زورجاران تاکێ کورد وێ رەخنێ ژ سەرکرداتیا سیاسی یا کوردستانی دگریت کو ل دەمێن بێھێزکەفتن و داکەفتن و ھەرفینا عیراقێ نەشیاینە مفای ژ وان دەرفەتێن زێرین وەریگرن و کاروانێ رزگاریا کوردستانێ ب ئارمانجا داویێ کو سەربەخویە بگەھینن. لێرەدا دێ بەحس ژ وان دەرفەتان کەم کو ھاتینە پێش کوردان تنێ ل سەردەمێ حوکمرانیا شیعەیان ل سالا ٢٠٠٣ وەرە ھەتا نھا ژی کو کورسیکا حوکمێ وان تەقولوق بویە. ل دەمێ ھەرفینا سەدامێ دکتاتور ٢٠٠٣ کورد خوەدی حکومەت و پەرلەمان و دەزگەھێن رەسمی بون و عیراق بەرامبەردا ب سەروبەرڤە ھەرفت و بەرئێک ڤە ھەلوەشیا و سەرکردێن ئوپوزسیونا وی دەمی چ نەما خوە ژی کومبکەن ژبلی وەلاتەکێ وێران سەرکردێن سیاسیێن کوردستانێ شیان عیراقیان کومبکەن و ھەر ژ روژا بونە دەولەت وەکی مەسەلا (مێ مێ ) دەستی کوردان ژی ل گوڤەندا سیاسی دا نەگرت و بگرە وەربادا ژی . پشتی کو شیعەیان ڤیا تولێ ل سوننەیان بکەن ل وێ ستەما سالا ١٩٢١وەرە ل سەر وان ھاتیە کرن ھەتا کەفتنا سەدامی , عیراق ل سالا ٢٠٠٦ ریبریێ شەرەک تائیفیێ توند بو و سەرکردێن کوردستانی دیسان شیان ب ھەمی رێکەکێ ڤێ رێشتنا خوینێ راوەستینن. ل سالا ٢٠٠٩ و پشتی سەرکەفتنا ئەیاد عەلاوی ل ھەلبژارتنان شیعە ب پشتگیریا ئیرانێ ب ھیچ ئاوایەکی رازینەبون کو سیکولارەک نیزیک ژ ئەمریکا و وەلاتێن عەرەبی حوکمی ل عیراقێ بکەت و وەلات بەرەف تونێلەک رەش ڤە دچو لێ دیسان ھەولێر لێ بو رزگارکەر و مالیکی دەسەلات وەرگرت و دەمێ بھێزکەفت وەکی مارێ قەرمتی دەمێ گەرم دبیت و ھندی ژەھر ھەیە ل گەل کوردان بکار ئینا , ل یونیویا ٢٠١٤ دەمێ داعش ھاتی و سێیەکا ئاخێ عیراقێ گرتی وی دەمی ژی کورد ل گەل عیراقێ کەفتنە ئێک سەنگەر ل دژی داعشێ و ب شیان و ھاریکاری و پشکداریا کوردان نەبا ھەتا نھا ژی داعش دا زورترین دەڤەرێن گرتی حاکم بیت و باشترین گروڤە ژی پشتی خیانەتا شازدێ ئوکتوبەرێ گروپێن داعشێ ل کەرکوک و خانەقین و دوزخورماتو چەندین دەڤەرێن دیتر نوی بونە ڤە.کوردان ب درێژاھیا پازدە سالێن دەسەلاتا شیعەیان دا پتر ژی سێ جاران حوکمێ وان ل ھەرفین و کەفتنا ئێک جارەکی دەربازکریە ب مەرەما ھندێ کو سەرکردێن عیراقێ تێبگەھن کو کورد خوەدی مافێن سیاسی و نەتەوەی نە و نابیت وەک پارێزگەە سەرەدەری ل گەل بێتە کرن پرەنسیپی تەوافقێ فەرە جھێ خوە ل عیراقا نوی بگریت . لێ ئەڤان چاکیان ھەمیا سەرکردێن عیراقی تێنەگەھاندن و روژا ل کوردان قەومی پشتی خیانەتا شازدێ ئوکتوبەرێ پێکولا نەھێلانا کیانێ سیاسی یێ کوردستانێ ھاتەکرن و ھەتا وەکی رژێما سەدامی ناڤێ کوردستانێ ب (شیمال العراق) ھاتە گوھرین؟؟!!
