ئەنجامێن ھەلبژاردنێن دوازدێ ئایارێ ب تەمامی نەھاتیە قەبولکرن و کێشمە کێشم ل سەر ھەیە و ھەتا نھا ژی ژ بال دادگەھا فیدرال نەھاتینە پەسەندکرن ژ بەر وان گومان و سکالایێن ئالیێن نەرازی ل تەڤایا عیراقێ و بریارا دووبارە ھژمارتنا دەستی بو دەنگێن چەندین سندوقان کو ھەتا نھا دیف زانیاریان ھژمارا دەنگێن لیستان وەک وێ رێژێنە کو د پروسا ئەلکترونی دیار بوی و گوھرینێن مەزن دروست نەبوینە.
ئەگەر بابەت کوردینی یە دێ بیتە بابەتێ جھێ و پرس و بەرسڤ و ئاخفتنێ دناڤ گەلێ کورد دا , ل سەر ڤێ چەندێ شروڤەیەکێ بدەینە کەتواری کو دەڤەر و عیراق و کوردستان تێدا دەرباز دبن. وەلاتێن ھەرێمی ھەر ئێک ژ تورکیا و ئیران و سعودیە کو دشیان دا ھەیە کاریگەریێ ل سەر عیراقێ بکەن ل سەروبەرەک نە ئارام و ھەتا رادەیەکێ ل فەوزایەکا سیاسی و ئەمنی و ئابوری دا دەرباز دبن و ئەو کاریگەری و شیان ل سەر گورەپانا عیراقێ نەمایە کو دبەرێ دا ھەبو, تورکیا دەھان کریزان ژ شەرێ پەکەکێ و گولەن و سوریێ و داکەفتنا بھایێ لیرە و نەمانا ئازادیان ب رەنگەک جورا و جور و بەر سینگێ وێ گرتیە..ئیران ژی کەفتیە ناڤ گرانترین کریز دا ژ بەر وان مەزاختنێن ل سوریا و یەمەن و عیراقێ کریە و ھەروەسا دورپێچا ل سەر کو بویە ئەگەرێ بێھێزکەفتنا بھایێ ھەمی تشتەکێ ل ئیرانێ دا . سعودیە ژی نھا کریزا یەمەنێ بویە کابوسەک بو وێ و ھەفپەیمانێن وێ و ھەروەسا ئەو گوھرینێن کو محمد کورێ سەلمانی دکەت ..سەرەرایێ دەھان کریزێن دیتر کو ئەڤ سێ وەلاتە ڤەگرتی زێدەتر بریارا عیراقی ددەتە ئاڤاکرنا حکومەتا چاڤەرێکری.
ژ ئالیەک دیتر ڤە عیراق کەفتیە ناڤبەرا نال و بزماران کو ب ئالیێ کی میحوەری ڤە بچیت , ھەروەسا خونیشاندانێن کو نھا بەروکێن حکومەتا عیراقێ گرتی ب مەزنترین کریزا عیراقێ دئێتە ھژمارتن د نھا دا ژ بەرکو ل دەڤەرێن شیعە مەزھەبە و چو سنورەک نەھێلا ژ بلی وەرگرتنا مافێن خوە .ھەروەسا ناڤ مالا شیعی ژی پێنچ پرتێن مەزن و چەندەکێن بچیک و دەھان میلیشیات و مەرجەع لێ پەشینە و داعش ژی سەر ژ نوی سەرھلدایە ڤە .
ئەڤە کەتوارێ کو وەلاتێن ھەرێمی و عیراق تێدا دەرباز دبیت و بگرە ھێشتا سەروبەر خرابتر و چاڤەرێ دئێتە کرن دەڤەر بەرەف کاودانێن خرابتر بچیت ژی . لێرەدا رەوشا ھەرێما کوردستانێ ژی ل یا دەڤەرێ باشتر نینە ژ ئالیێ سیاسی و ئابوری و رێکخستنا ناڤ مالا کوردی ڤە . لێ ئەگەر پرسیارەکێ ژ خوە بکەین و بێژین ھەرچەندە دێ ب پرسیارەک دیر ژ مەنتقی ھژمێرین , ئەو وەلاتێن مە ئاماژە پێدای خوەدی سەروەری و سنورێن خوەیێن تایبەتن و ھەر چ ب سەرێ وان بێت ل داویێ دا ھەر خوەدیێ دەولەتا خونە و مە عیراق دیت ئێک ل سەر سێ پتر کەفتە بن دەستێ داعشێ ھەر مایەڤە دەولەت , ئەرێ رەوایە ئالێن کوردی ژی دیف بایێ ھەرێمی و عیراقی بچن ؟ بدیتنا من یا سادە بو کەتوارێ دەڤەرێ ب ھیچ ئاوایەکێ نابیت کورد وەسا ھزر بکەت ل سەر کورسیەک کێم یان زێدە ناڤ مالا خو تێک بدەت و بریارێ بدەت رێکێ بو دوژمنان ڤە کەن ئێدی ئەو نیڤ سەربەخویا ھەیی ژی ل دەست بچیت ژ بەرکو ھەتا کوردستان نەبیتە دەولەت فەرە ئالیێن کوردستانی بو پاراستنا ئەڤا ب دەست ڤە ھاتی بپارێزن ب ھەر بھایەکێ ھەبیت .
