ل دیروکا کلتوری و سیاسی یا کوردی ب دەھان شێواز خائین و خوەشباوەر داینە نیاسین و ھەر ئێکێ ژی دەھان نموونە و سەرھاتی ژی ھەنە. ئەگەر ئەم بێین ل سەر خوەشباوەریێ ب ئاخڤین دێ بینین کو وی کەسی دگریت دەمێ ھەر تشتێ ھاتە گوتن بێ لێزڤرین و گریمان و دیفچون و ڤەکولین و ئێکسەر باوەریێ پێ دکەت , و ھەر تشتێ ھاتە گوتن و داخاز لێ ھاتە کرن بێ بزانیت نیەتا بەرامبەر چیە و بوچی یە و ل سەر چیە و چ دەمە و چ دیڤدا دئێت و کەنگی دەمێ بریارێ یە و دێ چاوا و ب چ ئالاڤ بریارێ دەت و بو کی ددەت و پێتڤی ب چەند دەمی ؟ ئێکسەر دێ بریارێ دەت!. ئەڤ خوەشباروەریا ناڤ جڤاکێ کوردی داھەی تایبەت ل دیروکێ کو دەف زورەک ژ سەرکردێن شورەشگێرێن کورد ھەبویە دربێن مەزن ل بزاڤا رزگاری خوازا کوردی دایە. ژ نموونێن ھەری دیار ل سەر بابەتی باوەری ئینانا سمکویێ شکاک بو ب سوزێن بێ بنەماێن سەکردێن ئیرانێ و ڤەگەریان بو وەلاتی کو ئەڤ بریارا شاش بو ئەگەرێ سێدارەدانا وی و داوی ھاتنا بزاڤا وی, ھەروەسا ل سالێن سیھا یێن چەرخێ بوری سەید رەزایێ دێرسیمی ژی کەفتە ھەمان شاشی و چو دانوستاندنا ل گەل نیزاما بەلتجیا مستەفا کەمال ئەتاتورکی و ب خوشباوەری و دل پاکژیا خوە کو دسیاسەتێ دا دەستپێکێ فەرە تایبەت بەرامبەر دوژمنی ھزرا خراب لێ بکەی نەخاسمە ئەگەر دوژمنێ تە دەولەتێن قەومیچی و خراب دوستێن دەڤەرێ بن وەکی تورک و فارس و عەرەب کو جڤاکێ وان بویە فاکتەرێ سەرەکی یێ بەرھەم ئینانا نیزامێن دکتاتورێن جوداھی رەتکەر.دیروکا کوردان پری نموونێن ب ڤی ئاوایی یە و ھەر جار ب ناڤەکێ و کارەکێ و سوزەکێ و جار ب دینی و جار ب دونیایی دوژمنی شیایە کلاڤێ خوە ل سەر سەرێ ئارمانجێن کوردان بکەت.
دیروک چیروکە و بو بەری نڤستنێ باشە , ئەگەر مروڤ مفای لێ وەرنەگریت. ئەو مفا ژی ئەوە کو باشی بێنە زێدەکرن و داھێنان ژی دیف سەردەمی بێنە زێدەکرن و شاشی ژی بێنە دیارکرن و ھەمی پێکولەک بێتە کرن کو کێم و کورتی و خوەشباوەری و خیانەت و کلاڤ ل سەر کرنانێ ئەوا مە ل دیروکێ دیتی نەمینیت و ئیدی کورد ژی وەکی سومالی و ئەفغانی و جیبوتی و زیمبابویا و کەمبودیا ب مافێن خوەیێن رەوا بگەھیت و ببیتە خوەدیێ کیانەکێ سەربەخو. لێ مخابن شازدێ ئوکتوبەرێ ئەم ئیناینە خالا دەستپێکی و دیار بو کو خوەشباوەری و خیانەت ل گەل خروکێن سور و سپیێن گەلەک سەرکردێن کوردا دا ھەیە . بوچی خوەشباوەری کو ئەم بەرسڤا خیانەتێ دزانین؟ئەگەر خوەشباوەری نینە , بوچی دەست بەردان ل وان ئەوێن دگوت کەرکوک ئارامە! ئەگەر خوەشباوەری نینە ؟ بوچی زورەک ژ وان کەسێن ھژمارە سیە و ھەشت دگوت مە نەزانی حەشد دێ بڤی ئاوایی سەرەدەریێ ل گەل خەلکێ مەکەن...ھتد. خوەشباوەری بو ھەروەکی پەیڤێن مودرێن ژی بو ھاتینە دیتن کالفاما و فێسبوکباز.
