داوى گوتارا سه‌رۆكێ حكومه‌تا هه‌رێما كوردستانێ ل ده‌مێ ڤه‌كرنا سه‌نته‌رێ په‌ره‌پێدانا كه‌رتێ كاره‌بێ ژ ئالیێ كونسولخانا ژاپۆنێ ڤه ل هه‌ولێرێ گه‌له‌ك ژ راستى و قوناغێن چاكسازى و پێشكه‌فتنێن حكومه‌تا هه‌رێمێ پشتێ قه‌یرانا دارایى رووهنكرن، لێ یا گرنگتر ژ ڤێ یه‌كێ وان نشیڤ و رێگریێن پێش كار و بزاڤێن حكومه‌تێ ژى ب رووهنى هاتن به‌رچاڤكرن، ئه‌وێ د وێ گۆتارێ دا گرنگه ئه‌وه، هیچ ده‌مه‌كى بگر و بكێشا سیاسیا ناڤخوه‌یا هه‌رێمێ ژ ئالیه‌كێ و هه‌روه‌سا ئاریشه‌یا دناڤبه‌را هه‌ولێر و به‌غدا نه‌بووینه رێكخۆشكه‌ر ژ بۆ چاره‌كرنا وان كێماسیێن كو دناڤخوه‌یا هه‌رێمێ دا هه‌یه، به‌لكو ژبلى كو ئه‌و بزاڤه‌ك بوون ژ بۆ مانا وان ئاریشه‌یان وه‌كو خوه، پێكۆلێن مه‌زنتر ژى بوون ژ بۆ به‌رفره‌هبوونا وان ئاریشه‌یان ژ بۆى كو ئه‌و كابینه‌یان نها هه‌ى ب كابینه‌یه‌كا لاواز بهێته دانان، له‌ورا پارتێن كو خوه ب ئۆپۆزسیۆن ددانن و د خوله‌كێن داویێ ئه‌و حكومه‌ته بجهــ هێلاى، بخوه وان كێماسیان بكه‌نه ده‌لیڤه و دناڤا جه‌ماوه‌رى دا جهێ خوه موكم بكه‌ن، لێ ب راستى ئه‌و ژى سه‌رنه‌گرت، كه‌واته كیژان ئالى سه‌ركه‌ت؟ حكومه‌ت یان رێگریێن پێش حكومه‌تێ؟ ب واتایه‌كا دى ڤێ پرسێ بكه‌ین، حزب سه‌ركه‌فت، یان ب پله ئێك وه‌لاتیێن هه‌رێمێ د پرۆژه‌یێن حكومه‌تێ دا مفادار بوون؟ به‌رسڤا ڤێ پرسێ ره‌نگه ژبۆ كه‌سه‌كێ پارتى گه‌له‌ك ب ساناهى بیت، لێ پێدڤى ب هه‌بوونا گه‌له‌ك به‌لگه‌یان هه‌یه ئالیگرێن پارتێن دى دانپێدانێ ب سه‌ركه‌فتنا بزاڤێن حكومه‌تێ بكه‌ن، ئه‌و ژى به‌راودركرنا هه‌ردوو قوناغێن حكومه‌تێ یه هه‌تا كو ژ بۆ ئالیێن دى باشتر رووهن بیت كو پارتى ب حكومرانیا قوناغا پشتى قه‌یرانێ شیایه سه‌ركه‌فتى بیت و تا راده‌یه‌كێ ژى ره‌وشا خرابا ئابوورى به‌ره‌ف باشتر ببه‌ت، دره‌و ژى نینه ئه‌گه‌ر بێژین: باشتربوونا ره‌وشا ئێمناهى و سیاسی و ئابووریا هه‌رێمێ د به‌رژه‌وه‌ندا گه‌له‌ك پارتێن سیاسى یێن هه‌رێمێ نه‌بوویه، گروڤه ل سه‌ر ڤێ یه‌كێ ژى ئه‌وه، هه‌موو ده‌مان ئه‌و پارت و ئالیێن خوه ب نه‌رازى ددانن، ل رێكا به‌غدایێ بوون ژ بۆى كو دۆرپێچا ل سه‌ر حكومه‌تا هه‌رێمێ زێده‌تر لێ بهێت و پارتى و سه‌رۆكێ حكومه‌تێ ب شكه‌ستنێ ڤێ كابینا حكومه‌تێ ب داوى بینن، لێ ئه‌و