ڤه‌كرنا مه‌زنترین كونسلخانه ل سه‌ر ئاستێ جیهانێ ل هه‌رێمێ كوردستانێ ژلایێ ئه‌مریكا بهێته ڤه‌كرن تشته‌كێ نۆرمال نینه داكو كورد زوو ل بیرا خوه ببه‌ن، ئه‌مریكا هیچ ده‌مه‌كى وه‌ها خوه‌دان باوه‌ر نه‌بوویه و باوه‌ریا وى ژى ب سه‌قامگیریا كوردستانێ جهێ ل سه‌ر راوه‌ستیانێ یه. هه‌رێما كوردستانێ دناڤا جه‌رگێ رۆژهه‌لاتا ناڤین دایه، ژ بۆ ئارامیێ ژى ب به‌راورد ل گه‌ل وه‌لاتێن جیرانێن خوه، ئارامترین ناوچه‌یا ڤێ ده‌ڤه‌رێ یه، لێ بۆچى هه‌رێما كوردستانێ بۆ ئه‌مریكا گرنگه؟ ئه‌ڤه پسیاره‌كه و ئه‌گه‌ر ب ڤه‌كۆلینین ستراتیژى باس ل پێگه‌هێ ئه‌مریكا ل ڤێ ده‌ڤه‌رێ بهێته كرن، ب رووهنى دیاردبیت كو هه‌رێم ژ چ ئالیه‌كێ بۆ ئه‌مریكا گرنگه؟، ژلایه‌كى ڤه پتر ژ 35 سالن ئه‌مریكا و ئیران خوه‌دان ئاریشه‌نه و به‌رده‌وام لیدوان و داخویانیێن دژوار ل دژى هه‌ڤدوو دكه‌ن، ژبلى زڤێ یه‌كێ ژى شه‌رێن سار ب چه‌كێن خوه و بێ سه‌ربازێن خوه ل سوریا و یه‌مه‌نێ ژى دناڤبه‌را وان دا گه‌له‌ك جاران روودایه، كه‌واته هێزا ئه‌مریكا ل جهه‌كى بیت كو ژ بۆ ئیرانێ گه‌له‌ك نزیكه گرنگیا خوه یه، چونكى ژلایه‌كى رۆژانه په‌یوه‌ندیێن ئه‌مریكا و توركیا به‌ره‌ف خراببوونێ دچن، ده‌سته‌لاتدارێن واشنتۆێن باش گه‌هشتینه وێ ئه‌نجامێ كو ئیدى توركیا نه دۆست و نه هه‌ڤپه‌یمانێ وانه، زۆرترین جار ژلایێ سیاسیێن ئه‌مریكا هاتییه گۆتن كو تاكه دۆست و ب هێزترێن هه‌ڤپه‌یمانێ واشنتۆنێ ل رۆژهه‌لاتا ناڤێن كوردن، ژلایه‌كێ دی ڤه واشنتۆن باش ل وێ یه‌كێ گه‌هشتییه ئیدى هه‌ژموونا ئیرانێ رۆژانه ل ئیراقێ زێده‌تر دبیت و پتر دژبه‌رێن ئه‌مریكا ده‌سته‌لاتا ئیراقێ وه‌ردگرن، هه‌روه‌سا سۆریا ژى هه‌ڤسنورێ كوردستانێ یه، تا ده‌م ده‌رباز دبیت پتر ئه‌و ئالیێن دژى ئه‌مریكانه ده‌سته‌لاتا وان ل سوریا به‌رفره‌هـ دبیت، نها زۆرترین ئاخا وه‌لاتێ سوریا ل ده‌ستێ سوپایێ سوریایه كو كو هه‌ڤپه‌مانێن وێ ئیران و رۆسیانه و دوو جه‌مسه‌رێن دژه ئه‌مریكانه، كه‌واته ژ بۆى كو هه‌بوونا هه‌ژموونا واشنتۆنێ ل ڤێ ده‌ڤه‌رێ لاواز نه‌بیت، ژبلى هه‌بوونا دۆست و هه‌ڤپه‌یمانان، ئه‌مریكاپێدڤى ب جهه‌كێ جوگرافى یێ ستراتیژى و گۆنجایه، هه‌رێمه‌ك دناڤبه‌را و به‌غدا و ئه‌نقه‌ر و ته‌هرانێ و دیمه‌شقێ دا بیت ل هیچ قولاچه‌كێ ڤێ دنیایێ ب ده‌ستێ ئه‌مریكا ناكه‌ڤیت. نها ئه‌مریكا یێ مه‌زنترین كونسلخانه‌یا خوه ل سه‌ر ئاستێ جیهانێ ل هه‌ولێرێ دروست دكه‌ت و بۆ ڤێ یه‌كێ ژى 600 ملیۆن دۆلار و چار سالێن ده‌ست نیشانكرن، رێوره‌سمێن دانا به‌رێ بنیاتا كونسلخانا ئه‌مریكا ل هه‌ولێرێ و گۆتنێن ل وێرێ هاتینه كرن، وێ ئاخفتنێ ئیسبات دكه‌ت كو ئه‌مریكا هه‌رێما كوردستانه‌كێ ب هێز دڤێت، نه مه‌رجه ئه‌ڤ گۆتن ب تنێ ژ به‌ر دۆستێن خوه‌یێن به‌غدایێ هاتبیته گۆتن و ئه‌و ژ بۆ كوردان پتر ژى بخوازن، هیچ دوور نینه ژ بۆ ب هێزكرنا باشترین دۆستێ خوه ل ڤێ ده‌ڤه‌رێ ئه‌مریكا رۆژه‌كێ ئه‌نجامێن ریفراندۆمێ ته‌فعیل بكه‌ت و جاردن وێ مژارێ ب ئازرینیت، كه‌س ژى نكاریت بێژیته ئه‌مریكا: نۆ..
کارزان فەقێ
