پشتی ھەرێما کوردستانێ توشی گەفێن جدی بوی , ل زورترین ئالیان ڤە کو گەف ل سەر ھەبونا وێ یا سیاسی و دەستوری دھاتنەکرن. ل دەمێ ریدانێن شازدێ ئوکتوبەرێ کو ھەفپشکیەکا گشتی ل سەر ھەڤرکی و دوژمناتیا کوردستانێ ھاتبویە وجودێ .زور پێشبینی بو رەوشا وی دەمی و روژێن داھاتی دھاتنە کرن لێ یا جھێ پرسیارێ ئەو بو کو پرانیا ئالیان دگەل نوخبەکا رەشبین ھەمی پێشبینی دکرن , ژبلی ھندێ کو جارەک دن کوردستان دێ ڤەگەریتە سەر ھێزا بەری ب باشتر و پێگەھێ خوەیێ نافخوی و ھەرێمی و نێڤدەولەتی زڤرینیت . گەھشت بونە رادەکێ ژ تەحلیلا سەر پێ کو خو نەدگرت ناڤێ ھەرێما کوردستانێ بینن ! و ئیدی (شیمال العراق) ببو پەیڤا ھەری موحتەرەم بو کوردستانەکا خوەدی کەساتیەک سیاسی و دەستوری و دیروکی و جوگرافی .ل رێژا پێشبینێن خوە بو رەوشا ھەرێمێ و دووبارە زڤرین بو سەر پێین خوە , گەھشت بونا ھندێ کو (چەند حوشتر ل دەرزیکێ را بچیت , ھند کوردستان دێ بھێزکەڤیتەڤە). بەرامبەر ڤان پێشبینی و گوتن و تەحلیلێن رەشبین ژی نوخبەک و ھندەک ئالیی و کەساتی و حکومەتا ھەرێمێ ژی بەردەوام دووپاتی ل سەر ھندێ دکر کو کوردستان ل رەوشەک نەخوش و مەترسیدار دایە و دێ ھێتە دەربازکرن ب براتی و ئێک رێزی و کارێ ھەفپشک . نوخبا بەرەڤان ژیکەر ببویە مەلاق و پارەپەرست ب دیتنا بەرامبەر. لێرەدا و پشتی شەش ھەیڤ دەربازبوی ل سەر ریدانێن شازدێ ئوکتوبەرا سالا چوی ب چەند نموونە و کارێن حکومەتێ دێ بەرسڤا وان پێشبینی و خوەدی ھزرا نەھێلانا کیانێ کوردستانێ دەین.
بریارا کێمکرنا موچێ فەرمانبەرێن کوردستانێ دیف سیستەمەکێ نوی یێ پاشکەفتی بو دەربازبون ل وێ رەوشا دارایی یا خراب ل دەستپێکا سالا(٢٠١٦) , ب بریارا جڤاتا وەزیران و ب دەنگێ پرانیا پارتێن کوردستانی ل حکومەتێ دا . نەرازیبون دیف خوە دا ئینان و فەرمانبەر توشی ژیانەک گران کرن ل ڤان دوو سالان دا. بەلێ بەردەوام ئەو سوزە داھاتە دان ژ ئالیێ سەروکێ حکومەتێ ڤە ب باش بونا رەوشا دارایی دێ دەست ژ رێژا پاشکەفتێ موچەی ئێتەدان ھەتا رادێ نەھێلانا ڤی سیستەمی کو ب ڤیانا چو ئالیەکێ نەبویە بەلکی ژ ئەنجامێ رەوشەکا نەخوش بویە. پشتی دەستپێکرنا دانوستاندنا ناڤبەرا ھەولێر و بەغدا و پێکولێن جدیێن نێچیرڤان بارزانی سەروکێ حکومەتا ھەرێمێ شیان بگەھەنە وێ رێکەفتنێ کو ئیدی عیراق (٣١٧)ملیار دیناران بدەتە کوردستانێ ل گەل داھاتێن نافخوی موچەێ فەرمانبەران بێتە دان و رێژا پاشکەفتی بێتەکێم کرن. کێم کرنا رێژا پاشکەفتی دنھا دا بریارەکا دلخوشکەر بو و بویە ئەگەرێ رازیبونا تەخا فەرمانبەران ب ھیڤیا ھندێ کو ئەڤ سیستەمە ھەر ژ بنەرەت دا نەمینیت. ئەڤ بریارە ژی جێ بەجێ کرنا وێ سوزێ بو حکومەتا ھەرێما کوردستانێ ددا ب باش بونا رەوشا دارایی دێ دەستکاری ل رێژا پاشکەفتی ئێتەکرن.ئەڤ بریارە بو خوەدیێن پێشبینین ھەرفینا ئابورێ کوردستانێ نە یا خوەش بویە و ژبەرکو ب ھیڤیا وێ چەندێ بون کوردستان ئالایێ سپی بلند بکەت و ئیدی ببیتە ژ رابردووی.
سەر ژێھەلی وسەرژووردایی ژ خەباتا گەلێن بن دەست تشتەک نورمالە و پێشبینی بو دئێتەکرن , بەلێ تشتێ مەترسیدار ئەوە دەمێ بوچونەک دەف نوخبێ و ھاولاتی و پشکەک ژی ئالیێن سیاسی دروست بیت کو باوەری ب دەسەلاتا سیاسی و وەلاتێ خوە نەمینیت , ھەمی دیتنەک ھەبیت بو پاشەروژێ ژبلی وێ ئێکێ کو ئەڤ وەلاتە دێ بھێزکەڤیت و سەکەڤیت و ئێتەف سەرپێین خوە!.ل داویێ ئەگەر مروڤ خوە ب خویندەوار بھژمێریت و خاندنەک بو رەوشێ ھەبیت دێ باش زانیت دەربازکرنا ڤێ رەوشا ئالوزا ھەرێما کوردستانێ ل ڤی دەمێ کورت دا کو پتر ژ تەحەدی و مەترسی و گەفەکێ ل سەر کوردستانێ ھەبو نەکارەک کێم بو, باراپتر ژ شەرەفا دەربازکرنا ڤێ رەوشێ بو سیاسەتا سەرکەفتی یا سەروکێ حکومەتا ھەرێما کوردستانێ دزڤریت دەمێ شیای ھەمی ئالی و وەلاتێن خوەدی دەست ل عیراقێ بکەتە ھەفسوزێن کوردستانێ ب داکوکی کرن ل سەر بجە ئینانا دەستورێ عیراقێ و دیرکەفتن ژ بژاردەیا شەری و وەرگرتنا مافێن کودستانیا و پاراستنا وان دەستکەفتیێن ھەیی. و بەردەوام دان ب کاروانێ چاکسازیێ کو دێ بیتە فاکتەرێ خوەشتر کرنا رەوشا دارایی و بەرقەراکرنا دادپەروەریا جڤاکی ژی پتر ئێک رێژیی بدەست دئینیت.
ل داویێ پێشبینا وان کەس و ئالیان نەبویە واقع و ب پێنگاڤێن دبلوماسی و دیرکەفتنا شەری نیزیکبونا ڤەگەریانا پێشمەرگەی بو سنورێن سەد وچل و دەستکاری کرنا رێژا پاشکەفتی ھەمی بەرسڤن بو خوەدی ھزرێن رەشبین و نەھێلانا کیانێ کوردستانێ.