ژى سه‌ر نه‌گرت، باشترین به‌لگه ژى ژ بۆ سه‌ركه‌فتنا بزاڤێن حكومه‌تێ د ده‌ربازكرنا خه‌لكى دناڤا قه‌یرانێ دا، ئه‌نجامێن هه‌لبژارتنایه و پتریا خه‌لكێ كوردستانێ ده‌نگ ژ بۆ وێ حزبێ دا حكومه‌تێ ب رێڤه دبه‌ت و ل ده‌مێ ته‌نگاڤى و نه‌بوونێ خه‌لك بێ هێڤى نه‌كرن و ب بزاڤێن دبلوماسی و سه‌ره‌دانێن گه‌له‌ك وه‌لاتێن زلهێز شیا گه‌له‌ك دۆرپێچان ل سه‌ر هه‌رێمێ راكه‌ت، یان ئاشكه‌را تر بێژین، ئه‌و ره‌شبینیا و بێ هێڤیبوونا پشتى روودانێن شازده‌ى ئكتۆبه‌رێ ل ده‌ف خه‌لكێ كوردستانێ دروست بووى، سه‌رۆكێ حكومه‌تێ شیا ژ بۆ به‌رگه‌كێ گه‌شبینى و پر هیڤى بگوهه‌ریت، ئه‌ڤه واتایا وێ یه‌كێ ناده‌ت كو حكومه‌تێ هه‌موو تشت چاره‌كرن و وه‌لات كره شاما شه‌ریف، لێ هه‌ر تشت ب رێژه‌یه و نها ره‌وشا دارایى باشتربوویه و تا راده‌یه‌كێ گوهه‌رێن ژ پاشكه‌فتا مووچه‌یێ فه‌رمانبه‌ران ژى هاته كرن، ئیدى ئه‌وا ماى حكومه‌تێ ژ بۆ په‌رله‌مانى هێلا و ئه‌گه‌ر ئالیێن نه‌رازى گه‌له‌ك د خه‌ما خه‌لكێ هه‌رێمێ دا بان، د ڤێ خولا په‌رله‌مانى دا دا پرۆژه‌یێ چاكسازیا خانه‌نشینان په‌سه‌ند كه‌ن و وى ده‌مى ب ئێكجارى موچه دا ژ بۆ ده‌مێ به‌رى هاتنا داعشێ ڤه‌گه‌ریت، لێ ئه‌و حزبێن نه‌رازى كو ژ به‌رپرسیاریا ناڤا حكومه‌تێ ره‌ڤى؛ باشتر دزانن په‌سه‌ندكرنا وى پرۆژه‌ى د به‌رژه‌وه‌ندا وان نینه و ب وێ یه‌كێ دێ پشته‌ڤانى و ئاستێ جه‌ماوه‌ریێ خه‌لكێ ژ بۆ پارتى و كابینا نها یا حكومه‌تێ زێده‌تر بیت. پشتى چار سال ژ قه‌یرانا دارایى و هاتنا پێله‌كا مه‌زن یا ئاواره‌یان و نزمبوونا بهایێ په‌ترۆلێ و برینا بوودجه‌یا هه‌رێمێ ژ ئالیێ به‌غدایێ ڤه؛ ئه‌ڤرۆ نێچیرڤان بارزانى سه‌رۆكێ حكومه‌تا هه‌رێما كوردستانێ د گوتارا خوه یا ده‌مێ ڤه‌كرنا سه‌نته‌رێ په‌ره‌پێدانا كه‌رتێ كاره‌بێ باس ل هه‌موو وان گوهه‌رینان و رێگریێن پێش بزاڤا خوه‌یا چاكسازیێ ژى كرن، ئه‌و ژى نه‌ڤه‌شارت كو هه‌موو گڤاشێن سیاسى نه‌شیان ئه‌و و كابینا وى ژ بزاڤێن ب هێزكرنا هه‌رێمێ سار بكه‌ن، نها قوناغا شكاندنا دۆرپێچان ده‌رباز بوویه و حكومه‌ت هه‌ولا گوهه‌رینێن باشتر د كهرتێن حزمه‌تگۆزارى دا دكه‌ت، كو كاره‌ب ژى ئێك ژ كهرتێن گرنكه، ب سمارت میته‌ر كرنا ڤى كه‌رتى ژى ئیدى كه‌رتێ كاره‌بێ دێ باشتر بیتن.
کارزان فەقێ
