تیرور بکار ئینانا توندو تیژیێ یە ب ھەمی شێوازێن خوە ڤە ژ ئالیێ گروپ یان پارت یان دەولەتێ ڤە بو گەھشتن ب ئارمانجەک تایبەت و ژ ناڤبرنا ھەڤرکێن خو. تیرور نە یا گرێدایە ب چ ئول و مەزھەب و تائیفە و نەتەوە و رەگەزێن تایبەت ڤە و گرێدانا تیرورێ ب ئولەک یان مەزھەبەک یان نەتەوەک تایبەت ڤە واتا زێدەتر ئەڤ پرسە ئالوز دبیت و تیرور بێ ئولە و پرسەکە ب چەندین فاکتەرێن جودا ڤە گرێدایە و ئول کریە خیمەک بو کارێن خویێن ھوڤانە , بەلکی ھەر ئالی و کەسێ توندوتیژیی تایبەتی دژی سڤیلان بکار دئینیت دکەڤیتە بن خانەیا تیرورێ دا و تیرورستە و فەرە وەک تیرورست سەرەدەری دگەل بێتەکرن ب پالدەر و جێ بەجێ کار ژی ڤە .
تیرورێ رەە و ریشالێن کەڤن ھەنە و ب ھزاران کریارێن کو د دیروکێ دا تومارکرینە دکەڤنە بن وێ پێناسێ کو تیرور پێ ھاتیە ناسکرن .ل دیروکا کەڤن بگرە ھەتا یا نوی کریارێن ھوڤانە و تیرورستیانە ھەبوینە. د دەستپێکا سەد سالیا بیست و ئێکێ دا جیھان ریبریێ پێلەک ژ کریارێن تیروری بو تایبەت پشتی (١١سپتمبەرا - ٢٠٠١ )و ھەتا نھا مەزنترین مەترسی سەر مروڤاتیێ تیرورە ژ بەرکو ژێدەرێن وێ د زورن و گەلەک کەس و ئالی و گروپ و ھەتا دەولەت ژی شێوازێن تیرورستی دگەل پشکەک ژ وەلاتیێن خوە بکار دئینیت و ئەوا دژی کوردان دئێتەکرن دکوردستانا مەزن دا ژبلی تیرورێ چ ناڤەکێ دیتر ب خو ڤەناگریت.
سەرھلدانا قاعیدێ ب سەرکرداتیا ئوسامە بن لادن و ئەو مەترسی و خرابکاریا بدیف خو دا ئینای ل ھەمی جیھانێ بەس نەبو , داعش ژی سەرھلدا ب سەرکرداتیا ئەبو بکر بەغدادی کو کریارێن ڤان تیرورستی ھەمی جیھان توشی حیبەتیێ . سەرھلدانا ڤان گروپان دەھان فاکتەر ھەنە و نھا بەحس ھەمیان ناکەین , ژ بلی ھندێ کو بزانین بوچی گەنج دبیتە تیرورست ؟
ھێرشا ل سەر بینایێ پارێزگەھا ھەولێرێ کو ژ ئالیێ سێ گەنجێن کورد ڤە ھاتە ئەنجام دا, باشترین گروڤەیە کو بزانین بوچی گەنجەک ل دەستپێکا ژیێ خوە دا یێ بەر ھەڤە دژی وەلات و خەلکێ خوە خو بکوژیت؟!
ژ فاکتەرێن ھەری سەرەکی کو گەنج دبیتە تیرورست تایبەت ل ناڤ جڤاکێ مە دا و ئەوێن دقێن ئولێ ئیسلامێ دکەنە ھیجەتەک بو لێدان ل بەرامبەرێ خو ,
- نەبونا سەربورێن ژیانێ وەکریە کو زورەک ژ گەنجان ب دوو شورڤەێن کەسێن (تکفیری) ئانکو ئەوێن خەلکی ب کوم کافر دکەن ب بسلمان ژی ڤە .دەست ب کارێن تیرورستی بکەن و ئەو سێ گەنجێن ھێرشی پارێزگەھا ھەولێرێ کری ژیێ وان (١٦ بو ١٨) سالی بو ب راستی ژیەکە نەیێ ھندێ یە چو بریارەکا چارەنڤیسساز بدەت , ب چو ئاوا دێ بریارێ ل سەر جیھادێ دەن کو ئەگەر ھەمی بنەمایێن جیھادێ ژی ھەبن نابیت کەسێن کێم ئەزمون ڤێ بریارێ بدەن.
