مەرەما من ژ خەتا راست دڤێ گوتارێ دا ئەو نینە ئەوا کو ژ بابەتێن بیرکاری و فیزیا و ئەندازیاریێ دا ھەیە و دئێتە خاندن , بەلکو ئەو خەتا راستە ئەوا کو کەتوار و چارەنڤیسێ میللەتەکێ سەدان سالە کو چ شێوازەک ژ ستەمێ نەمایە کو ل سەر نەھاتبیتە بکار ئینان ب دەھان ناڤ نیشانێن جودا.ئەو خەتا راستا کو سەروکێ حکومەتا ھەرێما کوردستانێ بەحس ژێ کری , دیف دیتنا خوە دێ ل سێ تەوەرێن جودا جودا بەحس ژێ کەم کو ببنە گروڤە بو وێ خەتا کو سەروک وەزیران بەحس ژێ کریە ل سەر ھەمی کێم کورتی و رەخنێن کو ل کەتواری ھەی , ئەڤ سێ تەوەرە دێ بەحس ژ ریدانێن پشتی شازدێ ئوکتوبەرێ کەن کو خەلکی زور ھیڤیا ھندێ دخاست تشتەک نەمینیت ب ناڤێ حکومەتا ھەرێما کوردستانێ :
(١) نێچیرڤان بارزانی چ کارەک بو رێکخستنا ناڤ مالا کوردی و پاراستنا کوردستانێ کر, کو ئەڤرو بەحس ژ خەتا راست بکەت؟ ریدانێن شازدێ ئوکتوبەرێ ژ بیردانکا چو کوردەکێ ب غیرەت دەرناچیت , تایبەتر دەمێ کو پشکەک ژ ئالیەکێ دیارکری یێ کوردی خوە تەسلیمی ئەجیندایێن نافخوی و ھەرێمی کری پشکداربون ل ڤێ کارەساتا ھند یا مەزن , خەتا راست وی دەمی دەستپێکر کو نێچیرڤان بارزانی و تیما حکومەتێ سەرا پارتێن کوردستانی دا بێ ھیچ کارڤەدانەک کو ھێشتا گومێ بشلوقینیت . بەلکو سەروک وەزیران ئەڤ ریدانە رادەستی ڤەکولەر و خودان قەلەم و ئەکادیمیستان کرن و گوت دیروک دێ بەرسڤا ھەرکەسەکێ دەت. لێرەدا خالا دروست ژ خەتا راست دەستپێکر. ھەروەسا سەروکێ حکومەتێ ب دبلوماسیەتا سەرکەفتی شیا بەر سینگێ سوپا و حەشدا شەعبی بگریت و جڤاکێ نێڤدەولەتی بینیتە سەرخەتێ کو ئیدی شەر و توندوتیژی نەچارەسەرە و بو دەمێ سەد سالانە شەر دئێتە تاقیکرن ئێک ئەنجام ھەیە ئەو ژی وێرانکاری و پاشڤەچون.ڤێ پێنگاڤێ کیانێ سیاسی و دەستوری یێ ھەرێما کوردستانی ل نافچونا ئێکجارەکی پاراستن . ھەروەسا ل نافخویێ ھەرێما کوردستانێ ژی دا ڤان ریدانان ھیچ کاریگەریەکا خراب ل سەر وارێ پێکڤەژیانێ نەکریە و بگرە روژ بو روژێ کوردستانی جوداھییان زێدەتر قەبول دکەن . پروسا چاکسازیێ بو گەھشتن ب دادپەروەریا جڤاکی پێنگاڤێن باش ھاتینە ھاڤێتن تایبەت ل پروژە بریارا ماف و ئیمتیازاتێن خانەنشینێن کوردستانێ و زێدەگاڤیێن سەر ئەردێن حکومەتێ و کێمکرنا خەرجیان و دانانا سیستەمێن پێشکەفتی و توندکرنا چاڤدێریێ ڤێ چەندێ کار ل سەر باش بونا رەوشا دارایی ل ھەرێمێ کریە . تایبەت پشتی دانوستاندنێن ناڤبەرا بەغدا و ھەولێرێ گەھشتیە ئەنجام ھەتا رادەکێ و رێژەکا کێم ژ پشکا ھەرێما کوردستانێ ژ مافێن فەرمانبەران ھاتینە ھنارتن کو ئێکسەر رێژا پاشکەفتی کێمکر و بھیڤیا نەھێلانا رێژا پاشکەفتی.ھەروەسا سەروکێ حکومەتێ شیا جارەک دن ھەرێمێ پێخیتەف سەر نەخشێ سیاسی و گەشت و گوزاری و بریارێ ل عیراق و دەڤەرێ , خەتا راست ئەڤەیە کو بەحس ژێ دئێتە کرن .
