رێبازی بارزانیی ، قوتابخانەی كوردایەتی و رٍەتكردنەوەی ژێر دەستییە ..
رێبوار حەمەلاو شوانی
بارزانی ئەو سەركردە كاریزمایەی كە دامەزرێنەری پارتی دیموكراتی كوردوستان و گەورەترین شۆڕشی كوردایەتی ئەیلولی مەزن بوو ،بەڵام بە پێچەوانەی هێزە دروشم باز و ئایدیۆلۆژییەكانەوە ، كە گەل دەكەن بە ئامراز بۆ خزمەتی ئامانجی حیزب ، بارزانی هەمیشە جەختی دەكردەوە كە حیزب ئامرازە بۆ بۆ خزمەتی ئامانجێكی گەورە ، كە گەل و نیشتیمانە
بارزانی ئەو سەركردە ڕەمزی و سمبولی یە بوو كە پیداویستی مێژویی دروستی كردبوو ، لەناو هەست و ئیرادەی خەڵك و لەناو گۆڕەپانی بەرگری دادپەروەرانەی شۆڕشی میللیدا توانی ڕاو ڕایەڵەی كۆمەڵایەتی یە جیاوازەكان كۆبكاتەوەو ئیرادەی میللی لە كوردوستاندا بۆ شۆڕش و خۆڕاگری و پێشمەرگایەتی فۆرمەلە بكات و میژوو بڕسكێنێ
هەرچەندە بیری نەتەوەیی لای بارزانی بە مانای فرەیی و، پاراستنی جیاوازی زمان و ئایین و هاوسەنگی و پێكەوە ژیانی نەتەوەیی بوو ، هاوكات بارزانی ئەو سەركردە مەیدانی و جوامێرە بوو كە لەڕێگەی ڕوبەڕوبوونەوەی دەستەڵاتە دیكتاتۆر و شۆڤینیەكانی هەرسێ دەوڵەتی عێراق و ئێران و توركیا وە پەیامی پێكەوە گرێدانی شۆڕشی نەتەوەیی بە نە نەیاران و داگیركەران دەداو ، پێی دەوتن كەكوردوستان یەك نیشتیمانە و گەلی كوردیش یەك چارەنوسی هاوبەشی هەیە و دەبێت لە چوارچێوەی یەك سنوری شەرعی و پێناسەكراودا خۆی كۆبكاتەوە.
پارتی دیموكراتی كوردستان ئەو رێبازە كوردانەیە كە بۆ رزگاركردنی گەلی كوردستان و رەتكردنەوەی ژێردەستی و سەرفرازی كورد تێكۆشاوە. هەروەها بۆ بەرز و بڵند راگرتنی ئاڵای كوردستان، لەم پێناوەشدا زۆر قوربانی پێشكەشكردووە و مێژووێكی پڕ لە سەروەری تۆماركردووە كە لەپێش هەموو شتێكدا باوەڕی بۆ میللەتی كورد دروستكرد بەوەی كورد خاوەن قەزیەیەكی نەتەوەییە چ بە خەباتی سیاسی یان بە شۆڕش و راپەڕینەكانی بەتایبەتی شۆڕشی ئەیلوولی مەزن كە یەكێكە لە شۆڕشە گەورەكانی جیهان، هەمیشە لە لای پارتی ئایندە و بەرژەوەندی گەل و وڵات لە هەموو شتێك لەپێشتربووە، پارتی دیموكراسی كوردستان هەمیشە ئاشتیخواز بووە، چونكە سەركردە رۆحییەكەی مستەفا بارزانیی، گەورەترین ئاشتیخواز بووە، بۆیە پارتی دەیان ساڵە لە دژی ستەم و زۆرداری و چەوساندنەوە تێدەكۆشێت و بۆ سەلماندنی ئەمەش پارتی یەكەمین لایەن بووە كە بانگەوازی بۆ دیموكراسی كرد، پارتی لەمەشدا سەركەوتنێكی گەورەی بەدەستهێنا و لە تەمەنی خەباتییدا تووشی چەندین پیلان و پەلاماری دوژمنان و ناحەزان بووەتەوە، تەنها لەبەر رێبازە پیرۆزەكەی كە ئەویش رێبازی بارزانییە، رێبازێكە پڕاو پڕ لە كوردپەروەری و كوردایەتی، بەڵام پارتی هەمیشە بە سەربەرزانەوە لێی دەربازبووە. رۆڵێكی سەرەكی نواندووە لەپێناو پاراستنی یەكڕیزی كورد و لەم پێناوەشدا حزبایەتی خۆی بەلاوەناوە، بەڵام زۆر بەداخەوە ئەو خەباتەی پارتی بۆچوونی هەندێك لایەنی دیكەی تێكدا بە هەڵدارۆیشتن، ئەوان بە هەڵە لە سینگفراوانی پارتی گەیشتن، پارتی هەر كاتێك زانی كە مەترسی هەیە بۆ سەر گەلەكەی، بۆ سەر یاساو مافی مرۆڤ، بەبێ دوودڵی بەرژەوەندی میللەت و وڵاتەكەی دەخاتە پێش هەموو بەرژەوەندییەكانی ترەوە، بۆیە لەو گۆشەنیگایەوە، دەڵێم پارتی واتە دیموكراسی، عەدالەتی كۆمەڵایەتی، سەقامگیری، ئاشتیی، ئازادیی، پێكەوەژیان، ئەوە پارتییە ناسنامەی نەتەوەی میللەتی كوردی پاراست و ئەمەش شتێكی كەم نییە و پارتی لە رووی دەستكەوتەوە ئەگەر تەماشای مێژووی گەلی كورد بكەین، گەلی كورد هەر دەستكەوتێكی بەدەستهێنابێت، هەمووی لەسەردەستی پارتی بەدەستهاتووە، پارتی دیموكراتی كوردستان ئەمڕۆ گەورەترین پارتە و گرنگترین پارتە كە خاوەنی زۆرترین دەسكەوتی نەتەوەییە، هەر بۆیەش هەمیشە پارتی خاوەن جەماوەرێكی نە گۆڕە و هەمیشە سەدان هەزار كەس لە دەوری ئاڵاكەی كۆبوونەتەوە، هەرچەندە خەڵكانێك هەن كە هەموو هەوڵێكی خۆیان خستووەتەگەڕ تا بتوانن بیر و باوەڕی ئەم جەماوەرە بگۆڕن، بەڵام ئەم هەوڵانە هەر هەمووی بێ سوودە، چونكە گەلی كوردستان باش دەزانێت چ لایەنێك چۆن هەنگاودەنێت، هەنگاوەكانی بە چ ئاراستەیەكدان، ئەمەش زۆر روونە كە هەموو هەنگاوەكانی پارتی بەرەو ئاراستەی كوردایەتی و گەیاندنی كوردە بە كەنارٍی دڵنیایی..
