پشتی ریدانێن خیانەتا شازدێ ئوکتوبەرێ رەوشەکا سیاسی و سەربازی و ئێمناھی و ئابوری و سەر ئاستێ پەیوەندیێن نافخوی و دەرڤە و پێگەھێ ھەرێمێ ھاتە روژەڤێ . پرانیا رەھا ژ ئیراقی و پشکەک زور ژ ئالیێن کوردی ژی ھوسا تەخمین دکر ئیدی ئەو کیانێ سیاسی و دەستوری یێ بناڤێ ھەرێما کوردستانێ ئیدی بویە تشتەک رابوری وەکی ئیمپراتوریەتا ئوسمانی زەلامێ نەخوشێ دەستپێکا سەد سالیا بیستێ و ئێکەتیا سوڤیەتا داویێن ھەمان سەد سال ! ئیدی ھەرفی ئەڤ کیانە و یێ زیرەکە و خوەدی دیتنەک ستراتیژیکە و شیان ھەن جھێ خوە ل (شیمالێ ئیراقێ) ب پلە و پوستەکێ بکەت!!دەمەک بو ب راستی پێشبینیا ھندێ د ھاتە کرن کو رەوش ب ڤی ئاوای و خرابتر ژی بسەرێ کوردستانێ بێت , بەلێ سوپاس بو خودێ پشتی ھنگی بو پێشمەرگەی قەھرەمان کو شیان سنورەکێ بو ڤێ پیلانێ دانێن ل سحێلا و پردێ .
ل سەر وان کاودانێن ئالوز کو دژی خواستەکێن خەلکێ کوردستانێ بون , وی دەمی من گوتارەک بناڤێ (مەوسمی حەج نیە!) نڤیسی کو بتێر و تەسەلی ل سەر سەرەدانا شاندێن جودایێن کوردی ئاخفتم و وێ گوتنا ئێک ژ شروڤەکارێن نیزیک ژ حەشدا شەعبی دەمێ گوتی بەغدا وەکی حەجێ ژێ ھاتیە بو شاندێن کوردی! ب راستی وی دەمی و ھەتا نھا ژی ( گەردی مە ھەبا ئیتیفاقەک ..) ئەڤە ب سەرێ مە نەد ھاتە و بەھرا مە نەدبو جینوساید و ئەنفال و دەربەدەری و دەردەسەری و رەڤین و کوشتن و وەریسێ سێدارێ ...
(وتلک ایام نداولھا بین الناس) نھا رەوش بەروڤاژی بویە ب تمامی و حەجا ئەوان د گوت ھاتیە ھەولێرێ! ئەڤ چەندە ھێشتا سالەک ب سەر ریدانێن شازدێ ئوکتوبەرێ دەربازنەبویە , رەوشا سیاسی و ئابوری و سەربازی و ئێمناھیێ و ل سەر ھەمی ئاستەکێ سەد ل سەد ھاتیە گوھرین و ب ئانەھیا خودێ پاشەروژەک گەش و روونتر و بھێزتر و موکمتر و ب بنگەھی تر ل پێشیا مەیە ب مەرجێ (ئێکگرتن و براتی و ل خوەزڤرین و چاکسازی و زانینێ.... ) .
پشتی راست ڤە بونا ئاراستێ سیاسی و دبلوماسی و ئابوری ل کوردستانێ نھا ھەولێر بو ھەمی ئالیەکێ بویە جھێ گرنگی پێدانێ و بێ ھەولێر و سەرکرداتیا سیاسی یا کوردی چ حکومەتەک ل بەغدا ئاڤ نابیت . پارڤەبونا ناڤ مالا شیعی بو سەر دوو بەرەیێن جودا ( عەبادی و مالکی) ئەمریکا و ئیران! رولێ کوردان ھێشتا گرنگتر کریە و ب ھەبونا ئێک فراکسیونا کوردی کو دێ شێست کورسی ھەبن دێ ھەمی ھەفکێشێ گوھریت و بیتە داوی بلوکێ ئاڤاکرنا حکومەتێ و نھا ژی دیار دبیت کو شاندێن دەرڤە و نافخوی بەردەوامی دئێن بو ھندێ کورد پشتەڤانیێ ژێ بکەن بو وەرگرتنا پوستێ سەروک وەزیران و ئاڤاکرنا مەزنترین فراکسیونا پەرلەمانی .
بو ھندێ کورد ببیتە داوی بلوک بو ئاڤاکرنا حکومەتا ئیراقێ فەرە چەندین داخازی و پروژە ھەبن بو ھندێ ئەو شاشی و نە حەقی و ستەم و بنپێکرنا دەستوری ئەوا ل سالا (٢٠٠٣) ھەتا نھا بەردەوام دژی کوردستانێ ئێتە کرن دووبارە نەبیت و ئیدی دەستور وەکی خو ب ئێک پاکێچ بێتە بجە ئینان . سەروبەرێ دەڤەرێن کوردستانیێن رەسن ژی راستڤەبکەن و ئەو داگیرکاری و ئەرەبکرن بێتە راستان .
شاشیەکا گەلەکا مەزن و مەترسیدارە ئەگەر کورد بەر خاترا ئەمریکا یان ئیرانێ... یان بەرژەوەندیێن حزبی و کەسی بچیتە دگەل ھەفپەیمانیەکێ دا . پروژە و گەرەنتی جھێ کوردان ل ھەفپەیمانیا دا دکەت . ئەگەر خوشباوەری و مەردینی و بەر خاترا ڤی و یێ دیتر و بەرژەوەندیا ڤەی و یێ دی و بزنس بیت وی دەمی ل پازدە سالێن رابوری چ ب سەرێ کوردان ھاتیە ل بەر دەستێن شیعەیان چار سالێن دیتر دێ خرابتر لێ ئێت .