردستانێ ب راستی جھێ ل سەر راوەستیانێ یە و نەبویە تشتەک ب ڤی ئاوایی دەسەلات ل بەر دەستێ تاکەکێ بیت و رەخنان بگریت . ب دیتنا من ھەبونا دووفاقیا سیاسی ل کوردستانێ دا تایبەت ل دەف وان بەربژێر و پارتێن پشکەک ژ دەسەلاتێ و رەخنان ل حکومەتێ دگرن بو چەند خالان ڤەدگەرێت :
- ب کێم دانانا دەنگدەری ! کو ئەڤ چەندە فەرە ببیتە ھوکارێ ھندێ کو دەنگدەر ل وان کەسان بێتە دەنگ و بتنێ ڤێ گوتنێ بێژیتێ ( تو پشکەکی ل وێ ئەوا تو باس ژێ دکەی). و ئەم ب گوتنێن بەریقەدار ل سەرداناچین .
- خو دانانە جھێ ئوپوزسیونێ ب پارە و مال و مولکێ گشتی ! کو ئەڤ چەندە ژی ل ئیفلاسا سیاسی دئێت .
- نەبونا ئەزمونا سیاسی زور بەربژێر و ئالێین سیاسی ژی ھوسا پالداینە کو ھەمی بابەتان تێکەل بکەن و نەزانن چ ب چ گەھشت و ئەو خوەدیێ چیە و چ دڤێت و کی بویە و دڤێت ببیتە کی.
- ھەتا نھا زور جاران ئازادی و سەربەخوی و کومکرنا دەنگان ب وێ چەندێ ڤە ھاتیە گرێدان کو حزب و ھەتا کەسایەتی ژی رەخنە و تان و گازندان ل حکومەتێ بدەن , بدیتنا من ئەڤ چەندە ژی ھێدی ھێدی ل جڤاکی دەردکەڤیت .
- ب راستی تەکنەلوجیایێ ھەمی رێک گرتینە و ناھێلیت ھەر کەس و ئالیەک خوە ژ بیربکەت و ب دەنگێن کەسێن دلسوز بگەھیتە مەرامێن خوەیێن تایبەت کو د بەرژەوەندیا بلندا وەلاتی دا نەبن .