پشتى ریدانێن شازدێ ئوكتوبه‌رێ و ئه‌و پێشهاتێن ب دیف دا هاتى ل ده‌ست دانا نیزیكى پێنجى ل سه‌دێ ئاخا كوردستانێ ب ره‌نگه‌كێ ده‌مكى , و بێ به‌هربونا كوردستانێ ل چه‌ندین داهاتێن گرنگێن ده‌ڤه‌رێن كوردستانى و ئه‌و ئالوزیێن گوره‌پانا سیاسى یا كوردستانێ ڤه‌ گرتى و پارچه‌ پارچه‌ بونا ئالیێن كوردستانى و ده‌ركه‌فتنا ته‌خه‌كا سیاسى و ئالیێن گرێداى ب به‌غداڤه‌ و كو پشكدار و تمامكه‌رێن پیلانێن دوژمنكارانه‌یێن به‌غدا تێنه‌ دانان , ڤێ چه‌ندێ ته‌رازییا هێزێ بو ئالیێ عه‌بادى راكێشا و ل جهێ هندێ كو پێكولا چاره‌سه‌ركرنا كێشێن ناڤبه‌را هه‌ولێر و به‌غدا بده‌ت , غروره‌ك بێ واتا بو دروست بو و هه‌روه‌كى چ سه‌ركردێن به‌غدا خو ل به‌رسینگێ كوردستانێ نه‌دایى و ئه‌وێ بویه‌ و خه‌ون و كوردستان ژى بویه‌ سونبولا خه‌بات و ئازادى و پێكڤه‌ژیانێ.
پشتى قه‌یرانا سێ سالى كو كوردستان ڤه‌گرتى و گرانتربونا وێ ژ ئه‌نجامێ خیانه‌تا شازدێ ئوكتوبه‌رێ . حكومه‌تا هه‌رێما كوردستانێ كه‌فته‌ قه‌یران و دورپێچ و هه‌مى ئالى كو ده‌ربازكرنا وێ پێتڤى ب كاره‌ك مه‌زن و سیاسه‌ته‌ك ستراتیجى بو. تاكه‌ رێك بو ده‌ربازبونا ڤى ده‌مى دبلوماسیه‌تا سه‌ركه‌فتى بو كو هاتیه‌ جێ به‌جێ كرن ژ ئالیێ نێچرڤان بارزانى ڤه‌ كو شیا پێداگیریێ ل سه‌ر ده‌ستورێ عیراقێ بكه‌ت وه‌ك ئێك پاكێچ , و رێزێ ل بریارێن دادگه‌ها فیدرال ژى بگریت.هه‌روه‌سا رێز ل بوچونێن نه‌ته‌وێن ئێكگرتى و ئه‌مریكا و ئه‌وروپا و هه‌تا وه‌لاتێن ده‌ردور ژى بگریت.
پشتى سه‌رنه‌گرتنا پیلانێن دژى هه‌رێما كوردستانێ كو خوه‌ ژ ناڤبرنا كیانێ سیاسى و ده‌ستورى یێ هه‌رێمێ گرتبو. حه‌یده‌ر عه‌بادى ده‌ست ب پروپاگندا كر ل دژى حكومه‌تا هه‌رێمێ و هه‌ر هه‌فتیێ جاره‌كێ ده‌م و ژڤان ل گه‌ل فه‌رمانبه‌رێن كوردستانێ هه‌بو و ب ده‌نگه‌كێ بلند دگوت ب مه‌رج دێ پارێ وه‌سه‌رف كه‌م, پشتى كو حكومه‌تا هه‌رێما كوردستانێ هه‌مى رێكارێن یاسایى و هوربینیكرنێ و هونه‌رى ل گه‌ل به‌غدا ئه‌نجام داى و كار ب شێوازه‌كێ زانستى ب ئه‌نجام گه‌هشتى , عه‌بادى ئێك فلسێ سور نه‌ هنارت و هه‌ر ل سه‌ر سوزێن خوه‌ به‌رده‌وامه‌ و د گه‌ل زێده‌كرنا مه‌رجان و ئاسێ كرنا كارى.ب ڤان گوتنا عه‌بادى پشكه‌ك ژ فه‌رمانبه‌رێن خوه‌دى ماف و ئالیێن خوه‌دى نێرینا حكومه‌تا ئینقازێ خاپاندینه‌ .
