د ئەزمونا بیست و حەفت سالێن رابوری ل کوردستانێ دا زورترین رەخنە ل ئەدایێ حکومەت و پەرلەمانی ھاتینە گرتن ژ بال خەلکی ڤە و بەردەوام داخازیا باشتریێ دکر کو ئەڤ چەندە دیتنەکا رەوایە ل ھەمی دونیایێ لێ یا نەرەوا ئەوە کو حکومەەت ب خوە ژی ئوپوزسیون بیت !! د سیستەمێ سیاسی یێ کوردستانێ دا کو نیڤ ب نیڤە ل ناڤبەرا پەرلەمانی و سەروکایەتی دا رێکەک باش ب سازیا یاسادانێ پەرلەمانی ھاتیە دان کو رولێ خوە یێ یاسادانان و چاڤدێری و باوەری دان و لێوەرگرتن ھەبیت . ئەڤێ گرنگیێ وەکر کو ھەمی ئالیەکێ بەرێ وان ل سەد و یازدە کورسیکێن پەرلەمانی بن .
د چار پێنج سالێن دەربازبوی دا کو پرانیا ئالیێن سیاسێن پەرلەمانی کو ھژمارا کورسیکێن وان ل سەد کورسیان دەرباز دبو پشکداری حکومەتێ بون و ھەمی ئالیەک ھەڤرا بون ل سەر (چار سالێن ئارامیێ ) و بریار بو کو ب پرنسیپێ تەوافقێ کار بکەن و خوە ژ وان ئاستنگان دەرباز بکەن کو درێکێ دا ھەبون. لێ ئەو گوتن ھەما وەکی وێ چەندێ ژێ ھات دەمێ دبێژن (سەد گوتن گوری کریارەکێ بن ) و ل سەر ئەردی چ بجە نەھات و بگرە درزێن مەزنتر ژی کەفتنە ناڤ ئالیێن سیاسی دا , و پرانیا پارتێن سیاسی ژی نەکرە نەمەردی و پێیەک ل حکومەت و پێیەک ل ئوپوزسیونێ دا بون !! ئەڤ چەندە ژی بویە سەرئێشەک مەزن بو خەلک و حکومەتا ھەرێمێ و ھەتا ل شروڤەکارێن سیاسی ژی تێکچو بو ژ بەرکو ھندی دونیایێ بگەری ل ئاڤاکرنا حکومەتان دا رێککەفتن ل سەر بەرنامەکێ تایبەت ھەیە بو ھندێ خزمەتا وەلاتیان بکەن , لێ ل ڤی وەلاتی و کابینا چوی پێیەک حکومەت ئێک ئوپوزسیون ! روژەک سپی و ئێک رەش ! ئێکێ باش و ئێکێ خراب !!...ھتد.ئەڤ چەندە بەروڤاژی ھەمی سیستەمێن سیاسی یێن دونیایێ یە .
ھەتا زور جاران ئەڤ چەندە دبو جھێ رەخنێ ژ ئالیێ سەروکێ جڤاتا وەزیران ژی ڤە ژ بەرکو کار وەکی پێتڤی ب رێڤەناچیت ئەگەر پارتێن سیاسی ئەجندایێن تایبەت ڤەگوھێزنە ناڤا کابینا حکومەتێ و گەلەک جاران دووپاتی ل سەر وێ چەندێ کر ھەر پارتەکا نەرازی و دڤێت ببیتە ئوپوزسیونەکا ئاڤاکەر رێک ڤەکریە . بەلێ ئەڤ چەندە ھاتە رەتکرن ھەتا وێ روژا ل ھەمی ئالیەکێ ل حکومەتا کوردستانێ قەومی و دورپێچ و شەر و دوژمنایەتی و بێ سەروبەری پرانیا ئالیان بریار دا کو حکومەتێ بجە بھێلن ! براستی ئەڤ ھەلویستە فەرە ل بەر چاڤێن پارتێن مەزن بمینیت و نابیت بێ مەرج پشکداری ب پارتێن دیتر بێـتەکرن .
پرس ئەوە ئەرێ دێ پەرلەمان و حکومەت وەکی بەرێ بن , یان دێ د پەرلەمانی دا فراکسیونا حکومەتێ ھێتە ئاڤاکرن و حکومەتا ئێک دوو پارتان بیت؟
بدیتنا من دیف چاڤدێری کرنا وێ رەوشا ھەی ل گورەپانا سیاسی و ئەو گوھرینا ھەفکێشا و دەربازکرنا وێ سالا توندا سیاسی و سەربازی و دبلوماسی و ئابوری ژ بال حکومەتا ھەرێمێ ڤە بێ ئەوان ئالیان و ھەروەسا ئەو ھەلویستێ نەیێ رەوا و نە نەتەوەی و نیشتیمانی کو ھاتیە ھاڤێتن ژ ئالیێ ھندەک پارتێن سیاسی ڤە و خوە ل حکومەتێ ڤەکێشا د دەمەکێ دا کو کیانێ سیاسی و دەستوری یێ کوردستانێ ل بەر گەفا نافچونا ئێک جارەکی بو و داخازا نەمانا ھەمیێ دەستکەفتیان د ھاتە کرن . ئەو پارتێن کو رێکەک باش و دەرفەتەک مەزن ھەبو بشێن کاریگەریێ خوە دیار بکەن و کارەک مەزن بکەن کو بشێن گورەپانا سیاسی پتر نیزیکی ئێک بکەن بونە فاکتەرێ پتر ئالوزیا زێدەبارێ ھندێ کو سەروکێ حکومەتێ دیف گروڤەیا سەرکرداتیا وان پارتێن ل حکومەتا تەوافقی دا پشکداری گەلەک پشتەڤانیا وان دکر . سەرەرایێ ھندێ ژی پارتی و ئێکەتی ل بەغدا ژی پرانیا کورسیان بدەست ئینا , دیر دبینم کو د ڤێ کابینێ دا ھەمی ئالێن کوردستانی کار بکەن بو ئاڤاکرنا حکوەتەکێ نیڤ گاڤ د حکومەتێ دا و نیڤ گاڤا دی ل گورەپانێن نەرازیبونێ دا ھەرچەندە ئەم دگەل وێ چەندێ نینە کو حکومەت گوھێ خوە بو خەلکی ڤەنەکەت لێ ئەم دگەل بجە ئینانا وی کارنامێ ینە کو حکومەت بریارێ ددەت ل کابینا بھێت دەست بکەت کو بجە بینیت .