رەمەزان، ئەو میوانە پیرۆزەیە كە ساڵانە جارێك بە خزمەتی شاد دەبین، خۆمانی بۆ ئامادە دەكەین، بە پەرۆشەوە چاوەڕوانی دەكەین، بۆ ئەوەی ببێتە وێستگەیەك بۆ بەخۆداچوونەوە و لاپەڕەی گوناح و تاوانەكانمان و سڕینەوەی سەرپێچییەكانمان، وەك گەرماوێكی ساڵانە كە لە هەموو خراپەكانی یازدە مانگی رابردوو پاكمان دەكاتەوە.
پێویستە كە بیكەینە بۆنەیەك بۆ ئاوڕدانەوە لە رابردوومان بۆ ئەوەی كەموكوڕییەكانمان چارەسەر بكەین، گوڕانكاری تەواو لە هەڵسوكەوتمان بكەین، لە ناخەوە گوڕانكاری بكەین، نەك بیكەینە بۆنەیەك بۆ ژەمگۆڕی و خەوگۆڕی.
رەمەزان بۆ ئەوەیە كە بچینە ریزی فریشتەكان كە خواردن و خواردنەوەیان نییە، كەچی هەندێكمان دەیكەینە بۆنەیەك بۆ ئیسراف و زێدەڕۆیی لە رازاندنەوەی سفرە و خوانی بەربانگ و پاشیوان. رەمەزان بۆنەیەكە بۆ هێوربوونەوە و لێبووردەیی، كەچی هەندێك لە رەمەزان تووڕەیی و هەڵچوونیان دەگاتە لوتكە و لەسەر كەمترین شت پەلاماری خەڵكی دەدەن (بە دەست و زمان)، بە بیانووی ئەوەی كە برسییەتی و تێنوویەتی تاقەتی لێ بڕیون!
رەمەزان بۆ ئەوەیە كە خەڵكی لە دەست و چاو و زمانمان سەلامەت بن، كەچی هەندێك دەیكەنە ساتێك بۆ باسكردنی یەكتر و كات بردنەسەر بە هەژماركردنی هەڵە و كەموكوڕییەكانی خەڵك!
رەمەزان بۆ ئەوەیە شەوانی بۆ خواپەرستی بێت و خەڵك لە ماڵەكانی خوا كۆببنەوە، بۆ ئەنجامدانی نوێژ و قورئان خوێندن وگوێڕاگرتن لە وانە و ئامۆژگاریی چاك و سەردانی خزم و كەسان، كەچی هەندێكمان شەوانی رەمەزان دەكەینە بۆنەیەك بۆ بازاڕكردن و یاریكردن، و كات بەفیڕۆدان بە شتی بێسوود!
رەمەزان بۆ ئەوەیە كە رەحم و بەزەییمان زیاترە بێت و دڵمان نەرم بێت بەرامبەر بە هەژار و نەدار، كەچی هەندێك لە بازرگانان دەیكەنە بۆنەیەك بۆ چەوساندنەوەی خەڵك و دەرفەتێك بۆ قازانجی ناشەرعی بە گرانكردنی نرخ و فرۆشتنی كاڵای كۆنی كەڵەكە بوو!
رەمەزان تەنیا خۆبرسیكردن و خۆتێنووكردن نییە. خودای دلۆڤان نایەوێت سزامان بدات، بەڵكۆ زۆر پەند و وانەی بەسوود هەن لەم كارە پیرۆزە. پێغەمبەری خۆشەویستمان (دروودی خوای لە سەر بێت)، دەفەرموێت: «هەركەس واز لە قسەی ناڕاست و كردەوەی ناڕاست نەهێنێ، خوای گەورە ئیشی بە برسییەتی و تێنوویەتی ئەو كەسە نییە.»
ئەگەر لەم مانگەدا لە ناخەوە گۆڕانكاریمان بەسەر نەهات، واتا سوودمان نەبینی لە حیكمەت و فەلسەفەی رەمەزان، پێغەمبەرمان (دروودی خوای لە سەر بێت)، دەفەرموێت: «الصیام جنة» ـ بضم المیم ـ واتا بەڕۆژووبوون پارێزەرە لە هەموو خەراپییەك، شوورەیەكی پۆڵایینە كە لە ئافاتی هەوا و هەوەس دەمانپارێزێت. بۆیە مرۆڤی بەڕۆژووبوو هەرگیز پەلاماری كەس نادات، بەڵكو ئەگەر كەسێك بەرامبەری رەفتاری ناشیاو بكات، وەڵامی مرۆڤی بەڕۆژووبوو بۆ بەرامبەرەكەی ئەوەیە كە پێی بڵێ: من بەڕۆژووم.
تاوانەكانی مرۆڤ بەگشتی دوو جۆرن، هەندێكیان بە جەستە ئەنجام دەدرێن، وەك دزین و بوختان و كوشتن، وداگیركردنی ماڵی خەڵك و.. تد، هەندێكیشیان بە ناخ و دەروون ئەنجام دەدەرێن، وەك حەسوودی، رقبوون لە خەڵك، خۆ بە زل زانین و نیفاق و...تد، ئینجا بۆ ئەوەی لە هەردوو جۆرە تاوانەكان دوور بین، ئەوا رەمەزان قوتابخایەكە كە فێرمان دەكات چۆن خۆمان بە پاكی رابگرین و دوور بكەوینەوە لە هەموو شتێكی وا كە زیان بە دین و مرۆڤایەتیمان بگەیێنێت، واتا بەڕاستی رەمەزانی پیرۆز وێستگەیەكە بۆ بەخۆداچوونەوەو گوڕانكاریی راستەقینە لە ناخ و دەروونمان. بۆیە دەڵێین: یاخوا بەخێر بێیت مانگی رەمەزان.