رۆشنبیر و سیاسیەکانی سلێمانی دیموکراتیان لە جنێوفرۆشی و تۆمەت هەڵبەستندا کورت هەڵێناوە، لای ئەوان چەندی جنێو بە خەڵک بدەی و تۆمەت هەڵبەستی، ئەوەندە باشتر لە دیموکراتی حاڵی بووی و ئەوەندەش زیاتر پابەندی بە بنەماکانی دیموکراتی، بە واتایەکی تر لای ئەوان دیموکراتی بریتییە لە تێر کردنی حەز و ویستەکانی خۆت، ئەگەرچی ئەو حەز و ویستانە نەگریسیش بن و بە پێشێل کردن و زەوت کردنی حەز و ویستی خەڵکی تریش بێنەدی.
رۆشنبیر و سیاسیەکانی سلێمانی جیا لە بە کلتوور کردنی جنێوفرۆشی و تۆمەت هەڵبەستن، هەرچی کاری وەک هەڵکوتانە سەر بارەگا حزبی و حکومیەکان و سوتاندنیان بە دیموکراتی ناو دەبەن و دەڵێن: ئەوە حەز و خواستی خەڵکە و نابێ رێگا لە حەز و خواستی خەڵک بگیرێ، واتا پێیان وایە ئەوەی ئەوان بیخوازن دیموکراتییە و هەر کەس و لایەنێکیش رێگایان لێبگرێ دیکتاتۆرە.
بەو پێوەرەی رۆشنبیر و سیاسیەکانی سلێمانی کە بۆ دیموکراتیان داناوە، کردەی تیرۆریش جۆرێکن لە حەز و خولیای هەندێ کەس و دەستە و گرووپ و دەکەونە چوارچێوەی دیموکراتی و ناکرێ رێیان لێ بگیرێ، ئەوکاتیش تیرۆریستان دەبنە دیموکراتخواز، بەو پێوەرەش هەر یەک لە مەلا ئیسماعیل سوسەیی و بانگخواز سەلیم شوشکەیی دەبنە دوو لە دیموکراتخوازە هەرە پێشکەوتووەکان.
جیا لە سوسکەیی و شوشکەیی ناکرێ ئەبوبەکر بەغدادیش لەو جۆر دیموکراتیە دەرباوین کە رۆشینبیر و سیاسیەکانی سلێمانی دایانهێناوە، بەوەش ئەبوبەکر بەغدادی دەبێتە سۆپەر دیموکراتخواز، ئێ ئەو داماوەش چی بکات؟! حەز و خولیاکان لێک جیاوان، ئەویش حەزی لەوەیە خەڵک سەر ببڕێ و ژن و کچی خەڵک بە غەنیمەت بەرێ و بە ئارەزووی خۆی کڕن و فرۆشتنیان پێوە بکات.