د نھا دا کو حکومەتا ھەرێما کوردستانێ نونەراتیا گەلێ کوردستانێ دکەت ب ھەمی دەنگ و رەنگا و ئەڤ چەندە ژی دیار بو پشتی وان کاودانێن ب ئەگەرێ سیاسەت و خوەشباوەری و خیانەتا کالفاما ھاتە مەیدانێ , ھەر ھەمی رێک زڤرینەف دەف حکومەتا ھەرێمێ. بەلێ ھەر دیسان فەرە حکومەت ل نیەت و کار و پیلانێن حکومەتا عیراقێ ژی ھوشیار بیت و نانێ خوە ل ئێک چاندکێ نەکەت ب ھیچ رەنگەکێ ل ھیڤیا ھندێ نەبیت ھەتا داویێ کو دێ حکومەتەک مە پارەدار کەت کو شەرێ مان و نەمانێ ل گەل مەکربیت . ل سەر حکومەتا ھەرێما کوردستانێ یەبەردەوامیێ ب پروسا چاکسازیێ بدەت کو ببیتە ئەگەرێ ھندێ خەلک تایبەت فەرمانبەر ل ھیڤیا ( بەپەلە و بلەز و نھا و ئانھا و نوکە و زیندیا و عاجل ...) نەبن بو وەرگرتنا کێمترین مافێ خوە کوموچەیە.
پشتی ریدانێن ڤێ داویێ و سیاسەتا واقع بینانە یا نێچیرڤان بارزانی سەروکێ حکومەتا ھەرێما کوردستانێ کو ل بەرامبەر بەغدا گرتیە بەر , بویە ئەگەرێ ڤەکرنا فروکەخانە و ھنارتنا پشکەک ژ پارێ موچێن فەرمانبەرێن ھەرێما کوردستانێو چاڤەرێ تێتە کرن ئەگەر حەیدەر عەبادی ب لوژیک کار بکەت و ل گڤاشتنێن دەردور دەرباز ببیت ل ھەڤھاتنێن دیتر ژی بەرھەم بێن.گرنگە حکومەتا ھەرێما کوردستانێ ھەمی رێکەکێ بگریتە بەر بو دەربازکرنا ڤێ قویناغا قەیرانا وی کو رەوشا خەلی زور مەترسیدار بویە و دەرفەتا دەستێن دەرکی و تێکدەر ژی دئێتە کرن ,ئەگەر حکومەت پێکولێن جدی نەگریتە بەر.
ل داویێ ژی گرنگە دیروکا کوردستانێ پتر بێتە روون کرن بو نفشێن داھاتی بو ھندێ بزانن د دیروکێ دا خوەشباوەری و خیانەت زورجاران بوینە فاکتەرێ ژ نافچونا بزاڤێن کوردی ب سەرکردێن خوەڤە.لێ تشتێ ل سەدێ بیست و ئێکێ نەتاتە چاڤەرێکرن ئەو بو کو گروپەک خیانەتێ بکەت و جارەک دن چ حیساب ژی بونەھێنەکرن.لێ قەدەرا خاین و خوەفروشان ھەر ھوسا بویە. سەر ئێک ڤەئینان ڤێ رەوشێ تایبەت دەمێ گەھشتیە رادەکێ کو مەترسی ل سەر کیانێ سیاسی و دەستوری یێ کوردستانێ دکر ب پێکولێن سەروکێ حکومەتا ھەرێما کوردستانێ ئەڤ رەوشە دەرباز بو , خەلک چ داخازیێن زێدەناکەت ژ بلی مافێن خوەیێن سادە و ب ھیڤیا ھندێ کو حکومەت بشێت ڤان داخازیان بجە بینیت و ئیدی دەستێن خائین و دەرەکی و تێکدر ژی ل مافێن سادە و رەوایێن خەلکێ کوردستانێ دیر بکەت.