هەرێمی كوردستان ئیستا لە هەلومەرج و بارودۆخێكی هەستیار و چارەنووسساز و هەرێمی و نێودەوڵەتیدایە كە دەبێت هەم لە رووی سوود لەم بارودوخە وەربگرێت وەك حاڵەتێكی ئەمری واقیع، دەبێـت سەرەنج و ڕای گشتی هەرێمی و جیهانی بۆ وروژاندن و هەنگاونان بۆ دروستبوونی دەوڵەتی كوردی، چونكە هەریەك لەو دەوڵەتانەی كە ئێستا خاوەن بڕیارن لە ئاستی جیهاندا بەو قوناغ و ئاستانەدا تێپەڕیوون و قوربانی زوریشیان بەخشیووە لەو پێناوەدا، واتا هیچ دەوڵەتێك بە ئاسانی نەهاتووەتە بوون، بەڵكو لە سەردەمێكدا هەنگاونان بەرەو دەوڵەتبوون رووبەڕووی ئاساتەنگ بوونەتەوە تەنانەت گەر سەیری دیدی بیریارانی گرێبەستی كۆمەڵایەتی و ئەوانیتر بكەین دەبینین دەوڵەت لە هەناوی ململانێوە دێتە بوون، ئەڵبەتە ئەوەش بەدەر نییە لە رۆڵی دەوڵەتانی خاوەن بەرژەوەندی ئابووری و سیاسی خاوەن هێز و بڕیار، ئاستەمە بە سانایی بێتە بوون، بەڵام دواجار ئیرادەی گەلان سەنگی مەحەكە بۆ گەشتن بە خەونی بەدەستهێنانی دەوڵەت.گەلی كورد وەك نەتەوەیەكی خاوەن ماف زیاتر لە سەدەیەكە بە هۆی بەرژوەندی زڵهێزانەوە تا بە ئەمرٍۆ خاكی دابەش و داگیركراوە ، بۆیە تا بەئەمرٍۆ لە خەبات و تێكۆشانی بەردەوام دایە بۆ گەرٍاندنەوەی خاك و نیشتیمانی داگیركراویی .ئەگەر رۆژهەڵاتی ناوەڕاست جەرگەی نەخشەی جیهانی گرتبێت، ئەوا كوردستانیش جەرگەی نەخشەی رۆژهەڵاتی ناوەڕاستی گرتووە. یان بە واتایەكی تر دەتوانین بڵێین كە كوردستان لە ناو جەرگەی نەخشەی جیۆسیاسی جیهاندایە، هەر ئەوەش یەكێك بووە لەو هۆكارانەی كە كوردستان پێیەوە دوچاری دابەشبوون هاتووە.هەموو گرنگییەكانی كە لە رۆژهەڵاتی ناوەڕاست هەن بە شێوەیەك لە شێوەكان لە كوردستانیش بوونیان هەیە، هەر لە گرنگی جوگرافی، دەوڵەمەندی ئابووری و بوونی سەرچاوە سرووشتییەكان و نەوت و گاز، بوونی ئاوی شیرین و سەرچاوە ئاوییەكان، هەروەها دەوڵەمەندی كەلتووری پێكەوەژیانی نەتەوەیی و ئایینی نێو پێكهاتەكانی. دوای شەڕی داعش و دروستبوونی هاوپەیمانی نێودەڵەتی دژی داعش، كوردستان بە سەرۆكایەتی سەرۆك بارزانی بووە بەشێكی كارای ئەو هاوپەیمانییە نێودەوڵەتییە و پێشمەرگە بووە هێزی سەرەكی و ئەفسانە شكێنی تیرۆریستانی داعش.ئێستا لە ناوچەكە كۆمەڵێك ململانێ و هاوپەیمانی بەڕێوەدەچن كە بە شێوەیەك لە شێوەكان، كاریگەری راستەوخۆ و ناڕاستەوخۆیان لەسەر كوردستان هەیە. بەتایبەتی لە رووی ئابووری و سەقامگیری.ئەوەی گرنگە ستراتیژیی كوردستان كە سەرۆك بارزانی كاری بۆ دەكات و پەیڕەوی لێ دەكات، سەرەڕای هەموو لەمپەر و بەربەستەكان ئەوەیە كە بەرژەوەندی كوردستان و خەڵكەكەی لە سەرووی هەموو بەرژەوەندییەكانەوەیە.كوردستان نابێتە لایەنگیری هیچ هێزێكی هەرێمی لە دژی هیچ هێزێكی تر و ماوە نادرێت خاكی كوردستان ببێتە مەیدانی یەكلاكردنەوەی حسایاتی لایەنەكان. تەبایی و ئاشتی ناوخۆیی نێو هێزە سیاسییە بەرپرسیارەكان لە كوردستان گەرەنتیی دەستكەوتی باشتر و گەورەترە.