ب دیتنا من نھا عیراق بەرەف تونێلەکا تاریتر ژ یێن بەرێ دچیت و فەرە کورد خوە بەرھەڤی گوھرینێن نافخوی و دەڤەرێ بیت و شەرێ شیعە شیعە وەک گروپێ قەیرانا نێڤدەولەتێ دیارکربی نھا ب دەست پێکرنا خونیشاندانێن باشورێ عیراقێ نیزیک دبیت دیف ئاماژەیان کو ب ھەمی شێوازەکێ کار بو نەھێلانا ڤێ بزاڤا جەماوەری دئێتەکرن و خەلک ژی روژ بو روژ گەرمتر دبیت . ھەروەسا ئەو رەوشا ئالوزا پشتی ھەلبژارتنێن (١٢مایو) ھاتیە پێش و گوھرینا دەستەیا رێڤەبەریان کومسیونێ و تەمام بونا دەمێ پەرلەمانی و حکومەتا نھا ژی کار ب رێڤەبەرە (تێریف الاعمال) , قەبول نەکرنا ئەنجامێن ھەلبژارتنا و دەست وەردانێن بیانی ل کاروبارێن عیراقێ و دووبارە سەرھلدانەڤا داعشێ ل دەڤەرێن کوردستانی و پارێزگەھێن سوننی و دروستکرنا مەترسیەکا جدی ل سەر وان دەڤەران , ھەبونا دەھان گروپێن میلیشیاتێن حەشدا شەعبی کو کونترول کرنا وان زور زەحمەتە و جار جار ژی شەرە تەقەیێن ناڤ دا سەرھلدای.تشتێ پتر گوم شلوقاندی ئەنجامێن ھەلبژارتنان بون و چو ئالیەک نەبو سەرکەفتیەک بەرچاڤ و ئەو پارچە پارچە بونا ناڤ مالا شیعی و نەبونا ئێک دەنگیێ ل سەر ھەلبژارتنا کەسەک دیارکری بو پوستێ سەروک وەزیران پتر رەوش ئالوزکریە.
ژ بەر ڤێ چەندێ فەرە وانەکێ ژ دیروکێ وەربگرین و ئیدی ژ بەغدا بەگەرێین.و ئەڤ گوتن ژی من ب چەند گەران ڤە گرێدایە کو بوچی ژ بەغدا بگەرێین؟
- دیروک بو مە دیار دکەت کو عیراق ھەر جارا بێھێز بوی دەستێ براتیێ بو کوردان درێژکریە و بەروڤاژی ژی ھەردەمێ سەرپێیت خوە راوەستا بیت ناڤێ کوردستانێ ژ مە قەدەغەکریە.
- ئەو سەرەدەریا خراب و نەمروڤانە و نەشارستانیانە و توند ئەوا حکومەتا عیراقێ گرتیە بەر ل دژی کوردستانێ پشتی ریدانێن شازدێ ئوکتوبەرێ , بەسن کو سەرکرداتیا سیاسی یا کوردستانێ وانەکێ وەربگرن و ئیدی ژ بەغدا بگەرێن .
- ل جھێ کار کرن بو سەر ئێک ئینانەڤا عیراقیان فەرە کورد پێکولا ھندێ بکەن ناڤ مالا کوردی رێکپێخن کو حەسودی پێنا ھەێتەبرن و سەروک وەزیرێن کوردستانێ ل داوی گوتارا خوە ژی دا دووپاتی ل سەر ئێک رێزیا ناڤ مالا کوردی کر .
- یا ل سەر کوردان ئەرک نھا خوە بەرھەڤکرنە بو دانوستاندن و کارکرنە بو ب دەست ڤە ئینانا مافێن کوردان دیف دەستورێ عیراقێ و گرنگە پرەنسیپێن تەوازن و تەوافق و شەراکەت بێنە پاراستن.
- ل دەمێ خونیشاندانێن باژێرێ سلێمانیێ عەبادی ب فەر ددیت کو ئارامی و گیانێ ھاولاتیان بێتە پاراستن و پولیسێن فیدرال بو رەوشێ بەرھەڤکر بون! لێرەدا ب دەرفەت ددیت کو دەسەلاتا خو بگەھینیتە دوورترین سنور.
وانە وەرگرتن ل دیروکێ گرنگە و نابیت ئەو ریدانێن ب سەرێ گەلێ کورد ھاتین بێنە بیرکرن و ئیدی حکومەتا ھەرێما کوردستانێ فەرە کار بکەت بو کومکرنا ھەمی ئالیێن کوردستانی و کار ل سەر پروژەیەکێ کوردستانی بێتەکرن بو دانوستان ل گەل عیراقێ . رەوشا نافخو ژی پێتڤی ب چاکسازی و کارکرن و پلان و ویژدان و نەھێلانا دووبارەکی و گەندەلیێ یە , بوھندێ کورد ل عیراقێ ب ھێز بکەڤن . ھێزا کوردان ل کوردستانەک بھێز دەردکەڤیت.