ئیدى ژبۆ هه‌ڤینگه‌هـ و جێهن گوزارى یێن هه‌رێمێ مینا قه‌ره‌بالغیێن جه‌ژنێ یه، مه‌ره‌م ژ وێ جه‌ژنێ نه ب واتایا كه‌یف و خوه‌شى یه، به‌لكو چه‌وا بیره‌وه‌رى و جه‌ژن و هه‌لكه‌فتان جهێن گه‌شت و گۆزاریێن هه‌رێما كوردستانێ پر دبن ژ گه‌شتیاران، ب هه‌مان شێوه و ره‌نگه پتر ژى بیت، هاڤینگه‌هێن هه‌رێما كوردستانێ دێ پێشوازیا گه‌شتیاران كه‌ت، بێگومان ئه‌و گه‌شتیار ژى ب رێژه‌یا 80 ژ سه‌دێ ژ خه‌لكێ باشور و ناڤه‌راستا ئیراقێنه، حكومه‌تا هه‌رێما كوردستانێ ژى بۆ ڤێ یه‌كێ رێكخوشكه‌ر بوویه د ده‌مێن بۆرى ئاسانكارى و به‌رهه‌ڤیا ئالیێن په‌یوه‌ندیدار بۆ هاتنا گه‌شتیاران نیشان دایه، لێ ژبلى حكومه‌تێ، ئه‌وێ ب پله ئێك كو دڤێت ل گه‌ل گه‌شتیاران هاریكار بیت، خه‌لكێ هه‌رێما كوردستانێ ب گشتى و ده‌ڤه‌رێن نزیكى جهێن گه‌شت و گۆزارینه، چونكى ژ بۆ ب ده‌ست خستنا داهاته‌كى، د كه‌رتێ گه‌شت و گۆزارى پتر ژ هه‌ر كه‌رته‌كێ دى خه‌لك تێدا مفاداره، د هه‌موو كه‌رتێن دى رێژه‌یا پتر یا داهاتێ دچیته گه‌نجینه‌یا حكومه‌تێ و پاشان وه‌كو مووچه ب سه‌ر فه‌رمانبه‌ران دهێته‌ن دابه‌شكرن و پرۆژه‌یێ خزمه‌تگۆزارى پێ دهێنه چێكرن، ل د كه‌رتێن گه‌شت و گۆزارى، گه‌شتیار راسته‌وخۆ پاره‌یێ خوه دده‌نه وه‌لاتیان، هه‌روه‌كو چه‌وا حكومه‌ت كریه پلانا خوه دا گه‌شت و گۆزارێ بكه‌ته ئه‌لته‌رناتیڤێ كه‌رتێ په‌ترۆلێ، ب هه‌مان شێوه ژى دڤێت ئه‌و ره‌وشه‌نبیرى ل ده‌ف خه‌لكێ كوردستانێ هه‌بیت كو ب چاڤه‌كێ مه‌زنتر ژ په‌ترۆلێ ته‌ماشه‌ى گه‌شتیاران بكه‌ن، بۆ نموونه ئه‌و گه‌شتیارێ دهێته هه‌رێمێ ئه‌گه‌ر بۆ ده‌ما هه‌فتییه‌كێ ل هه‌رێما كوردستانێ بمینیت، كێمتر 300 دۆلاران نا مه‌زێخیت، بێگومان ئه‌و پاره‌یێ گه‌شتیار ل هه‌رێما كوردستانێ د مه‌زێخیت، راسته‌وخۆ خه‌لكێ هه‌رێما كوردستانێ ژێ مفادار دبیت، چونكى ده‌ما ئه‌و پاره‌ى ل جهه‌كێ ده‌رڤه‌ى سنورێ هه‌ڕێما كوردستانێ دئینیته ناڤا بازارێن هه‌رێمێ، ئه‌ڤه بخوه چه‌ندین مفا هه‌نه، ژ وان ى ساخكرنا به‌رهه‌مێن ناڤخوه‌یی یێن هه‌رێمێ و لڤینا بازارى ل جهێن گوزارى و خوارنگه‌هـ و ئۆتێل و مۆتێلان، لێ پرسیار ئه‌وه، چما ده‌ما خه‌لكێ هه‌رێمێ دچنه جهه‌كێ گه‌شت و گوزارى ب دیتنا گه‌شتیارێن عه‌ره‌ب دلگران دبن؟ ئایا درسته گه‌شتیار و سیاسى یێن عه‌ره‌ب ب ئێك چاڤ بهێنه ته‌ماشه‌كرن؟! بۆ ڤێ یه‌كێ گه‌له‌ك به‌رسڤ هه‌نه و پێشكه‌فتنا وه‌لاتێن كو گرنگیێ ب گه‌شت و گۆزارى دده‌ن باشترین نموونه‌نه، خه‌لكێ بریتانیا گه‌له‌ك ناڤدارن ب ڤێ یه‌كێ و تا سه‌ر هه‌ستى دژى كۆچبه‌ر و كه‌سێن بیانى نه، پشتى پێلا كۆچبه‌ران به‌ره‌ف ئه‌وروپا، خه‌لكێ ئه‌لمانیا ژى د وێ رێزێ دا دهێن و حه‌ز ژ بیانیان ناكه‌ن، لێ ژ بۆ وان كۆچبه‌ره‌كێ سورى و گه‌شتیاره‌كێ سورى دووشتێن ژ ئێك جوودانه و چه‌وا دژى كۆچبه‌رانن، به‌روڤاژى ژى حه‌ز ژ گه‌شتیاران دكه‌ن، چونكى ئه‌و دزانن كۆچبه‌ر ل سه‌ر حسابا وان دژیت، لێ گه‌شتیار پاره‌یێ خوه ژ بۆ وه‌لاتێ وان دئینیت. ماده‌م د ناڤا هه‌رێما مه دا هه‌م ژ ئالیێ ئێمناهى و هه‌م ژئالیێ جهێن گه‌شت و گۆزارى حكومه‌تێ شیایه ئاسانكارییان بۆ گه‌شتیارێن بیانى بكه‌ت، كه‌واته شیان هه‌نه ب رێكا كه‌رتێ گه‌شت و گۆزار ببین خوه‌دان داهات، گرنگه حكومه‌ت پتر زه‌مینه و رێ ل هه‌مبه‌ر ڤێ كه‌رتێ خوه‌ش بكه‌ت و ژلایه‌كێ دیڤه، خه‌لك ب چاڤێ دۆست و حه‌ز ژێكرنێ ته‌ماشه‌ى وان گه‌شتیاران بكه‌ت كو چ په‌یوه‌ندیا وان ب سیاسه‌تێ ڤه نینه.
کارزان فەقێ
