جێگیرنەبوونا رەوشا سیاسی یا دەڤەرەکی ب بەراورد ل گەل دەڤەرەکی دی گەلەک بەھانە بۆ ھەنە، لێ پتر ژ بۆ بنەمایێ بریاردانا خەلکی و پیڤەرێ ھەلبژارتنا ئالییەکێ سیاسی ڤەدگەریت، پرسا جەوھەری ئەوە، چما ل سنورەکی گەلەک پارت و ئالیێن نوو پەیدا دبن و د ژیێ کێ کیم دا بلند و نزمییا زۆر بخوە دبینن، د ھەمان دەم دا ل دەڤەرەکێ دی نزیکی چەرخەکە ب تنێ پارتەک حاکم و دەستەلاتدارە و ھیچ دەمەکی ب وی رێژەی باوەریا خەلکێ خوە ژ دەست نەدایە کو کو مەترسیا ژناڤچوونێ ل سەر پەیدا بیت؟ ل ڤێرە سایکۆلۆژیا خەلکێ وێ دەڤەرێ بریارێ ل سەر ڤێ یەکێ ددەت، بۆ خەلکێ سنورێ پارتی گرنگ نینە سەرکردەیێن وان چەند خاندەڤانن، بۆ دەیکا شەھیدەکی گرنگ نینە بەرپرسێ فلانە لقا پارتی چەند پەرتوکێن چاپکری ل بازاری ھەنە؟ چ مفایێ فرۆشیارەکی د ھندێ دایە کو بەرپرسەکێ چەند پەرتوکێن وی ل ژێر چاپێنە؟ بۆچی گرنگ بیت د فلان پەرتوک و بێڤان گوتارێ دا سەرۆکێ حکومەتێ چ ئایدۆلیژیەک ھەبوویە؟ ئەڤە ژ بۆ وێ خەلکێ کو تێھنیێ خزمەتگوزاریێ بیت، ھیچ گرنگیا خوە نینە، ب راستی ژی ئەرکێ جەوھەریێ سیاسەتڤانی نڤێسین و چاپکرنا پەرتوکان نینە، تەماشەی وەلاتێن رۆژئاڤا بکەن، کێم سیاسەتڤان ھەنە ل دەمێ ئەو ل گۆپیتکا دوستەلاتی بن پەرتوکێن چاپکری ھەبن و خەلکی خوە بەر ب ئایدیۆلژیەکێ ھان بدەن، بەلکو سیاسەت‌ڤان ب پلە ئێک ئەرکێ وی خزمەتکرنە و خەلک ژی ل دووڤ وێ خزمەتا ھاتیە کرن بریارێ ل سەر ددەت نەک ل دووڤ وان پەرتوکێن وی کو ل بازاری ھەنە، لەورا ئەگەر ئەز چەند خاندەڤایێ پەرتوکێن نەوشێروان مستەفای بم، ل رۆژا ئەز دەنگێ خوە ددەم پەرتوکێن وی بۆ دەنگدانا من پیڤەر نینن، بەلکو تەماشە وێ کەش و ھەوایێ دکەم کو ل ژێر دەستێ حزبا وی ھاتیە دروست کرن، تەماشەی وێ نڤشێ دکەم کو پشتی دروستبوونا گۆران پەیدابوویە و ب چ ئاوایەکێ سەرەدەریێ ل گەل و رەوش کاودانان دکەن، گەلەک ب رۆھنی دبینم ئەو نڤشێ ل ژێر سایکۆلۆژیا گۆرانێ دروست بووی چەوا ھێرشی پیرۆزی و ناڤێ پێشمەرگەی دکەن، حزبەک ب ھەموو مەزناھیا خوەڤە مافێن پێشمەرگەی بکەتە دروشمێ خوە، د ھەمان دەم دا پەرلەمانتارەکێ وێ حزبێ پێشمەرگەی ب خرابکرنا گوندێن عەرەبان تۆمەتبار بکەت و ناڤێ پێشمەرگەی ب کرنا ئەنفالێ ل گوندێ ئەرەبان کرێت بکەت بخوە ھەڤدژییەکە و ژ ناڤ و قیمەتا وێ حزبێ کێم دکەت، لەورا نەوشێروانێ وەغەرکری چەند شیابیت د پەرتوکا (بە دەم رێگاوە گول چنین) گولا بچینیت، لێ دەما ھەلسوراو ئەندامێن وێ ژ بلی ھێرش کرن و شکاندنا پیرۆزیێن خەلکی ھیچ تشتەکی دی لێ نەھێتە دیتن وی دەمی پەرتوکێن رێکخەرێ وێ حزبێ نابیتە فریادرەسێ وان، ئەز نکارم پیرەژنەکێ دانعەمر نەچار بکەم بچیت پەرتوک و دیدارێن تالەبانی بخوینیت دا کو بزانین ئەو چ گەوھەرەکێ مەزن بوویە و چ سیاسیەکێ ئاشتی خواز بوویە، بەلکو ژ بۆ کەسێن نە خواندەڤان و خەلک ب گشتی سیستەمێ حکومرانی و دەستەلاتداری دێ بیتە پیڤەرێ ھەلبژارتنێ، کوردان دکەڤندا گۆتێە (ھەر دارەک ب بەرھەمێ خوە دھێتە نیاسین)، چار سالن ھەڕێم د قەیرانێ دەربازدبیت، تاکە حزبێ کو دانپێدانێ ب ھەبوونا قەیرانێ دکەت و سۆزێن چارەسەرکرنێ ددەت پارتی دیموکراتی کوردستانە، د ھەمان دەم ئەڤ قەیرانە ژ بۆ ھەموو حزبێن دژە پارتی و دژە حکومەتێ بوویە کارتێ فشارێ و ماکینەیا ئازراندنا خەلکێ کوردستانێ دژی پارتی و چێکرنا خوەنیشاندانێ دژی حکومەتێ، لێ د راستی دا خەلک چارەسەر‌کرنێ دخوازیت و خوەنیشاندانێ ناخوازیت، کەواتە ئەم بلا رەوشا نھا و بەری دوو سالان ل گەل ھەڤدوو بەراورد بکەین، چەند گھۆرین ھاتینە کرن، چەوا د مەدیا زۆنەکێ دا مانشێتێن داگیرکرنا ھەولێرێ و ژناڤچوونا کوردستانێ ب خەتەکێ مەزن و سۆر د ھاتە نڤێسین و د مەدیایا زۆنێ دی ھەول بزاڤێن قورتالکرنا خەلکێ کوردستانێ ھێڤێنێ نووچە و بەرنامەیان بوویە، ئیدی کو ھەموو پارتێن دی خوە ژ حکومەتێ ڤەکێشان و پارتی ب تەنێ ھێلا، دڤێت وێ دانپێدانێ ژی بکەین سەرۆکێ حکومەتێ کو ھەڤدەم جێگرێ سەرۆکێ پارتی دیموکراتی کوردستانە شیا رەوش ئابوریا خەلکی بگوھەریت و ئەو ھەستیاریا دناڤبەرا ھەولێر و بەغدایێ ھەی ئارام بکەت، دڤێت وێ دانپێدانێ بکەین کو پارتی ب ئەگەرێ سەرکەفتنا خوە د حکومەتێ دا شیا د ھەلبژارتنێ دا ژی سەربکەڤیت.