دڤێ كڤانێ دا دیار دبیت پشتى چوار هه‌یڤێن خیانه‌تێ و هێرشا حه‌شدا شه‌عبى و غرورا عه‌بادى, قه‌یران هنارتن و نه‌هنارتن و هه‌بون و نه‌بونا پاره‌ى نینه‌ .چونكى هه‌مى رێكارێن یاسایى و هونه‌رى و هوربینكرن هاتنه‌ كرن , و حكومه‌تا هه‌رێمێ زورترین جاران به‌رهه‌ڤیا خوه‌ بو چاره‌سه‌ركرنا كێشێن ناڤبه‌را به‌غدا و هه‌ولێرێ دیاركریه‌ . لێره‌دا قه‌یران ئه‌و ئه‌قلیه‌ته‌ كو عه‌بادى و ده‌ردورێن وى كار پێدكه‌ن ل به‌غدا به‌رامبه‌ر كوردستانێ كو هه‌مى هیڤیا وان ئه‌وه‌ ئه‌زمونێ كوردستانێ ل حوكمرانیێ ژ ناڤببه‌ن و وه‌كى پارێزگه‌ه سه‌ره‌ده‌ریێ ل گه‌ل كوردان بكه‌ن.
تشتێ ل هزرا عه‌بادى و حه‌شد و ده‌ردور و فێسبوكبازانه‌بو و ئه‌و دبلوماسیه‌تا سه‌ركه‌فتیانه‌ یا نێچرڤان بارزانى سه‌روكێ حكومه‌تا هه‌رێما كوردستانێ بو كو شیا هه‌مى هاوكێشێ بگوهریت و زمانێ شه‌رى ل گوره‌پانێ لاده‌ت و وه‌لاتێن جیهانێ بینیته‌ سه‌ر خه‌تێ و ب گوتنا رایه‌دارێن به‌غدا كو زورترین فشار ل سه‌رن بو ده‌ستپێكرنا دانوستاندنا ل گه‌ل هه‌ولێر.
ل داویێ فه‌ره‌ حكومه‌تا هه‌رێما كوردستانێ ل سه‌ر چه‌ند خالێن گرنگ كاربكه‌ن كو ئیدى به‌غدا نه‌شێت ب غرورا خوه‌ ژى ل سنورێن كوردستانێ نیزیك ببیت:
1- به‌رده‌وامى دان ب پروسا چاكسازیێ كو دێ داهاته‌ك زور بو حكومه‌تا هه‌رێما كوردستانێ زڤرینیت.و ئه‌ركێ حكومه‌ت دێ ل دانا موچه‌ى ساناهیتر بیت و دادپه‌روه‌رى ژى دێ پتر جێ به‌جێ بیت.
2- زێده‌كرنا داهاتى ب گرنگى دانا سێكته‌رێن چاندن و پیشه‌سازى و گه‌شتیارى و نه‌فتى . و به‌رامبه‌ر دا رێكخستن و كێم كرنا خه‌رجیان ب رێك گرتن ل گه‌نده‌لى و ته‌خشان و په‌خشانا مالێ گشتى.
3- رێكخستنا ناڤ مالا كوردى ب دارێشتنا سیاسه‌ته‌كا هه‌فپشك كو كوردستان و ئاسایشا وێ هێلا سور بن.
4- به‌رده‌وامى دا ب دبلوماسیه‌تا سه‌ركه‌فتى و به‌ره‌ف هه‌مى وه‌لاتان چون كو ئیدى به‌غدا نه‌شێت هه‌مى ریدان و هاوكێشێ وه‌كى خوه‌ بگه‌هینیته‌ گوهێن وه‌لاتان. زور گرنگه‌ ل پاشه‌روژێ دا حكومه‌تا هه‌رێما كوردستان كار بكه‌ت ل سه‌ر باشتر كرنا په‌یوه‌ندیان ل گه‌ل وه‌لاتێن ئیسلامى و عه‌ره‌بى داكو چ جارا به‌غدا هه‌ستێن ئولى و قه‌ومى دژى كوردستانێ بكار نه‌ئینیت.