داڕشتنەوەی نەخشەی ناوچەكە وردە وردە بەدیار دەكەون، تا ئێستاش كوردستان كارەكتەرێكی ئەكتیڤە و ئاراستەیەكی راستی هەیە. ململانێ هەرێمی و ناوچەییەكان بە هەرشێوەیەك بن، مەوقعی كوردستان لە چوارچێوەی هاوپەیمانییە نێودەوڵەتییە گەورەكەی جیهانی دیموكراتیدایە. نموونەی لێبووردەیی و پێكەوەژیانی ئایینی و نەتەوەیی و پاراستنی مافی نەتەوە و ئایین و مەزهەبەكان و بوونی كوردستان بە پەناگەی ئارامی ئاوارەكان، جێی بایەخی جیهانە و كوردستانی وەك سیمبولێك لێكردووە لە ناوچەكە كە شایەنی رێزگرتن و پارێزگاری لێكردنی نێودەوڵەتییە. هەروەها خاوەن سەرۆكێكی كارێزما و و لێهاتوو هەیە كە جێی باوەڕی ناوخۆیی و جیهانە و دەتوانێت ئەم قۆناغە هەستیارە بە سەركەوتوویی دەرباز بكات. بۆیە سەرەڕای ئاڵۆزییەكان، گرفتەكان، كێشەكان و ئەو ماوەیە كە یەكلاكردنەوەی ململانێكان و بەرژەوەندییەكان لەسەر زەوی دەیخوازێت، بەڵام دەتوانین ئایندەیەكی گەش لە ئاسۆ ببینین، ئەو ئایندەیەش پێویستی بە یەكڕیزی و تەبایی و هەوڵ و خۆڕاگریی خەڵكی كوردستان بۆ گەیشتن بە ئاكامی سەركەوتوو و ئامانجەكانی هەیە..دوای روواوەكانی سەركەوتنی ریفراندۆمی سەربەخۆیی و سەركەوتنی بە سەر داگیركاری 16ی ئۆكتۆبەر ، هەرێمی كوردستان چۆتە قۆناغێكی نوێی دیپلۆماسی و سیاسی و ئابووری و بەئەمەش گەلی كورد خێراتر لە ئامانجەكانی نزیكتر دەكاتەوە ..هەنگاوە كاریگەر و سیاسەتی و ئەزموونی رابردوویی سیاسی و دیپلۆماسی و پێشمەرگایەتی سەرۆك بارزانیی لە ناوخۆیی عێراق و ناوچەكە وایكردووە كە متمانەیەكی بەهێزو گەورە بە گەلی كورد دروست ببێ‌ .سەرۆك بارزانی وەك رابەر و كەسایەتیەكی دیار و كاریگەر لە دروستكردنی بڕیاری ئاشتی لە رۆژهەڵاتی ناویندا سەیر دەكرێت . بارزانی لەوەتەی دەستی بە خەباتی رزگاری و ئازادی كردووە، بۆ ئەوە كاری كردووە ئاشتی بەسەر شەڕدا سەركەوێت و گەلی كورد لەسەر خاكی خۆی بە ئاشتی‌و دوور لە چەوساندنەوە بژیت. هەرگیز بڕوای بە شەڕ و توندوتیژی نەبووە، بۆیە چەندین خەڵاتی نێودەوڵەتی لە بواری ئاشتی، لەلایەن رێكخراوە نێودەوڵەتیەكانەوە پێی بەخشراوە، گرنگترینیان خەڵاتی نۆبلی ئاشتی و خەڵاتی پەیمانی باكوری ئەتلەنتیكە. لەبەر رۆڵی كاریگەر و ئاشتیخوازانەی سەرۆك بارزانی لەسەر ئاستی ناوخۆی عێراق و رۆژهەڵاتی ناوەڕاست و لەسەر ئاستی نێودەوڵەتیش گوێ بۆ بۆچوون و تێبینی و سەرنجەكانی بارزانی رادەگیرێ. وڵاتانی خاوەن بڕیار لەسەر ئاستی نێودەوڵەتی بە تایبەتی ئەمەریكا و یەكێتی ئەوروپا، ناچارن پەنا بۆ بارزانی بێنن، بۆ هەموو تەنگژەیەك بە تایبەت ئەو كێشەو تەنگژانەی لە عێراقدا روو دەدەن، داوا لە بارزانی دەكەن دەستپێشخەری نوێ بخاتە روو، تەنها سەرۆك بارزانیی بە رزگاركەری بارودۆخە ناهەموارەكان دەزانن، كە زۆرینەی گەلی عێراقیش بە كورد‌و عەرەبی شیعە و سوننەوە متمانەی پێ دەكەن. ئێستا دەبینین رۆژانە هەموو لایەنەكان پەنا بۆ بارزانی دێنن و داوای لێ دەكەن چارەسەرێك بۆ تەنگژەی عێراق بدۆزێتەوە. هەر ئەو پشتگیری و گەورە سەیركردنی گەلی كوردیشە بۆ بارزانی سەنگ و پێگەی كوردی لەسەر ئاستی نێودەوڵەتی رۆژ بەرۆژ بەهێزتر و كاریگەرتر دەكات. ئەمە بارزانی لەسەر ئاستی نەتەوەی كوردیش هیوا و ئومێدێكی گەشە لە دڵ و دەروونی هەموو كوردێكدا، هەتا ئەوانەش كە لە رووی سیاسیەوە جیاواز لە بارزانی بیر دەكەنەوە، هەر بۆیە بارزانی كەسایەتیەكی كاریگەری هەیە لەدروستكردنی بڕیاری ئاشتی لە رۆژهەڵاتی ناوەڕاستدا.