ھەلبژاردن وەک ئێک ژ پێگەھێن دیموکراسیێ و گەھشتن ب یەکسانی و دادیا جڤاکی و ماف وەرگرتنا وەلاتیان و گرێدانا پەیمانەکا جڤاکی ل ناڤبەرا خەلک و حکومەتێ, ل دەڤەرەک بو دەڤەرەک و دەم بو دەمی ژی جوداھی و کاریگەری خوە ھەیە. ھەلبژاردنێن گەرا چارێ یێن پەرلەمانێ عیراقێ گرنگیەک ئێکجار مەزن بو کوردستان و عیراقێ ھەیە , ژ بەرکو سیاسەتێن نافخو و ئەقلیەتا حوکمران و دبلوماسیەت و پەیوەندیێن ناڤبەرا ھەولێر و بەغدا و ھەروەسا پەیوەندی ل گەل دەوروبەرێ ئیقلیمی و نێڤدەولەتی و فەلسەفا دەسەلاتێ ب ئەنجامێن ڤان ھەلبژاردنان ڤە گرێدایە.
ھەوا ھەلبژاردنان ل کوردستانێ وەک دیار زور گەرمتر بویە ل ناڤەراست و باشورێ عیراقێ ئەو ژی بو چەند خالەکان ڤەدگەرێت کو ب دیتنا من سەرێ ھەمی خالان گرنگتر ئەوە کو خەلک و ئالیێن کوردستانی دڤێت نونەراتیەک باشتر و چالاکتر و خوەدی ستراتیجیەتەک نەتەوەی بچیتە بەغدا و جودا بیت ل گەل نونەرێن خولا چوی , ھەروەسا دروست بونا پارتێن نوی و دەستپێکرنا قوناغەکا نوی ل دیروکا کوردستانا باشور پشتی خیانەتا شازدێ ئوکتوبەرێ و حەزا ڤەگەراندنا شکو و پێگەھێ کوردستانێ وەکریە کو بانگەشە گەرمتر بیت .
ھەبونا تیمەکا بھێز یا پەرلەمانتارێن کورد ل بەغدا پتر دەرفەتێ ب کوردستانیان ددەت کو بگەھنە مافێن خوەیێن رەوا کو د دەستورێ عیراقا فیدرال دا ھاتی و ئەڤ چەندە ژی ب بجە ئینانا دەستوری ب ئێک پاکیچ بەرھەم دئێت. پاراستن و پێکول کرن بو بدەست ئینانا مافێن کوردستانیان و بەرەڤانیکرن ل مافێن سیاسی و ئابوری و دیروکی یێن کوردستانێ پێتڤی ب ھەلبژاردنا پەرلەمانتارێن خوەدی شیان ھەیە, کو ببنە پێشمەرگە ل بەغدا و بو پاراستن و دەست ئینانا مافێن کوردان نەک ببنە پشکەک ژ پیلانێن دژی کوردستانێ وەکی مە ل خولا سیێ دیت ب چ ئاوا ھندەک ژ پەرلەمانتارێن کورد ببونە سەرقافیلێن لێدانا بەرژەوەندیێن کوردستانیان. لەوما فەرە دەرفەت ب وی ئالی و کاندیدی بێتە دان کو شیان ھەبن ل بەغدا بێژیتە راستی بەلێ و خراب و شوڤینیەت و دژاتیا کوردان ژی ب نەخێر بەرسڤ بدەت.لێرەدا تاکێ کوردستانێ ل روژا (١٢/٥/٢٠١٨) د ئەزمونەکا گرنگ و چارەنڤیس ساز دایە و فەرە باش بزانیت کو ھەر ھەلبژاردەنەکا شاش واتایا لاوازبونا پێگەھێ کوردستانێ ل بەغدا و کو ئەڤ چەندە ئێکسەر کاریگەریەکا خراب ل سەر بەرژەوەندیا تاکێ کوردستانی دکەت. ب سەدان کەسێن زیرەک و خوەدی پسپوری و شارەزایی ل کوردستانێ ھەنە کو دشیان دا ھەیە ئەوا ل دەست چوی ڤەگەرینن.
پشتی خیانەتا شازدێ ئوکتوبەرێ و ئەو ریدانێن بدیف دا ھاتی سەروکێ حکومەتا ھەرێما کوردستانێ ب باشترین شێواز سەرەدەری ل گەل ڤان ریدانان کر , ئەو ژی دووپاتی کرن ل سەر بجە ئینانا دەستورێ عیراقێ ب ئێک پاکێچ . دەربازکرنا ڤێ قوناغێ ھێزەک مەزن ب پێگەھێ کوردستانێ دا کو پەرلەمانتارێن ڤێ گەرێ فەرە چاڤدێریا بجە ئینانا دەستوری بکەن , ئەڤ ئەرکە ژی ب کەسەکێ کو ھوتافێن عاتفی لێدەت و ئولی بو بەرژەوەندیێن کەسی و حزبی بکاربینیت و پروپاگندا دژی حکومەتا ھەرێما کوردستانێ بکەت کو لایەنێ پێڤەگرێدای نینە ل ڤان ھەلبژاردنان نائێتە کرن بەلکو ب وان دئێتە کرن کو ل بەغدا ترس لێدئێتەکرن و ب گروپێ سەربەخوچی و قەومیچی دئێنە ناڤکرن.
دەنگدانا ڤێ گەرێ دێ قوناغەکا نوی یا پەیوەندیان ناڤبەرا ھەولێر و بەغدا دروست بکەت کو مەرجێ کوردستانێ وەکی سەرکرداتیا کوردستانی و چەندین جاران دووبارە کری و سەروکێ حکومەتێ بدەھان جاران دووبارە کری ئەوە دەستور ب ئێک پاکێچ بێتە بجە ئینان.ھەروەسا ئالیێ سیاسیێ نافخوی و پەیوەندیێن دەرڤە ل سەر ئاستێ عیراقێ ب ڤان ھەلبژاردنان ڤە گرێدایە و دەنگدەرێ کوردستانی ل بەرامبەر ئەزمونەکا دیروکی یە و نابیت وی کەسەکێ ھەلبژێریت کو ل بەغدا ئەرکێ خوە بکەت دژایەتیکرنا کوردستانێ و ئەرکێ خوە ژبیربکەت ژ بەر لێدانا رەمزێن کوردان وەکی ل خولا سیێ مە چەند پەرلەمانتارێن کورد ل بەغدا دیتن .