هەموومان دەزانین كە بەیاننامەی (11ی ئازاری 1970) هەتا ئەمڕۆشی لەگەڵدا بێت، رای خەڵكی كوردستانی كردووە بە دوو بەشەوە لە لایەك لە قەڵەمدانی بە رووداوێكی گرنگ و مێژوویی لە لایەكی دیكەوە كەمكردنەوەی ئەو گرنگییە. بێگومان لەو بابەتەدا بە تەبیعەتی حاڵ رەوشت و ئاكاری مرۆڤ بە شێوەیەكی سروشتی رۆڵ دەبینێت لە حوكمدان بەسەر رووداوێكدا كە لەگەڵی بووبێت، یان دژی بووبێت لە كاتی دەركەوتنی دەرئەنجامەكاندا، بەهەر حاڵ هەموومان دەزانین كە بەیاننامەكە لە ساڵی 1970 روویدا، بۆ تێگەیشتن لە هەر رووداوێك بە شێوەیەكی ورد پێویستە مرۆڤ خۆی بخاتە قاوغی ئەو ساڵەوە و تەماشی چواردەوری بكات و بزانێت چی گوزەراوە لە سەروبەندی رووداوەكەدا؟
جەنابی خوێنەر بفەرموو پێكەوە خۆ بخەینە قاڵبی كوڕە كوردێكی پێشمەرگەی پاك و بیرساف كە زۆر دادپەروەر بێت و لە دڵیدا جگە لە راستی جێگەی گەردە ناهەقییەك نەبێتەوە و ئەگەر لە بابەتێكدا سووچی خۆشی تێدا بێت، پێش هەمووان سەركۆنەی خۆی دەكات و ناسرەوێت تا قەرەبووی نەكاتەوە. بۆیە بە چاوێكی دوور لە حزبایەتی و زیرەكی فرۆشتن ئەمڕۆ كە (10 ی ئازاری 2018)یە، لە گرووپی كاندیدەكانی سلێمانی بۆ پەرلەمانی عێراق پیرۆزبایی كرا بە بۆنەی ساڵیادی 11ی ئازار، منیش خوم لە هەر بیرێكی حزبی جیاكردەوە و بە چاوێكی عادیلانە گرنگیی ئەو رۆژە لەم خاڵانەی خوارەوە دەبینم و هەڵویستم بەم شێوەیە لای خۆم و خوای خۆم تۆمار كرد:
1. راستییەك هەیە كە هەموومان دەیزانین ئەویش بریتییە لەوەی كە داستانی چیای هەندرێن لە حوزەیرانی ساڵی 1966 كردیە كارێك كە رژێمی عێراقی ناسیۆنالیزمی عەرەبی بە ناچاری ملی هۆڕی بدات بۆ ئاشتی، ئەو داستانە گرنگ بوو، چونكە یەكەم خۆ جەڕباندنی ئینقیلابچیەكانی ساڵی 1963 و ئەو گرووپە كوردەی كە بۆ بەرژەوەندیی تایبەتی و دەسەڵات لە ساڵی 1964 بەرژەوەندیی گشتیی كوردانیان فەرامۆش كرد، شەڕی هەندرێن بوو، سەرنەگرتنی ئەو هەوڵە نۆبەرەیە بووە مایەی رووشاندنی ئیرادەی دوژمنانی كورد و ئەوانەی لە گەڵیاندان، چونكە بردنەوەی گێمی یەكەمی شەڕ كاریگەری هەیە لەسەر گێمەكانی دیكەی شەڕ. ئەوە بوو پتر لە 2500 سەربازی عێراقی لەو شەڕەدا كوژران كە لە بنەڕەتدا 4000 سەرباز هاتبوونە مەیدان، لە بەرانبەردا ژمارەی شەهید و برینداری كورد لە 200 شەهید و زامدار تێنەپەڕی، پلانی بەرپەرچدانەوەی هێرشەكەی عێراق بە چوار میحوەری كورد وەڵامدرایە، كە هەر میحوەرێك 220 پێشمەرگەی تێدابوو، 30 پێشمەرگەی دیكەش دانرابوون بۆ دەستگیركردنی بەرپرسی لیواكە، بەڵام ئەو بەرپرسە پاش نزیكبوونەوەی لە مەرگ بە چەند مەترێك خۆی قوتاركرد.
