پێدڤى ناكه‌ت ب پرسین، چی ده‌كه‌ى؟، به‌لكو نه دوور دێ زڤرینه پاشه و نه ژى دێ به‌ره‌ف چارسلێن بهێت چین، كورد دبێژن، (سلاو له حازره) واته نها چ هه‌یه، بۆرى چۆ.. لێ ئه‌گه‌ر ئه‌م ڤێ گۆتنێ بۆ حكومه‌تا هه‌رێمێ بكه‌ینه پیڤه‌ر دڤێت ئه‌م بێژن نها چ كریه، تلێ هه‌موو پارتێن سیاسیێن هه‌رێمێ ژ بۆ ناڤ چاڤێ پارتى و سه‌رۆكێ حكومه‌تا هه‌رێمێ ئاراسته‌كرى بوو كو د قه‌یرانێ دا ب پاشكه‌فتا مووچه‌ى فه‌رمانبه‌رێن هه‌رێمێ سزا داینه، هه‌لبه‌ت ژبلى موزایه‌ده ئه‌ڤه گۆتنه ناچیته د هیچ قالبه‌كێ دا، چونكى ئه‌ڤ پارته بێ پرۆژه‌نه و تاكه پرۆژه‌یێ وان ژى دژاتیا كرنا قۆناغێن چاكسازیێ یه، لێ شه‌رێ داعشێ و برینا بودجه و موچه‌یێن فه‌رمانبه‌ران ژ ئالیێ به‌غدایێ و داكه‌فتنا بهایێ په‌ترۆلێ بوونه به‌هانه‌یێ ڤێ یه‌كێ حكومه‌ت گهورێنێ دمووچه‌ى دا بكه‌ت و به‌شه‌كێ مووچه‌ى پاشكه‌فت بكه‌ت، ئه‌ڤه ژى هیچ، لێ كه‌سێ ژبیر نه‌كریه كو ده‌ما حكومه‌تا هه‌رێمێ سیسته‌مێ پاشكه‌فتا مووچه‌ى داناى و به‌شه‌كێ مووچه‌یێ فه‌رمانبه‌ران كێمكرى، پتریا پارتێن سیاسى یێن هه‌رێمێ وه‌زیرێن وان د وێ كۆمبوونا حكومه‌تا هه‌رێمێ پشكداربوون و ده‌ستێ خوه بۆ وێ گهورینێ بلندكرن، پشتى دوو سالێن به‌رده‌وام یێ دابه‌شكرنا مووچه‌ى ب ڤێ سیسته‌مێ و چێبوونا خوه‌نیشاندانێ ل سنورێ پارێزگه‌ها سلێمانێ و سۆتنا هنده‌ك ژ باره‌گه‌هێن حزبى و حكومه‌ى ل وێ ده‌ڤه‌رێ؛ ژنوو هنده‌ك پارتێن سیاسى بخوه حه‌سیان و چوونه به‌ره‌یێ گه‌لى، لێ ئه‌و رووسپیاتى ژى بۆ وان نه‌ما و خوه‌نیشانده‌ر ب به‌ر و دروشمان نوونه‌رێن وان پارتان دناڤ خوه دا ده‌ركرن، لێ ئه‌و ئالیێن سیاسى ب ڤێ یه‌كێ ژى رانه‌وه‌ستان، ئیدى رێكا به‌غدایێ گرتنه به‌ر، باب ئازا خوه شرین بكه‌ت و ژبۆ به‌رپرسێن به‌غدایێ سوندێ بخۆت كو ئه‌و ل گه‌ل ریفراندۆمێ نه‌بوون، ركابه‌رى ل سه‌ر وێ یه‌كێ دهاته كرن كى دێ پلانه‌كا بهێر دژى حكومه‌تا هه‌رێمێ پێشكێشی به‌غدایێ كه‌ت، ل داویێ هه‌م ب گۆتنا وان و هه‌م ژى ب گۆتنا عه‌بادى كو ئه‌و ئالیێن سیاسى سه‌ره‌دانا وى كرین، ژێ خواستێنه مووچه‌یێ فه‌رمانبه‌رێن هه‌رێمێ ره‌وانه نه‌كه‌ت، هه‌روه‌سا گۆتینه كو ئه‌و ل گه‌ل ریفراندۆمێ نه‌بوون، عه‌بادى هه‌ر ل وێرێ ژى ئه‌و شه‌رمه‌زار كرینه و گۆتیه، ئه‌ز دزانم هوون ل گه‌ل ریفراندۆمێ نه‌بوون، لێ پرسا كوردستاێ د ده‌ستێ هه‌وه دا نینه، و ل داویێ سه‌ره‌راى هه‌موو وان دژاتیێن دناڤخوه‌یا هه‌رێمێ دژى حكومه‌تا هه‌رێمێ و زاتێ سه‌رۆكێ حكومه‌تێ دهاته كرن، حكومه‌ت شیا بێ ته‌سلیمكرنا په‌ترۆلێ، فرۆكخانه و ده‌ریێن سنورى، دۆرپێچێن سه‌رفرۆكخانه‌یان هه‌لگریت، به‌غدایێ نه‌چار بكه‌ت مه‌هانه 317 ملیار دیناران ژ بۆ مووچه‌یێ فه‌رمانبه‌ران ره‌وانه بكه‌ت، ب ڤێ یه‌كێ گهۆرین د سیسته‌مێ پاشكه‌فتا مووچه‌ى هاته كرن و ژ بۆ گه‌لێ كوردستانێ دیار بوو، كیژان ئالیێ سیاسى بزاڤا چاره‌كرنێ و باشكرنا ژیارا وه‌لاتییان ده‌ت و كیژان ژى هه‌ولده‌ت وه‌لاتى د ره‌وشه‌كا ئالۆز دا بژین ژ بۆى كو سووارى شه‌پۆلا نه‌رازیبوونا خه‌لكى ببیت و ژ بۆ هه‌لبژارتنان مفایێ ژێ وه‌ربگریت، له‌ورا بێى دوو دلى دبێژم: باشكرنا ره‌وش و ژیارا وه‌لاتى و فه‌مانبه‌ران د به‌رژه‌وه‌ندییا هیچ پارته‌كێ سیاسى یێ ده‌رڤه‌ى حكومه‌تێ نینه، ئه‌گه‌ر راست ژى نه‌بیت وه‌زیرێن وان ل دووماهى 4 مه‌هێن كابینه‌یا حكومه‌تێ، خوه ڤه‌نه‌دكێشا، لێ پارتى شیا به‌رپرساتیا ریفراندۆما دیرۆكى ل سه‌ر ملێن خوه هه‌لبگریت و سه‌ره‌راى هه‌بوونا خیانه‌ته‌كا مه‌زن كو دربه‌ك ژ قۆناغێن ب جهـئینانا ئه‌نجامێن ریفراندۆمێ دا، لێ سه‌رۆكێ حكومه‌تا هه‌رێمێ ب په‌یوه‌ندیێن خوه‌یێن دبلۆماسى ل گه‌ل وه‌لاتێن جیهانى هه‌موو تشته‌ك گوهارت، ژبلى پارتى ژى، ئه‌و گهورینێن هاتینه كرن د به‌رژه‌وه‌ندا هیچ پارته‌كا دى دا نه‌بوو و بۆ وان مزگینیه‌كا نه‌خوه‌ش بوو، لێ گرنگ ئه‌وه، د به‌رژه‌وه‌ندا خه‌لكى دا بوو.
کارزان فەقێ