لێرەدا ئەگەر بابەت کوردینی یە بو ھەر ئالیەکێ سیاسی ل کوردستانێ دا فەرە پێگیر بیت ب ڤان سێ خالان تایبەت کورد یێ بەرەف قوناغەکا نوی ژ عیراقێ دچیت پشتی شازدێ ئوکتوبەرێ و گوھرینێن عیراقێ و دەڤەرێ دا :
- پێنگاڤا ئێکێ و فەرە ل سەر ھەمی ئالیێن کوردستانی یە ب تایبەت پارتێن دەسەلاتدار (پارتی و ئێکەتی) پێکولێ بکەن وان گومانان ب نیەتەک سافی و سەرەدانێن برایانە لابدەن و دووبارە پەیوەندیێن سیاسی ڤەگەرنە سەر رێکا راست و دروست کو د خزمەتا کوردستانێ دا بن , جارەکا دیتر فەرە ھەمی ئالی ڤەگەرن سەر مێزا دانوستاندنان و باوەری بو ناڤ ئالیێن سیاسی ڤەگەریت . چەندین جاران ئەڤ چەندە ھایتە دووپاتکرن ژ بال نێچیرڤان بارزانی سەروکێ حکومەتێ ڤە بو ھندێ کو فەرە ھەمی ئالیێن سیاسی ئێک رێز بن بو دەربازکرنا ڤێ قوناغێ .
- پێنگاڤا دوویێ کو نھا دا راگەھاندنا ئەنجامان نیزیک بویە , حزبێن کوردستانی ب ھچ ئاوایەکێ نابیت ھزر ژ ھندێ بکەن ھەر ئێک و سەرێ خو بەرەف بەغدا بچن ژ بەرکو ب ئێک دەنگی ل خولا چویی پێکولێن زورینە و کێمینە ھاتنە کرن و چەند بریارەک ھاتنە دەرکرن دیف ڤی پرنسیپی , دێ ب چو ئاوا بیت ئەگەر ھەر پارت و سەرێ خو چو بەغدا ؟ ب راستی جھێ پرسیارێ یە و کەسێن ئێکێ ل حزبان بەرپرسن ل ڤان بریارێن سەقەت ئەگەر بێنەدان ب ئێک دەنگی نەچنە بەغدا. زور رەوایە ھەڤکری و پێکولکرن بو دەست ڤەئینانا زورترین دەنگی و راکێشانا ھەستێ دەنگدەری بو خو ل ناڤ کوردستانێ بەلێ ب ھیچ ئاوا نابیت ب پرت پرتی چونە بەغدا رامانا ھندێ ددەت کو بابەت نە کوردینی یە بەلکی بابەت پلە و پوستە .
- پێنگاڤا سیێ کو فەرە ھەمی ئالیێن سیاسی یێن کوردستانی ب ھەفکاریا حکومەتا ھەرێما کوردستانێ ب پروژەک کوردستانی نەتەوەی و ب بنیات و ستراتیجی کو تێدا پێکولا ڤەگەراندنا وان مافان بێتە کرن ئەوێن ب ئەگەرێ خیانەتێ و کومبونا دوژمێن نافخوی و دەرڤە ل دەڤەرێن کوردستانی ل دەست چوی , سیاسەت خێرکرن نیە بەلکو سیاسەت زانست و ھونەر و تەکتیک و زیرەک و شارەزایی و ستراتیج و بەرنامە و پروژە و خاندن و دیتنا پاشەروژێ و مفا وەرگرتنە ژ رابردوی , لەوما نابیت کورد ب خوشباوەری رێککەفتنێ ل گەل چو ئالیەکێ بکەت بێگرنتی و نڤیسن و مەرجێن پێش وەخت .