2. بردنەوەی شەڕەكە بووە مایەی بەهێتر بوونی هێزی پێشمەرگەی كوردستان و رژێمی عێراق ئەگەر یەك حیسابی بۆ شۆڕشەكەی كوردستان كردبێت، ئەوا پاش شەڕ هەزاری خستە سەر و كردیە هەزارو یەك حیساب، چونكە زەبری كوشندەی شۆڕشەكەی بینی لە سایەی چەكێكی كەمدا، بۆیە وێنەیەكی ترسناكی لا دروست بوو، پاش ئەو دەستكەوتە سەربازییانەی كەوتە دەستی پێشمەرگە.
3. بە شێوەیەكی فیعلی بۆ یەكەمجار ئەو شۆڕشەی لە ئەیلوولی 1961 هەڵگیرسا، پاش پێنج ساڵ لە داستانی هەندرێن سەنگ و هێزی خۆی تاقی كردەوە.
4. جارێكی دیكە چیاكانی كوردستان سەلماندیان كە دۆستی راستەقینەمانن و ناسنامەی نەتەوەییمان بە هۆی سەختیی ناوچەكانمانەوە ماوەتەوە لەگەڵ ئیرادەیەكی پۆڵایینی بارزانیی نەمر.
5. قایلكردنی بارزانیی نەمر بە كشانەوەی لە جێگایەكی دیاریكراو تاوەكو جەیش و جاشی عێراقی لە داستانەكەی هەندرێندا بەپێی ستراتیژیی راوێژكاری دەوڵەتێكی دۆستی كورد، ئەم قایلبوونە دەلالەتە بۆ ئامادەباشی و زەین روونیی بارزانیی نەمر بۆ تێگەیشتنی وێنەی پێچەوانە لەوەی خۆی بڕوای پێیەتی، چونكە كاتێك پێی دەڵێن: با پاشەكشەیەكی تەكتیكی بكەین، دوای مشتومڕێكی زۆر نیگایەكی تیژ دەگرێتە ئەو راوێژكارە و دەفەرموێت: «ئەوەتان بیرنەچێ كە ئێوە سوورن لەسەر ئەو پاشەكشەیە.»
6. بارودۆخی پێش هەڵگیرسانی شەڕی عەرەب – ئیسرائیل لە ساڵی 1967، هاوكاری دەوڵەتێكی دۆستی كوردی دابین كردبوو بۆ شەڕی هەندرین بە شێوەی پێشكەشكردنی راوێژ.
7. سەلماندنی ئاشتیخوازیی سەركردایەتیی كورد لە كاتی بەهێزیدا كە بەشێك بوو لە كەسایەتیی بارزانیی نەمر.
8. خودا كوڕێكی ئاشتیخوازی دابوو بە بارزانیی نەمر و كوردان، لەو سەروبەندەدا كە كەم ژیا، بەڵام رۆڵێكی وا گەورەی بینی، مرۆڤ سەد ساڵیش بژی، ئەوەندە لە گرنگیی ئاشتی حاڵی نابێت، ئەویش كاك ئیدریسی هەمیشە زیندوو بوو، چونكە بە گوێرەی تەمەن و ئەزموون ئەو كاتە ترۆپكی رۆڵی بەڕێزیان بوو لە شۆڕشی كوردستان و یەكەم بەرهەمی پەروەردەی بارزانیی نەمر دەركەوت وەك باوكێك، بەرهەمەكەی دیكەی ئەو پەروەردەیەش مێرخاسێكە كە بۆ هەموو جیهانی سەلماند، بێ دڵوپێك خوێن واز لە دەسەڵات و پلە وپایە دێنێت لە ناوجەرگەی رۆژهەڵاتی ناڤینێكدا كە هیچ سەركردەیەكی بە دەریایەك خوێن نەبێ، لە كورسیی دەسەڵات جیا نەبۆتەوە.