دەما وەلاتەک دکەڤیتە ژێر گەفا تیرۆرێ و مەترسیێن ژناڤچوونێ، ئیدى هەموو سازى دکەڤنە د خزمەتا بیاڤێ لەشکەرى و سەربازى دا، نموونە ژ بۆ ڤێ مژار گەلەکن، نزیکترین نموونە ژى د ڤى بیاڤى دا دەما تورکیا هێرشی عەفرینێ کر، هوونەر و مەدیا تورکیا، ئایین و مینبەرێن مزگەفتان هەموو ئەو شەرعییەت دا سوپا و حکومەتا تورکیا کو د سنورێ وەلاتێ خوە دەر بکەڤیت و عەفرین و هندەک دەڤەرێن کوردستانى ل رۆژئاڤیێ کوردستانێ داگیر بکەت، د گوتارێن هەینیێ دا پتر ژ ٨٠ هزار مزگەفت ل وى وەلاتى شەرێ داگیرکرنا عەفرینێ ب جیهاد ناڤکرن و گەنج و ساربازێن وى وەلاتى هاندا شەرى دژى کوردان بکەن، واتە هەتا ئەردوگان شیا شەرەکى ل دەرڤە سنورێ خوە بکەت و دەنگێ نەرازیێ خەلکێ تورکیا بلند نەبیت، پەنا ژبۆ مینبەرێن مزگەفتان بر، پشتى ڤێ یەکێ ژى ئەو سەرکەفتنا خوە ب سەرەدانا خوە ل گەل هەردوو ستران بێژان سیپەل جانێ و ئیبراهیم تاتلیسى پیرۆز کر، ئیدى دبێژنە ڤێ یەکێ هیچ تشتەکێ ناڤا وەلاتى ژ پاراستنا ئیمناهیا نەتەوى یا وەلاتێ تە مەزنتر و گرنگتر نینە. تەماشەى دیرۆکا ئیرانێ بکەن، ل سالا ٦٥٢ێ زایینى ئیران ژ لایێ وەلاتێن عەرەبی هاتە داگیرکرن، پاشان دەستەلاتا دەرەکى ب شێوازێ حکومکرنا خەلیفەیێن بەغدا ب سەر ئیرانێ دا بۆ چەند سەدەیەکان بەردەوام بوو، لێ دەمێ ئیران ل سەردەمێ فەرمانروایی یا یۆنانییان ل ژێ دەستێ عەرەبان هاتە رزگرکرن، د ئێکەم پێنگاڤدا وان رەسەنایەتیا خوە و سەربەخوویی یا خوە ژ عەرەبان ب رەتکرنا مەزهەبێ سوننى و چێکرنا مەزهەبێ شیعى نیشاندا. واتە ئیرانییان نەڤیا ژلایێ مەعنەوى ژى ئەو داگیرکرى ببن، لەورا پشتى ئازادیا سیاسى وان ئایین ژى گوهارت، لێ ژ بۆ مە شەرمەزاریە ئەگەر مەلایەک تشتەک د بەرژەوەندا کوردستانێ بێژت و مخالفى ئیسلامێ بیت، ئەو مەلایێ کو پەسنا کارەکێ حکومەتێ بکەت و ل گەل پرسا سەرخەبوونا کوردستانێ بیت، ب دیڤەلان ک دهێتە ناڤکرن و ب سەدان فەیسبۆکڤان دێ هێرشی کەنێ و شەرمزار دکەن.کەواتە چما ژبۆمە شەرمزاریە ئەگەر مەلایەک ل سەر مینبەرێ مزگەفتان پەسا پێشمەرگە و سەرۆک و حکومەتاخوە بکەت؟ تێنا گەهم بۆچى ئەو مەلا و سترانبێژێن تورکیا ب قارەمان دهێنە ناڤکرن تنێ ژ بەر کو وان پشتەڤانییا ئەردووگانى کریە کو شەرى ل دەرڤەى سنورێ وەلاتێ خوە بکەت، لێ ژ بۆ مەلا ئیحسانەک شەرمزارییە ئەگەر د گوتارێن خوە دا پشتەڤانیا سەرکردە و پێشمەرگەیان بکەت ژبەرکو وى سەرۆکى و پێشمەرگەى هزار مینبەران پاراستیە، کەواتە جوداهیا هێزا تورکیا و لاوازیا