چەند رۆژە پێلەکا خوەنیشاندانێن نەرازیبوونێ ژ لایێ مامۆستا و فەرمانبەران ل سەرانسەری باژارێن هەرێما کوردستانێ ڤەگرتیە، د ڤان خوەنیشاندانان دا داخوازا پێداچوون د پاشکەفتێ مووچەی دا دهێتە کرن، لێ ل پرانیا باژاران ئاراستەیا ڤان خوەنیشاندانان بەرەڤ ئاقەرەکێ دیڤە دچیت و هند لایەنێن سیاسی ڤان خوەنیشاندانان ب دەلیڤە دبینن بۆ دەستپێکرنا بانگەشەیا هەلبژارتنان.
بەریا جەژنا نەوروزێ حەیدەر عەبادی وەک هەر جار پرۆپاگندەیا هندێ کر کو دێ مووچەیێ ماموستا و کارمەندێن ساخلەمیا هەرێمێ ب درستی رەوانەکە، لێ وەک هەر جار چ راستی ژ بۆ گوتنا وی نەبوون بەلکو ئەو برە پارەیێ هنارتی ژ بۆ هەموو وەزارەتان بوو، ئەڤە ژی پشتی چەند رۆژا نڤێسینگەها وی دۆپات کر کو ئەو پارە بۆ هەمی وەزارەتانە. ئەڤە د دەمەکی دایە کو پارەیێ ژ لایێ بەغدا ڤە هاتیە هنارتن تێرا مووچەیێ فەرمانبەران ناکەت بەلکو دڤێت حکومەتا هەرێمێ ب داهاتێ ناڤخوە وی کوژمەی تمام بکەت تا کو مووچەیێ فەرمانبەران بدەت. پشتی ڤی هەلوسیتێ حکومەتا بەغدا هەرزو حکومەتا هەرێمێ بریار دایە د ڤێ حەفتیێ دا پێداچوونێ د پاشکەفتێ موچەی دا بهێت کرن، لێ ئەڤ چەندە بۆیە دەلیڤە ژ بۆ وان پارتێن بەریا نها داخوازا هەلوەشاندنا حکومەتا هەرێمێ دکر و هانا ماموستا و فەرمانبەران دا بۆ خوەنیشاندانان ، و کرە دەستپێکەک ژ بۆ بانگەشەیا خوە یا هەلبژارتنان، ئەڤە ژی ب ئاشکرایی ل هندەک باژاران هاتە دیتن کو پەرلەمانتارێن وان لایەنان دناڤا خوەنیشاندەران دا دهاتنە دیتن و ب دروشمێن دیر ژ هەموو پرەنسیپێن دیموکراسی هانا خەلکی ددا ژ بۆ تێکدانێ و ژ وێ رێیێ دەرکەڤن یاکو ئەو داخوازا مافێن خوە یێ رەوا بکەن. پتریا ڤان لایەنان هەر ئەو بوون یێن داخواز ژ عەبادی دکر سەرەدەریێ دگەل حکەمتا هەرێمێ نەکەت و مووچەی رەوانە نەکەت.
ل هەموو جیهانێ رەوایە خەلک داخوازا مافێ خوە بکەت، گەر سەحکەینێ چ رێگری ل داخوازیێن ماموستایان نەهاتیە کرن و مافێ وایە داخوازا مووچەیێ خوە بکەن لێ وان لایەنان خوە ئێخستە دناڤا وێ پێلێ دا هانا ماموستا و فەرمانبەران ددەن ل دژی دەستەلاتێ دروشمان بلند بکەن، لگەلەک جهان ژی وان ماموستا و فەرمانبەرێن داخوازا مافێن خوە کری ب هشیارانا داخوازیێن خوە دکرن و شیاینە وان دەستێن تێکدەر ژ ناڤا خوە بکەنە دەرێ.
پروپانگندە و ب دەست ڤەئینانا دەنگان و گرتنا کورسیا دەستەلاتێ ب تێکدانا سیستەمێ دیموکراسیێ و ئاراستەکرنا خەلکێ هەژار و نەدار ب تێکدانێ نینە، ئەڤا ئەو لایەن دکەن خوارنا نانێ وایە ب ئافکا مافێن رەوا یێن ماموستا و فەرمانبەران ژ بەرکو نزیکی دو مەهان ماینە بۆ هەلبژارتنان گەر راستە ئەو د خەما گەلی دانە و دێ داخوازیێن وان بجهئینن بلا ل سەر سندوقێن دەنگدانێ تولا خوە ڤەکەن و خوە بکەنە ژ حزبێن دەستپێکێ ب ئینانا دەنگان نەک نانێ خوە ب داخوازیێن ماموستا و فەرمانبەران بخون، یا دیارە ژی سەرەرای وێ دورپێچا ل سەر هەرێمێ ژ هەموو لایەکی ڤە ئەولەویەتا حکومەتا هەرێمێ یا سەرەکی دابینکرنا مووچەیی بوویە ب چ رەنگێ بیت، د ڤێ حەفتیێ ژی دێ بریارا گهورینێ د پاشکەفتێ مووچەی دا کەت.