دوو روویاتى چییه؟
کارزان فەقێ
ئه‌گه‌ر حزبه‌ك د گه‌رمه گه‌رما خوه‌نیشانێن خه‌لكێ هه‌رێمێ دا خوازا هه‌لوه‌شاندنا حكومه‌تێ بكه‌ت و پێشنیارا پێكئنانا حكومه‌تا رزگارییا نشتیمانى بكه‌ت، ره‌نگه زۆر نۆرمال بیت، لێ ده‌ما هه‌مان ئه‌و پارتێن نه‌رازى دگه‌هنه ده‌مێ هه‌لبژارتنا و گهورینا حكومه‌تێ، بزاڤا پاشخستنا هه‌لژارتنان دكه‌ت، دبێژنێ ڤێ یه‌كێ دوو روویاتى، واته بخوه پارادۆكسیه‌ك دڤان دوو هه‌لوێستێن ڤان ئالییان دا هه‌یه، ل ده‌مى دخوازن حكومه‌ت بهێته هه‌لوه‌شاندن و ئه‌و حكومه‌تا ئینقازیا نشتیمانى پێكبینن، دهه‌مان ده‌م دا ئه‌و ل دژى پێشنیارا خوه یا ئێكێ د رواستن و هه‌ول دده‌ن ده‌مێ ڤێ حكومه‌تێ جاردن بهێته درێژكرن و هه‌لبژارتن بهێته پاشخستن، ئه‌ڤه ئێك ژ نیشانێن منافقێ عه‌یار بیست و چار.
دوو:
ده‌ما بۆ جارا ئێكێ ده‌مێ ڤێ كابینه‌یا حكومه‌تێ هاته درێژكرن، سه‌ر ئه‌زمان و بن ئه‌زمانێ ڤان ئالییان نه شه‌رعیبوونا ڤێ حكومه‌تێ بوو، لێ هه‌ر سه‌رۆكێ ڤێ حكومه‌تێ ب ده‌ستهه‌لاتێن خوه ده‌ما هه‌لبژارتنان ده‌ست نیشان كرن، هه‌لبژارتن ژى واته گهورینا ده‌ستهه‌لاتى و زڤرین بۆ رایا ملله‌تى، كه‌واته جاره‌كا دن ئه‌ڤ ئالیێن نه‌رازى و دژه حكومه‌ت وه‌كو دوو روو دیار دبن، جاره‌كێ به‌حسا نه‌شرعیبوونا ده‌ستهه‌لاتێ دكه‌ن، جاره‌كێ ژى هه‌ول دده‌ن ئه‌ڤ نه‌شه‌رعیبوونا كابینا حكومه‌تێ بۆ جارا دووێ ده‌مێ وێ بهێته درێژكرن.
سێ:
چار ئالیێن نه‌رازى هه‌ڤپه‌یمانییه‌ك درستكر بۆ پشكدارى كرن د حكومه‌تا ئیراقێ دا، ددهمهكى دا ئه‌و حكومه‌ت ئه‌گه‌رێ هه‌موو وان قه‌یران و كێشه‌یێن دارایى و ئێمناهیێن ئیراقێ و هه‌رێما كوردستانێ یه، ب سه‌ر بلندى ژى دبێژن، پارتى بتنێ رێكا به‌غدایێ نزانیت، به‌لكو ئه‌م ژى باش وێ رێكێ دزانین. ددهمهكى ئه‌ڤ ئالیه پشكدارێن حكومه‌تێ بوون و ل داوییا ته‌مه‌نێ حكومه‌تێ ژ به‌رپرسیاریێ ره‌ڤین، دوو روویاتى د ڤێرێ دا یه، تو ژ به‌رپرسیاریا حكومه‌تا هه‌رێما كوردستانێ ب ره‌ڤى و شه‌رى بكه‌ى ژبۆى كو پۆسته‌كى ژ حكومه‌تا ئیراقێ وه‌ربگرى.
چار:
ئێك ژ هێمایێن دى یێن منافقیێ ئه‌وه، ده‌ما بێ مووچه‌یى و قه‌یران دروست دبیت، هه‌موو ئالیێ بێ دوو دلى تلێ تۆمه‌تێ بۆ ناڤ چاڤێ حزبا ده‌ستهه‌لاتدار درێژ دكه‌ن، وێ مافێ ژ وان وه‌رناگرین، لێ ده‌ما ره‌وشا دارایی یا خه‌لكێ كوردستانێ باشتر دبیت و حكومه‌تا هه‌رێمێ به‌شه‌ك ژ وێ پاشكه‌فتا هه‌یى ل سه‌ر مووچه‌یێ فه‌رمانبه‌ران رادكه‌ت، دڤێت ئه‌ڤه ژى ژ بۆ وێ حزبا ده‌ستهه‌لاتدار بهێته هه‌ژمارتن، لێ ده‌ما باشى و خرابیێ حكومه‌تێ بێژن نه‌خێر، وى ده‌مى بیێ دوو دلى ئه‌و منافقێ عه‌یار بیست و چارن.
پێنچ:
بۆ هه‌موو ئه‌و دۆرپێچ و سزایێن ژ لایێ به‌غدایێ ڤه هاتبونه سه‌پاندن ل سه‌ر هه‌رێما كوردستانێ، پارتى و حكومه‌تا هه‌رێما كوردستانێ ژ لایێ حزبێ زۆنا ره‌نگاو ره‌نگ دهاته تاوانباركرن، لێ ده‌ما پارتى و سه‌رۆكێ حكومه‌تێ نێچیرڤان بارزانى شیاى هه‌موو وان دۆرپێچان بشكێنیت و به‌غداى نه‌چارى دانوستاندن و هنارتنا مافێن دارایی یێن هه‌رێمێ بكه‌ت، دڤێت وى ده‌مى ژى دانپێدانێ ب وێ دبلوماسیه‌تا سه‌رۆكێ حكومه‌تێ بكه‌ین، كو مه دانپێدان نه‌كر، وى ده‌مى ئه‌م دوو رووینه.