کوردان د ڤێرێ دایە، تورک گەهشتینە وێ باوەرێ کو هەتا کو سنورێن وان ئارام نەبت، تاعەت و دینێ وان ژى پاراستى نابیت، کەواتە بەرى ئەو بەرگریێ ژ ئایین و کەلتورێ خوە بکەن، ئەو پشتەڤانیا وێ هێزێ دکەن کو ژ بۆ وان بوویە پەرژان و مینبەرێن وان دپارێزێت. ئااین و کەلتوور و هوونەرێ خوە ژ بۆ بەرژەوەندا وەلاتێ خوە بکاردئینن، لێ یامە هەرتشت گۆرى هزرێن توندرەو کریە. ل دەستپێکا هاتنا داعشێ بۆ کارەکێ رۆژنامەڤانى چووبومە ناڤا پێشمەرگەى، وى دەمى وەفدەکێ ئێکەتیا زانایێن ئایینێ ئیسلامێ و ئەوقافا دهۆکێ سەرەدانا سەنگەرى کربوون، من ددیت کو مەلا ئیحسانێ ریکانى کو سەرۆکێ ئێکەتیا زانایێن ئایینێ ئیسلامێ تایێ دهۆکێ ، ب هەیەجانڤە دکرە هەوار کو هوون شەرى بکەت دلێ مە و مینبەرا مە پشاڤانى تل و جەلەبکا تڤەنگا هەوەیە، هەر وى دگۆت هون شەهیدن و ژ مرنا خوە نەترسن هوون یێ ژ بۆ پاراستنا هزاران مزگەفت و ب سەدان هزار نڤێژکەر و موسلمان شەرى دکەن، ژبلى کو هوون هەموو پێکهاتەیێن دى دپارێزن، من ب چاڤێن خوە دیت کو ب گوتارێن خوەیێن ئایینى مۆرالا پشمەرگەى بلند دکر، د هەمان دەمدا مەلا هەبوو ل کوردستانێ دگۆت ئەز نکارم بێژم پێشمەرگە شەهیدە و وى مافى نادەمە خوە بێژم داعش کافرە. تەماشەى ڤێ جوداهیێ بکەن، ئیدى خەلکێ مە یێن وەکو مەلا ئیحسانى ب دیڤەلانک ناڤکر و مەلایێن توندرەوێن کو ماف نەددانە خوە دژى داعشێ ب ئاخڤن بوونە راستگۆ و وێرەک. لەورا ئەز دبێژم کوردستان ژ بۆ بهیزبوونا پێگەهێ سیاسى پێدڤى ب مەلایێن وەکو ئیحسان رێکانى یە ژ بەرکو ئەو ل هەمبەر هەموو وان گەفێن نە رەوا راستى گۆتن، لێ ئەو ئیرهابا فکریا دگەل بزاڤا گۆرانێ هاتی؛ ئەو کەلتور و فەرهەنگە ل گەل خوە ئینا کو هەر ئێکێ ژ حکومەتێ رازى بیت، ئەو مەلاق و موستەفیدە. داوى کۆنگرەیا ئیکەتیا زانایێن ئایینێ ئیسلامێ ل کوردستانێ و گوتارا سەرۆکێ حکومەتێ نیچیرڤان بارزانى ئاماژەیێن گەلەک باش دناڤدابوون ژ بۆى کو مامۆستایێن ئایینى و هێزێن ئێمناهى ب هەڤرا دژى هزرا توندرە و ب راوستن، سەرۆکێ حکومەتێ باش گەهشتیە وێ باوەرێ کو ئەو توندو تیژیا دناڤبەرا شیعە و سوننى یا دا هەیە د وێ ڤالاتیێ دەرکەفتییە کو مامۆستایێن ئایینى یێن شیعە و سوننى یان نەشاینیە رۆلێ خوە ببینن، لەورا بارزانیێ سەرۆک وەزیر د کۆنگرا مامۆستایێن ئایینى دا گۆت، پێدڤییە پەروەدەریا ئایینى ببیتە ژێدەرێ پێگەهاندنا نڤشەکێ ئاشتیخاز و ئارام ژبۆى کو لێبۆرین و هەڤدوو قەبولکرن ببیتە پشکەکێ سەرەکى د ژیانا جڤاکێ مە دا