(٢) پێنگاڤێن سەروکێ حکومەتێ ل گەل بەغدا : پیچەک ھزرا خوە بکەین و بیرا خوە ژ وان کونفرانسێن ھەمی سێ شەمبیا بینین کو (قائید قوات المسلحە) حەیدەر عەبادی دئاخفت و تبلا خو دوەشاند و دگوت (من زاخو الی فاو) ئێک پارچەیە ل بەردەستێ من و سوپایێ من! و ھیچ دانوستاندن نینە ھەتا ریفراندوم نەھێتە ھەلوەشاندن و پێشمەرگە رێکا سوپایێ عیراقێ خوشنەکەت بو گەھشتن ب ھەمی سنورێن عیراقێن یێن نێڤدەولەتی و ھەتا فروکەخانە نەھێنە رادەستکرن ....ھتد.چەندین گەفێن دیژی ھەبون کو کورت و کورمانج خو چەماندن بو عەبادی و بەغدا . پرسیار بو ھەر کەسەکێ کو دڤێت راستیێ بزانیت , ئەرێ ئەوا عەبادی گوتی بیە راست یان سیاسەتا سەرکەفتیانە بو وێ رەوشێ یا نێچیرڤان بارزانی ب سەرکەفت؟ ئەنجامێ ریفراندومێ نەھاتە ھەلوەشاندن و فروکەخانە و دەرازینکێن سنوری زڤرین وەکی بەرێ و باشتر ژی و دانوستاندنا دەست پێکر و پارە ژ ئالیێ بەغدا ھاتە ھنارتن ھەرچەندە دیف مافێن کوردستانیان نینە بەلێ بو ڤی دەمی برەک باشە و سەرەدانێن نافخوی و دەرڤە بو سەروکێ حکومەتێ دەست پێکرن و سوپایێ عیراقێ بەرە پاشڤە بچیت نە پێشڤە بێت و ئیدی داخازا ھەماھنگیێ ل گەل پێشمەرگەی دکەن بو پاراستنا دەڤەرێن کوردستانی و ژبلی ئەوا ب خیانەتێ چوی ھەمی وەک بەرێ زڤریە و پێنگاڤێن جدی ژی ھەنە بو پاراستن و ڤەگەراندنا ئەوا دەست ژی چوی.لێرەدا ئەو پرسیار تێتەکرن , ئەگەر مروڤی چاڤدێریا رەوشا شەش ھەیڤێن چوی کربیت . چاوا ئەڤ خەتە راست بوڤە ؟ رولێ سەروکێ حکومەتا ھەرێما ب روون و ئاشکرا و کارێزمای تێدا دیار بو و شیا کوردستانێ ل نافچونێ بپارێزیت ب پشتەڤانیا خودایێ مەزن و پشتی ھنگی گەلێ ستەم دیتی و خوینا پێشمەرگەی و بێن درێژاھیا گەلێ کوردستانێ.
(٣) دگەل دونیا دەرڤە : کەس خوە ژ بایێ خەشیمیێ نەدەین ب دوست و دوژمنێن ڤێ حکومەتێ ھزر نەدکر کو روژەک بێت حکومەتا ھەرێما کوردستانێ ڤەگەرێت سەر پێین خوە و رولێ خوە ببینیت و ھەتا کونسولەک سلاڤەکێ ل حکومەتێ بکەت. ھەر زی بابەت ھاتە گوھرین و نێچیرڤان بارزانی ل کوچکا ئەلیزێ دەف ماکرونێ سەروکێ گەنجێ فەرەنسی دەرکەفت و پاشی ل دافوس و میونخ و بەغدا و تەھران چاڤ ب چەندین بەرپرسێن ڤان وەلاتان و جیھانی کەفت. ئیدارا ترامپی ژی پشتەڤانیا خوە بو سەرکرداتیا نێچیرڤانی بو ڤێ قوناغێ دیارکر و ب زەلامێ قوناغێ ھژمارت و پشتەڤانیش لێکریە . تورکیا و ئیران دوژمنێن سەرسەختێن ریفراندومێ و پشکدارێن ھێرشێن شازدێ ئوکتوبەرێ , دووبارە گرنگیا کوردستانێ زانیە و دەرزاینکێن سنوری و چون و ھاتنا فروکان دەستپێکریە و ب ھیڤیا نورمال بونا پەیوەندیان ل دەمێن نیزیک دا کو ل بەرژەوەندیا ھەردوو ئالیان دانە. ب گشتی پەیوەندیێن دەرڤە بەرەف باشترن و کوردستان ب باشتر دکەڤیتەف سەر سکەیی و قوناغێن پێش دا دێ رولێ گرنگتر ببینیت ب ئانەھیا خودێ . ئەڤەیە ئەو خەتا راست کو بەحس لێدھاتیە کرن.