- خاندن و گوھدانە وان کەسا کو خەلکی پالدەن بو جیھادێ و توندوتێژیی .زورەک ژ وان کەسێن ئیسلام و سیاسەت و خەبات و جیھاد و رابونەڤا ئیسلامێ ل گەل ئێک تێکھەل کری و بو خو پێ زەنگین کرن و پێشخستن و دیارکرنێ , دەھان بەرھەمێن نڤیسی و تومارکری ھەنە گەنجێ بسلمان پالدەن بو جیھادێ دژی کافرا !! کو بدیتنا وان ھەر کەسێ د حزب و گروپێ وی یێ ئسیلامی دا نەبیت نە ل سەر ئیسلاما راست و دروستە!!ئەڤێ چەندێ رولەک بەرچاڤ ھەیە د بلاڤکرنا ھزرا تیرورێ دا . ژ وان کەسێن بوینەداعش ھەمیان ھزرا حەرەکی ھەبویە و قەرەزاوی دبێژیت (ئەبوبەکر بەغدادی ئیخوان بو) واتا حەرەکی بون وحەماسی بون واتا سەر کێشان ب توندوتیژیێ ڤە.
- زورەک ژ مینبەرێن مزگەفتا ژ ئالیێ کەسێن حزبی و حەماسی و حەرەکی و جیھادی و تەکفیری دئێنە بکار ئینان بو بلاڤکرنا ھزرێن توندرەو و ھەتا تیرورستی . د کونگرێ ئێکەتیا زانایێن کوردستانێ دا رولێ مەلا و زانایێن ئولی ب بلند ھاتە بەحس کرن ژ بال نێچیرڤان بارزانی و داخاز ژ مەلایان کر کو رولێ خوە ببینن بو پاراستنا ئێک رێزیا ناڤ مالا کوردستانی و پێکڤەژیانا ھەمی ئول و مەزھەب و نەتەوێن ناڤ کوردستانێ .ھەروەسا داخاز ژ مەلایان ھاتیە کرن کار بکەن بو گەھاندنا پەیاما ئولێ ئیسلامێ بەختەوەری و خوشگوزەرانی و ئارامیێ .
- نەبونا دەرفەتێن کاری ژی زور ژ گەنجێن بەتال و بێ کار کرینە نێچیرا گورگێن دژی وەلاتی و بێ کاریی و ھەژاری و نەبون و بێ ئەزمونی ژ خوگرتن ل بەرامبەر کریزان , گەنجی ب دەرفەت دبینن و ب وەتەرەک دینی دێ گەنجی ریبریێ چارەنڤیسەک تاری کەن و ئەو کەسێن ھاندەر و کورێن وان ژی وەک تەماشەکەر دمینن . وەک ئەو زانایێ ل وەلاتەک دەوروبەرێ سوریێ گەنج بەرەف جیھادا پیروزا ل سوریێ فرێدکرن و کورێ وی ژی بویە ئێک ژ وان کەسێن ب گوتارێن وی کاریگەر بوی و ب نامەکێ بابێ خو یێ زانا ئاگەھدار کر کو ئەو ژی وەکی ھەمی گەنجێن دچنە جیھادێ حەزدکەت بەحەشتی بیت , بەلێ بابێ وی یێ زانا ب سەدان تەلەفون و واستە و ھیڤی و داخازی و خو چەماندنا کورێ خو ژ فروکەخانێ دەربازکر و نەھێلا بچیتە ئەوێ بحەشتێ کو ل جیھادێ پێڤە دئێت !!! ئەگەر جیھادە و راستە بوچی ئەو زانایێ تەکفیریێ کورێن خەلکی ب کوشتن ددەت , بوچی ناھێلیت کورێ وی بچیتە بەحەشتێ؟؟